الماتىدا حمەلنيسكيي كوشەسىن مايلين كوشەسىنەن «جاس قانات» ىقشام اۋدانىنا دەيىن ۇڭگىلەۋ اياقتالدى. الماتى اكىمى جۇمىس ساپارى بارىسىندا جەدەل دامىپ كەلدە جاتقان ەلدى مەكەندى قامتيتىن كولىك ينفراقۇرىلىمىن قاراپ شىقتى.

الماتى اكىمى الەمدىك كۇردەلى ەكونوميكالىق جاعدايدا مەملەكەتتىڭ ينفراقۇرىلىمدى دامىتۋعا قارجى بولگەنىن اتاپ ءوتتى. ۇزىندىعى 1،1 شاقىرىم بولاتىن جاڭا جول سالۋ 2016 جىلدىڭ ماۋسىمىندا باستالعان ەدى. جۇمىس بارىسىندا 400-دەن استام جاڭا جۇمىس ورنى قۇرىلدى، مەردىگەر كومپانيا قالا بيۋدجەتىنە 400 ملن. تەڭگە سالىق تولەدى، ال ەلدى مەكەن تۇرعىندارى جاڭا جولعا يە بولدى.

«ەل پرەزيدەنتى ايتقانداي، ءتۇرلى قوعامنىڭ قوزعاۋشى كۇشى ادام ەڭبەگى بولىپ تابىلادى، سوندىقتان «ەڭبەك ادامى» اتانۋ ۇلكەن قۇرمەت. سىزدەردىڭ الىپ قولدارىڭىزبەن ءۇي سالىنۋدا، جول جاسالۋدا، ءوندىرىس وركەندەۋدە. بۇل- قيىندىعى مەن ءقاۋپى مول قيىن جۇمىس، ءبىراق كيەلى، ويتكەنى وسى ەڭبەك ارقىلى مەملەكەت دامىپ، وركەن جايادى»، - دەپ جۇمىسشىلارعا العىس ءبىلدىردى باۋىرجان بايبەك.

جاقىن ماڭدا ورنالاسقان مەكتەپ وقۋشىلارى دا تاۋەلسىزدىك كۇنى مەرەكەسى قارساڭىندا جاقسى سىيلىق جاساعاندارعا العىستارىن ايتتى.

«بۇرىن ءبىز اياعىمىزعا رەزەڭكە ەتىك كيىپ الىپ باتپاق پەن سۋدى كەشىپ ءوتىپ، مەكتەپكە نەمەسە ەمحاناعا بارۋ ءۇشىن اينالىپ جۇرەتىنبىز. ەندى ءجۇرۋ جەڭىل ءارى قولايلى، كەشكە قاراي قورقىنىشتى ەمەس، جول جارىقپەن قامتىلعان»، - دەدى بالالار.

ايتا كەتەرلىگى،حمەلنيسكيي كوشەسىن تەسىپ، ۇڭگىلەۋدىڭ ءمانى زور، ويتكەنى «جاس قانات» ىقشام اۋدانىندا تۇراتىن 11 مىڭعا جۋىق ادامدى كولىك ينفراقۇرىلىمىمەن قامتاماسىز ەتەدى. ەكى كوپىر قۇرىلىسى اياقتالدى، ءتورت جولاقتى قوزعالىس بولىگى پايدا بولدى، ونىڭ ەكى جاعىنا ارىق جۇيەسى جاسالدى، جارىق كوزدەرى ورناتىلدى،تروتۋارلار اباتتاندىرىلدى، اۆتوبۋس قاتىناسى رەتتەلدى. كەلەر جىلى «جاس قانات» ىقشام اۋدانىنىڭ كوشەلەرى جوندەلەدى.