سولتۇستىك قازاقستان وبلىسىنىڭ ءۋاليحان اۋدانىندا جوعالىپ كەتكەن ءمۇعالىم ءولى كۇيىندە تابىلدى، دەپ حابارلايدى Qamshy.kz اقپارات اگەنتتىگى «قازاقپارات» مالىمەتىنە سۇيەنىپ.
جاسى جيىرماعا ەندى ىلىنگەن جىگىتتى پوليسيا مەن توتەنجە جاعداي، اكىمدىك قىزمەتكەرلەرى ءبىر تاۋلىك بويى ىزدەگەن. اۋداندىق ءىىب باستىعى مارات ءالجانوۆتىڭ ايتۋىنا قاراعاندا، قۇرامىنا ەرىكتىلەر قوسىلعان ىزدەۋ توبى جاقىن ماڭداعى اۋىلداردىڭ بارلىعىن تەكسەرگەن. اقمولا وبلىسىنىڭ ىشكى ىستەر دەپارتامەنتىنە حابار بەرىلگەن.
«جوعالىپ كەتكەن بەرەكە اۋىلىنىڭ 20 جاستاعى تۇرعىنى ءوز اۋلىنان 10 شاقىرىم جەردەن تابىلدى. مايىتتە دەنە جاراقاتى جوق. مۇردە سوت-مەديسينالىق ساراپتاماعا جونەلتىلدى»، - دەپ حابارلادى سقو ءىىد باسپا ءسوز قىزمەتىنەن.
بەرەكە اۋىلىندا تۇراتىن ءمۇعالىم كۇندىز ۇيىنەن مەكتەپكە شىعىپ، ءىز-تۇزسىز كەتكەنى تۋرالى بۇعان دەيىن حابارلاعان بولاتىنبىز. بەيسەنبىدە اتالعان اۋداندا قاتتى جەل تۇرىپ، بوران سوققان ەدى.
