ءقازىر جەر شارىندا تۇراتىن ادامداردىڭ 800 ميلليوننان استامىنىڭ ءتۇپ-تامىرى كەزىندە نەبارى 11 ەركەكتەن تاراعان، ولاردىڭ اراسىندا ايگىلى جاۋلاۋشى شىڭعىسحان دا بار. ۇلىبريتانيانىڭ لەستەر ۋنيۆەرسيتەتىنىڭ گەنەتيك مارك دجوبلينگ باستاعان حالىقارالىق عالىمدار توبى وسىنداي قورىتىندىعا كەلدى، - دەپ حابارلايدى Daily Mail.

عالىمدار ازيانىڭ قازىرگى تۇرعىندارىنىڭ Y-حروموسومالارىنان نۋكلەوتيدتەردىڭ بىرەگەي تۇردە جۇيەلەنۋىن بايقاپ، ولاردىڭ شىعۋ تەگىن انىقتاۋعا تىرىسقان. تاياۋ شىعىستان وڭتۇستىك-شىعىس ازياعا دەيىنگى قۇرلىقتاعى 127 ايماقتان 5321 ادامنىڭ Y-حروموسوماسىن زەرتتەگەن توپ مەيلىنشە ءجيى كەزدەسەتىن گاپلوتيپتەردى اجىراتتى. ناتيجەسىندە زەرتتەۋگە قاتىسقان ادامداردىڭ 37،8 پايىزىنىڭ 11 اتادان تاراعانى بەلگىلى بولدى. بۇل پروپورسيانى ازيانىڭ حالىقتارىنىڭ جالپى سانىنا شاققان كەزدە، 11 اتادان تاراعان ادامدار سانىنىڭ شامامەن 830 ميلليون ادام ەكەنىنە كوز جەتەدى.

گەنەتيكتەر اعىلشىن ارىپتەستەرى كريس تايلەر-سميتتىڭ "شىڭعىسحان - ادامزات تاريحىندا ەڭ كوپ ۇرپاق وربىتكەن اكە" دەگەن تۇجىرىمىن ماقۇلداپ شىقتى. تايلەر-سميتتىڭ باعالاۋى بويىنشا، جەر شارى ەركەكتەرىنىڭ 0،5 پايىزى (16 ميلليونعا جۋىق ادام) - موڭعول يمپەرياسىنىڭ نەگىزىن قالاۋشىنىڭ تىكەلەي ۇرپاعى.

بۇعان قوسا، جاڭا زەرتتەۋ مانچجۋر كنيازى گيوچانگيدىڭ (1582 جىلى قايتىس بولعان) دە كوپ ۇرپاق تاراتقانىن انىقتادى. ونىڭ نەمەرەسى نۋرساحي (1559-1626) قىتايدىڭ سين اۋلەتى بويىنشا تۇڭعىش يمپەراتورى بولدى. عالىمداردىڭ ەسەبىنشە، گيوچانگيدىڭ تىكەلەي ۇرپاقتارىنىڭ سانى بۇگىندە - ءبىر جارىم ميلليون ادامعا جۋىق. ولاردىڭ ءبارى، نەگىزىنەن، جۇڭگو مەن موڭعوليادا تۇرادى.

تۇقىمى كەڭ جايىلعان قالعان توعىز ادامنىڭ تەك ءومىر سۇرگەن ۋاقىتى عانا انىقتالدى. ولار ازيا قۇرلىعىندا ءبىزدىڭ زامانىمىزعا دەيىنگى 2100 جىلدان ءبىزدىڭ زامانىمىزدىڭ 700 جىلدارىنا دەيىن عۇمىر كەشكەن.

tengrinews.kz