الاتاۋ اۋدانىنا جاڭا قوسىلعان «راحات-مادەنيەت»، «تەرەكتى»، «العاباس» اۋداندارىندا ەلەكتر قۋاتى مەن اۋىز سۋ، جول، كارىز جۇيەسى ماسەلەسى تولىق شەشىمىن تاپقان جوق.

بۇل تۋرالى بۇگىن الماتى قالاسى وڭىرلىك كوممۋنيكاسيالار قىزمەتى الاڭىندا الاتاۋ اۋدانىنىڭ اكىمى شاحماردان رىسپايەۆ ايتتى.

«بۇگىنگى تاڭدا جوبالىق-سمەتالىق قۇجاتتاما دايىنداۋ بويىنشا قالالىق ەنەرگەتيكا باسقارماسىمەن بىرلەسىپ جۇمىس ىستەپ جاتىرمىز. بۇل شاعىن اۋدانداردا سۋ، كارىز، ەلەكتر جۇيەسى مەن جول ماسەلەسى ءالى دە بار. مىسالى، «تەرەكتى» ىقشام اۋدانىنا تارتىلعان ەلەكتر قۋاتى قاراساي اۋدانىنان الىنادى. الماتى وبلىسىنا قاراستى ەلەكتر جەلىلەرىن ءوز اۋدانىمىزعا اۋىستىرۋ ماسەلەسى بويىنشا جۇمىستار ءجۇرىپ جاتىر. توق كەرنەۋىنىڭ از بولۋى دا سوندىقتان»، - دەدى اۋدان اكىمى.

اۋدان اكىمىنىڭ ەسەبىندە جالپى، اۋدان بويىنشا تۇرعىنداردى ۇزدىكسىز ەلەكتر قۋاتىمەن قامتاماسىز ەتۋ ماقساتىندا، «13-14 اۋماق» ىقشام اۋداندارىندا ۇزىندىعى 11،8 شاقىرىمدى قۇرايتىن ەلەكتر جەلىلەرى سالىنىپ جاتقانى باياندالدى. سونىمەن قاتار، اكىم بۇگىنگى كۇنى الاتاۋ اۋدانىنىڭ 13 ىقشام اۋدانىندا اۋىز سۋ مەن كارىز قۇبىرلارىن تارتۋ جۇمىستارى دا ءجۇرىپ جاتقانىن ايتتى.

«ناقتىراق ايتقاندا، «ايگەرىم-1،2»، «قاراسۋ»، «ۇلجان-1،2»، «دارحان-بايبەسىك»، «شاڭىراق-1،2»، «ترۋدوۆيك»، «ازتم-العاباس»، «14 اۋماق»، «اقبۇلاق»، «وجەت» جانە «كوك قاينار» ىقشام اۋداندارىنا قۇبىر تارتىلىپ جاتىر. قۇبىرلاردىڭ جالپى ۇزىندىعى 381 شاقىرىمدى قۇرايدى، ونىڭ ىشىندە اۋىز سۋ - 200، كارىز - 180،4 شاقىرىم، بيۋدجەتتەن بولىنگەن قاراجات سوماسى 16 ملرد. 608 ملن. تەڭگە»، - دەدى اۋدان اكىمى.

ب ا ق وكىلدەرى الدىندا ەسەپ بەرگەن شاحماردان رىسپايەۆ ءوزى باسقاراتىن اۋدانىندا اتقارىلعان جۇمىستاردىڭ ناتيجەسىنە توقتالدى.

«الاتاۋ اۋدانىنىڭ سالىق تۇسىمدەرى 9 جىلدا 6،5 ملليارد تەڭگەدەن 26 ملليارد تەڭگەگە جەتتى. بۇگىنگى كۇنى مەملەكەتتىك بيۋدجەتكە 25 ملرد. 735 ملن. تەڭگە ءتۇسىپ، جوسپار 95 پايىزعا ورىندالدى. رەسپۋبليكالىق بيۋدجەتكە 14 ملرد. 790 ملن. تەڭگە ءتۇسىپ، جوسپار 87 پايىزعا ورىندالدى. جەرگىلىكتى بيۋدجەتكە 10 ملرد 946 ملن تەڭگە ءتۇستى، بەرىلگەن جوسپار 109 پايىزعا ورىندالدى»، - دەدى اۋدان اكىمى.

اۋدان اكىمى جەكە ينۆەستيسيا ەسەبىنەن «راحات-مادەنيەت» ىقشام اۋدانىندا 100 ورىنعا ارنالعان بالاباقشا قۇرىلىسى باستالعانىن، «الاتاۋ سيتي» تۇرعىن ءۇي كەشەنىندە 350 ورىندىق بالاباقشا سالىنىپ جاتقانىن ايتتى.

ايتا كەتەيىك، بۇگىنگى كۇنى الاتاۋ اۋدانىندا 23 ىقشام اۋدان بار، جالپى جەر اۋماعى - 10 495 گەكتار. اۋداندا رەسمي ەسەپ بويىنشا 22 مىڭنان استام حالىق تۇرادى.

اۋداندا يندۋستريالدى-يننوۆاسيالىق دامۋ» مەملەكەتتىك باعدارلاماسى اياسىندا 40 جوبا ماقۇلدانعان.