شىمكەنتتە قۇقىق قورعاۋ قىزمەت ورتالىعى اشىلدى، دەپ حابارلايدى Qamshy.kz اقپارات اگەنتتىگى. 

«ءبىر تەرەزە» قاعيداسىمەن جۇمىس ىستەيتىن بۇل ورتالىقتا 11 مەكەمەنىڭ ماماندارى ازاماتتارعا 22 كاسىبي قۇقىقتىق كومەكتى اقىسىز كورسەتەتىن بولادى. مۇندا تاجىريبەلى پروكۋرورلار، ادۆوكاتتار، مەدياتورلار، نوتاريۋستار، مەملەكەتتىك كىرىس ورگاندارى مەن اكىمدىك، پروباسيا قىزمەتكەرلەرى حالىقتىڭ شاعىم-ارىزدارىنا جاۋاپ بەرەدى.

ورتالىق «نۇر وتان» پارتياسى وبلىستىق فيليالىنىڭ عيماراتىندا ورنالاسقان. مەكەمە قازىرگى زامانعا ساي ينجەنەرلىك-تەحنيكالىق قوندىرعىلارمەن جاراقتالعان. ەلەكتروندى كەزەك جۇيەسى دە ەنگىزىلگەن. كۇتۋ زالى، سونىمەن قاتار وز-وزىنە قىزمەت كورسەتۋ سەكتورى دا جۇمىس ىستەيدى.

«قۇقىق قورعاۋ قىزمەتتەرى» ورتالىعىنىڭ باسشىسى بولات باينەيەۆتىڭ ايتۋىنشا، ورتالىقتىڭ ماقساتى ءارى قاعيداسى – پروكۋراتۋرانىڭ ارنايى الاڭىندا بارلىق ماماندارمەن ازاماتتارعا كەڭ اۋقىمدى تەگىن قۇقىقتىق كومەكتەر كورسەتۋ.