اقمولا وبلىسىندا اۋىل تۇرعىندارى جەتىمدەردى جاپپاي اسىراپ الىپ جاتىر، دەپ حابارلايدى Qamshy.kz اقپارات اگەنتتىگى كتك ارناسىنا سىلتەمە جاساي وتىرىپ.

اقمولا وبلىسىنداعى قوشقارباي اۋىلى 11 جەتكىنشەكتى ءبىر كۇندە باۋىرىنا باستى. وسىلايشا، ولار جاۋتەڭكوز بالالاردىڭ دا، اۋىلدىڭ تاعدىرىن دا ءوز قولدارىمەن شەشتى. 60 ءۇيلى اۋىل كەشىكپەي تاعى بىرنەشە جەتىم بالاقايدى اۋىل تاربيەسىنە تارتپاق.

دالىرەك ايتساق، اۋىل حالقى ءبىر ساتتە اۋىل مەكتەبى جابىلادى دەگەندە قاتتى ۋايىمداعان. ءسويتىپ، ءبىراۋىزدان كەلىسىمگە كەلگەن. جەتىمدەردى باۋىرعا باسىپ، اتا-انالىق مەيىرىمگە بولەۋ تىعىرىقتان شىعار جول دەپ تاپقان. شىنىمەن دە، 6 وتباسى بارىپ 11 بالانى اسىراپ العاندا الدىمەن ويلاعاندارى تەك اۋىلدى قۇتقارۋ ەدى. ءبىراق بۇل بالالار ءقازىر ءوز بالامىزدان كەم ەمەس دەيدى ولار.

"ءوزىمنىڭ تۋعان 4 بالام بار. سوعان قاراماستان بالالار ۇيىنەن 3 بالا الىپ كەلدىك. باسىندا جولداسىم ەكەۋمىزدە ءبىر كەلىسپەۋشىلىك بولدى. ول ماعان ۇل الىپ كەل دەدى، جوق مەن قىز الىپ كەلەم دەگەنمىن. بالالار ۇيىنە بارساق، ءبىر سۇيكىمدى بالالار كوزدەرى جادىراپ، ادەمى بولىپ كۇلىمدەپ تۇرعان. ءوز بالالارىما ۇقساپ كەتتى"، — دەيدى قوشقارباي اۋىلىنىڭ تۇرعىنى گۇلنار بايماحانوۆا.

اۋىل مەكتەبىندە ءقازىر 40 وقۋشى بار. بالا سانى شاعىن ءبىلىم وشاعىن ۇستاۋعا جەتكەن سوڭ ول جابىلمايتىن بولىپ شەشىلگەن. ەڭ باستىسى، اۋدان ورتالىعىنداعى بالالار ۇيىندە تەك دايىنعا ۇيرەنگەن جەتكىنشەكتەر ەندى اۋىل ومىرىنە كوندىگىپ قالعان.

اۋىل تۇرعىندارى شىنىمەن يگى ءىستىڭ جالعاسۋىن كۇتەدى. 11 بالانى  نەگىزىنەن مەكتەپ مۇعالىمدەرى اسىراپ الىپتى. ءقازىر قوشقاربايدىڭ باسقا تۇرعىندارى دا بالالار ۇيىنە ءجيى بارىپ ءجۇر.