ق ر دەنساۋلىق ساقتاۋ مينيسترلىگى 2018 جىلدىڭ العاشقى ەكى ايىندا ناۋقاستار تەگىن دارى-دارمەكپەن قامتىلۋى ءۇشىن قوسىمشا 894 ملن تەڭگە ءبولدى.

بۇل تۋرالى الماتىدا وتكەن باسپا ءسوز ءماسليحاتى بارىسىندا قالالىق دەنساۋلىق ساقتاۋ باسقارماسىنىڭ دارىلىك، ماتەريالدىق-تەحنيكالىق قامتۋ جانە مونيتورينگ ءبولىمىنىڭ باسشىسى جانار بورانبايەۆا ايتتى.

مينيسترلىك قاڭتار-اقپانداعى دارىمەن قامتۋ پروسەسى توقتاپ قالماۋ ءۇشىن وسى ۋاقىتقا قوسىمشا 894 ملن تەڭگە ءبولدى.

ونىڭ ايتۋىنشا، كىدىرىس بولماۋى ءۇشىن، ۇكىمەت ءبىرىڭعاي ديستريبيۋتوردىڭ ساتىپ الۋ راسىمدەرىن رەتتەيتىن قاعيدالارىنا وزگەرتۋ ەنگىزۋ تۋرالى شەشىم قابىلدادى.

ياعني، ەندى سك «فارماسيا» دارىلىك زاتتاردىڭ ءۇش ايلىق قاجەتتىلىگىن ءبىر جەردەن ساتىپ الاتىن بولدى. بۇل قازاقستاندىق ناۋقاستار تەگىن دارىگە قىسقا مەرزىمدە قول جەتكىزە الاتىنىن بىلدىرەدى. 

ۇكىمەت قاۋلىسى بۇگىنگى كۇنى كۇشىنە ەندى جانە ءبىرىڭعاي ديستريبيۋتور ساتىپ الۋ راسىمدەرىنىڭ باستالعانىن دەرەۋ جاريالادى.

دارى-دارمەكتەردىڭ ءۇش ايلىق قاجەتتىلىگىن ءبىر جەردەن ساتىپ الۋ ءۇشىن 18،4 ملرد. تەڭگە ءبولىندى.

ناۋقاس ازاماتتارعا جىلدىڭ باسىندا دارىلىك زاتتارعا قىسقا مەرزىمدە قول جەتكىزۋ قيىن بولىپ كەلگەنى راس.

وسىعان بايلانىستى قانت ديابەتى، اۋتويمۋندىق ناۋقاستار 3 ايلىق ءدارىنى الا الماي قالاتىنىن ايتىپ الاڭداۋشىلىق ءبىلدىرىپ جاتىر.

«بۇگىندە الماتىدا دارى-دارمەكپەن بارلىق ناۋقاستار قامتاماسىز ەتىلىپ وتىر. ەمحانالاردا ەسەپتە تۇرعان ادامدار تۇگەل الادى. ەشكىم ءدارىسىز قالماۋى ءۇشىن بيۋدجەتتەن 894 ملن اقشا ءبولىندى. جەلتوقسان، قاڭتار، اقپان ايلارىندا تۇگەل دارىمەن قامتاماسىز ەتىلەدى. ناۋقاستارعا الاڭداۋعا نەگىز جوق»، - دەدى جانار بورانبايەۆا.

سونداي-اق، 2018 جىلدان باستاپ ەمحانالاردىڭ جانىنان ارنايى ءدارىحانالار اشىلىپ، ەسەپتە تۇرعان ناۋقاستار سول جەردەن ءدارى الاتىن بولادى.

ساتىپ الىناتىن پرەپاراتتاردىڭ تىزبەسى، شەكتى  باعاسى، ساتىپ الىناتىن مولشەرى جانە دارى-دارمەكتى جەتكىزۋ كەستەلەرى كورسەتىلىپ، ساتىپ الۋ راسىمدەرىنىڭ باستالۋى تۋرالى حابارلاندىرۋ 14 جەلتوقسان كۇنى «سك-فارماسيا» كومپانياسىنىڭ  سايتىندا جاريالاندى.