كوكشەتاۋدا ءوز ءىنىسى مەن ءسىڭىلىسىن ورتەنگەن ۇيدەن الىپ شىعىپ، قۇتقارىپ قالعان 8 جاستاعى قىزعا العىس حات تابىستالدى دەپ حابارلايدى Sputnik قازاقستان توتەنشە جاعداي دەپارتامەنتىنە سىلتەمە بەرىپ.
«كوكشەتاۋ قالاسىنىڭ كراسنىي يار اۋىلىنىڭ №3 مەكتەبىنىڭ 3-سىنىپ وقۋشىسى ۇلدانا ءداۋىر قىزى ەرلىك جاسادى. 9 قاراشادا ورتكە ورانعان ءۇيدىڭ ىشىنەن ءوز باۋىرلارىن الىپ شىقتى. ەش قورىقپاستان، ءتۇتىن جايلاعان ۇيگە كىرىپ ولاردى قۇتقارعان»-دەلىندى تجد حابارلاماسىندا.
قايعىلى جاعداي ورىن العان كۇنى بالالاردىڭ اناسى جۇمىسىندا تۇنگى كەزەكشىلىككە شىققان. باسقا تۋىسقاندارى دا ۇيدە بولماعان، ءتۇن ورتاسىندا ءۇي ورتەنىپ كەتىپ، 8 جاستاعى قىز بالالاردى ۇيدەن الىپ شىققان.
