ق ر پرەزيدەنتى اكىمشىلىگىنىڭ ەكس-جەتەكشىسى اسلان مۋسين ۇلى اسىلبەك ءمۋسيننىڭ ولىمىنە قاتىستى مالىمدەمە جاسادى، دەپ جازادى Qamshy.kz اقپارات اگەنتتىگى serke.org مالىمەتىنە سۇيەنىپ.
قازاقستانداعى راسيونال مونوتەيزمنىڭ نەگىزىن سالۋشى فيلوسوف اسىلبەك ءمۋسيننىڭ قايتىس بولعانىنا قىرىق كۇننەن استى. مارقۇمدى ەسكە الۋ ءۇشىن ونىڭ دوستارى مەن تۋىستارى فيلوسوفتىڭ دۇنيەتانىم جونىندەگى كوزقاراسىن باياندايتىن فيلم جاسادى.
ءفيلمنىڭ كىرىسپە بولىمىندە اسىلبەكتىڭ اكەسى، مەملەكەت قايراتكەرى اسلان مۋسين سۇيىكتى ۇلكەن ۇلىنىڭ مەزگىلسىز قازاعا ۇشىراعان تۇسىندا قايعىسىنا ورتاقتاسىپ، مورالدىق قولداۋ بىلدىرگەن بارشا جۇرتقا راحمەت ايتتى. ونىڭ ايتۋىنشا، اسىلبەك مۋسين دۇنيەنى تانىپ بىلۋگە، ادام بولمىسى مەن ادامزات تانىمى جونىندەگى فيلوسوفيالىق ويعا اۋقىمدى ۇلەس قوسىپ، ءوزىنىڭ ارتىندا مول مۇرا قالدىردى. گوللانديادا اسىلبەك ءمۋسيننىڭ باسشىلىعىمەن ادامزات تاريحىندا جيناقتالعان گۋمانيتارلىق، فيلوسوفيالىق، عىلىمي وي 114 تومعا توپتاستىرىلدى، ونى زەرتتەيتىن جانە جۇيەلەيتىن «مونوتەيزم ينستيتۋتى» قۇرىلدى. «مونوتەيزم ينستيتۋتىنا» بىرىككەن الەم عالىمدارى قۇران، ءىنجىل، تاۋرات جانە تاعى باسقا دا كيەلى كىتاپتاردى وقىپ تۇسىنەتىن امبەباپ سوزدىك جاساۋدى جالعاستىرىپ جاتىر. اسىلبەك مۋسين جانە ونىمەن پىكىرلەس دوستارى دۇنيەنى تانىپ ءبىلۋدىڭ راسيونال مونوتەيزم فيلوسوفياسىنىڭ مەتودولوگياسىنا نەگىزدەلگەن جۇزدەگەن ساعاتتىق ساپالى اۋديو-ۆيدەو ماتەريالدار دايىنداپ كەتتى.
اسىلبەك مۋسين 1979 جىلى تۋعان. ەكونوميكا سالاسى بويىنشا جوعارعى ءبىلىم العان ول جاستايىنان ءدىن ماسەلەسىن جان-جاقتى زەرتتەگەن فيلوسوف عالىم. ونىڭ ەسىمى قازاقتاندا «ىزگى امال» پىكىرلەستەر كلۋبىمەن، بىلايعى جۇرت «قۇرانشىلار» دەپ اتايتىن يسلامي اعىممەن تىعىز بايلانىستى. اسىلبەك مۋسين وسى اعىمنىڭ كوشباسشى يدەولوگى سانالادى. ول ءدىني-تانىمدىق تاقىرىپتاردى قامتيتىن ruh.kz، anti-idol.kz، nurmura.kz ينتەرنەت سايتتارىنا باسشىلىق جاسادى.
قازاقستاندىق راسيونال مونوتەيستەردىڭ («قۇرانشىلاردىڭ») پىكىرى بويىنشا، قۇدايدىڭ ادامعا جاساعان ەڭ ۇلكەن سىيى – اقىل. ياعني، ادام قۇدايدىڭ سىيىن - اقىلدى پايدالانۋى مىندەتتى، اقيقاتتى اقىل ارقىلى تانۋى قاجەت. بۇعان قوسىمشا رەتىندە قۇداي ادامدار جولباسشى ەتسىن دەپ كىتاپ جىبەردى. قۇران – ءبارى قامتىلعان، تولىق ءارى انىق باياندالعان كىتاپ. سوندىقتان، قۇراندى تۇسىندىرەتىن، اقيقاتتى تانۋعا كومەكتەسەتىن قوسىمشا كىتاپتاردىڭ، مازحابتاردىڭ، تاريقاتتاردىڭ، اۋليەلەردىڭ، حاديستەردىڭ جانە ت.ب. قاجەتى جوق.
اقيقاتتى ىزدەۋدىڭ ەڭ ۇزدىك جولى – عىلىم مەن فيلوسوفيا. ءار نارسەگە سىن كوزبەن قاراپ داعدىلانباي ناعىز بىلىمگە جەتۋ مۇمكىن ەمەس. اقيقات تۋراسىنداعى دەرەك سىنسىز، دالەلسىز قابىلدانار بولسا، ونىڭ قۇندىلىعى مەن پايداسى كۇماندى.
ءاربىر ەسى دۇرىس ادامنىڭ قۇراندى ءوز بەتىنشە وقىپ-بىلۋگە، سول ارقىلى اقيقاتتى تانۋعا شاماسى جەتەدى. ويتكەنى، ادامدا اقىل بار. اقيقاتتى تانىپ-بىلۋدە اقىل – قۇرال (ينسترۋمەنت)، قۇران – نۇسقاۋلىق (ينسترۋكسيا). بۇل مەتودولوگيا بويىنشا، بارلىق نارسەنى اقىلعا سالىپ، زەرتتەۋ كەرەك، دالەل تابىلىپ جاتسا عانا، ول اقيقات رەتىندە قابىلدانۋى قاجەت.
