ق ر تاۋەلسىزدىگى كۇنىنە وراي باتىس قازاقستان وبلىسىنىڭ سىرىم اۋدانىنداعى ارالتوبە اۋىلدىق وكرۋگىنىڭ ورتالىعى «نۇرلى جول» باعدارلاماسىنىڭ اياسىندا جاڭعىرتىلعان جاڭا اۋىز سۋ جۇيەسىنە سالتاناتتى تۇردە ىسكە قوسىلدى. جوبالىق قۇنى 270 ملن. تەڭگە ۇزىندىعى 17 شاقىرىم جاڭا سۋ قۇبىرى ارقىلى اۋىلداعى 200 ۇيگە تازا اۋىز سۋ جەتكىزىلىپ وتىر.

جاڭا جۇيەنى سۋمەن قامتاماسىز ەتۋ ءۇشىن اۋىل سىرتىنان التى بىردەي ۇڭعىما قازىلعان. بارلاۋ ناتيجەلەرى كورسەتكەندەي بۇل ۇڭعىمالارداعى سۋدىڭ ليترگە شاققانداعى ونىمدىلىگى قالىپتاعى كورسەتكىشتەن بەس ەسەگە ارتىق. سۋدىڭ مىناداي ونىمدىلىگى جاعدايىندا، ارالتوبە اۋىلىن اۋىز سۋمەن قامتۋ ءۇشىن ءبىر ۇڭعىمانىڭ ءوزى جەتكىلىكتى. جۇيەنىڭ ەكىنشى نۇكتەسىنىڭ باسىندا سىيىمدىلىعى 25 تەكشە مەتردى قۇرايتىن سۋ مۇناراسى مەن سۋ تازارتۋ ستانسياسى ورنالاسقان.

– مەملەكەتتىڭ دامۋى تۇرعىندارىنىڭ تۇرمىس دەڭگەيىمەن ولشەنەدى. كەيىنگى جىلدارى ارالتوبە اۋىلدىق وكرۋگىندە ۇلكەن جۇمىستار جاسالدى. وكرۋگ ورتالىعى مەن ەلدى مەكەندەر كوگىلدىر وتىنعا قوسىلدى. ۇيالى بايلانىس جۇيەسى جاڭا ساپامەن جۇمىس ىستەپ تۇر. تازا اۋىز سۋ ەندى ءاربىر ارالتوبەلىكتىڭ ۇيىنە دەيىن جەتتى. جاقسىلىق قۇتتى بولسىن! – دەدى سىرىم اۋدانىنىڭ اكىمى تولەگەن تورەعالييەۆ.

– كوگىلدىر وتىن كەلگەندە قاتتى قۋانعانبىز. گاز – اۋىل ادامىنىڭ ارمانى ەدى عوي. تاۋەلسىزدىك كۇنىنىڭ قارساڭىندا اۋىل اۋىز سۋدىڭ جاڭا جۇيەسىنە قوسىلدى. گازدىڭ كەلۋىنىڭ ءوزى اۋىلعا كادىمگىدەي اجار اكەلىپ ەدى، ەندى ۇي-ۇيگە جەتكەن تازا اۋىز سۋ تۇرعىن ۇيلەردىڭ دە قولايلىلىعىن ارتتىراتىنى ءسوزسىز.

بىزدەر، ارالتوبەلىكتەر اۋەلى ءىس باسىندا جۇرگەن ازاماتتارعا رازىمىز. جۇمىستار وتە جۇيەلى ءجۇردى. تۇرالاۋ، توقتاۋ بولعان جوق. سۋ قۇبىرىن جاڭالاپ-جاڭعىرتۋ كەزىندە دە اۋىل اۋىز سۋسىز قالعان جوق. ەلباسىنا العىسىمىز شەكسىز، – دەيدى اۋىل تۇرعىنى بەيبىت بيسەنوۆ.

سونىمەن قاتار، تاۋەلسىزدىك كۇنى مەرەكەسى قارساڭىندا بقو تەرەكتى اۋدانىنىڭ اڭقاتى اۋىلىندا «نۇرلى جول» باعدارلاماسى بويىنشا سالىنعان تازا سۋ قۇبىرى پايدالانۋعا بەرىلدى.

قۇرىلىستىڭ اشىلۋىنا ارنايى كەلگەن اۋدان اكىمى كارىم جاقىپوۆ، اۋداندىق ءماسليحاتتىڭ حاتشىسى ءالجان نۇرعالييەۆ اڭقاتىلىقتاردى الداعى مەرەكەمەن قۇتتىقتاپ، سۋ قۇبىرى يگىلىكتەرىنە جاراسىن دەگەن تىلەكتەرىن ءبىلدىردى. تاپ وسىنداي سالتاناتتى ءراسىم اقجايىق اۋىلىندا دا ءوتتى.

اڭقاتى اۋىلدىق وكرۋگى ارداگەرلەر كەڭەسىنىڭ ءتوراعاسى قۇرمانعازى جالەنوۆ اۋىلعا تازا سۋ جەتكىزىپ، ەلباسىنىڭ تاپسىرمالارىنىڭ ارقاسىندا وسىنداي يگىلىكتەرگە قول جەتكىزگەندىگىن ايتىپ، ونى ءىس جۇزىندە ورىنداعان تۇلعالارعا العىسىن ءبىلدىردى.

ايتا كەتۋ قاجەت، باعدارلاما اياسىندا تاۋەلسىزدىك مەرەكەسى كۇنىنە وراي وبلىستىڭ تاعى 4 اۋىلى جاڭا تازا اۋىز سۋ جۇيەسىنە قوسىلماق.