- ەلورداسى استاناعا مەملەكەتتىك قىزمەتكە اۋىسقانىڭىزعا بىرنەشە ايدىڭ ءجۇزى بولدى. جاڭا قىزمەتتىڭ تىزگىنىن ۇستاۋ ءسىز ءۇشىن قانشالىقتى قيىن؟
- راس، ءار قىزمەتتىڭ وزىندىك قيىندىعى مەن اۋىرتپالىعى بولادى. وتكەن جىلى مادەنيەت جانە سپورت مينيسترلىگىنىڭ جانىنداعى «قازاق اۋەندەرى» اكسيونەرلىك قوعامىنىڭ پرەزيدەنتى قىزمەتىنە تاعايىندالعانىمدى بىلەتىن بولارسىزدار. مىنە، سودان بەرى جوعارىدا اتالعان قوعامدا قىزمەت اتقارىپ كەلەمىن. بۇل سالانىڭ كۇردەلى ماقساتتارىنىڭ ءبىرى - ەلىمىزدىڭ مادەني ومىرىندە وتەتىن بۇكىل بۇقارالىق مەملەكەتتىك مادەني ءىس شارالاردى ۇيىمداستىرۋ جانە ۇلتتىڭ رۋحاني بايلىعىن دامىتۋ مەن جانداندىرۋ. ءبىز تىكەلەي زاماناۋي تەحنيكا كۇشىن جۇمىلدىرا وتىرىپ، كونسەرتتىك باعدارلامالارمەن اينالىسامىز. ەلىمىزدىڭ دامۋىنا سۇبەلى ۇلەس قوسقان تانىمال تۇلعالاردىڭ مەرەيتويلارى مەن رەسپۋبليكا كولەمىندە اتالىپ وتەتىن مادەني كۇندەردى ۇيىمداستىرامىز. سونىمەن قاتار، تەاترعا قاتىستى ءبىرقاتار شارالاردىڭ وتۋىنە دە ارالاسىپ، كەڭەسىپ، باعىت-باعدار بەرەمىز. سەبەبى "قازاق اۋەندەرى" اكسيونەرلىك قوعامى - مادەنيەت مينسترلىگى تاراپىنان وتكىزىلەتىن بارلىق شارالارعا جاۋاپ بەرەدى. بۇل تەك دراما تەاترلارعا عانا بايلانىستى ەمەس، سونىڭ ىشىندە وپەرا جانە بالەت تەاترىنىڭ ءىس-شارالارىن دا وتكىزىپ وتىرادى.
ۇستىمىزدەگى جىلى اۋقىمدى شارالار اتقارىلماق. اتاپ وتەتىن بولساق، قازاق حاندىعىنىڭ 550 جىلدىعىنا وراي تەك ەلوردادا عانا ەمەس قازاقستاننىڭ بارلىق اۋماقتارىندا ايتۋلى شارالار وتپەك. قازاقستان حالقى اسسامبلەياسىنىڭ 20 جىلدىعى، ق ر كونستيتۋسياسىنىڭ 20 جىلدىعى، ۇلى جەڭىستىڭ 70 جىلدىعىنا بايلانىستى ءبىرتالاي شارالار وتكىزۋ جوسپارلانىپ وتىر. تەاترعا قاتىستى دا بىرنەشە جۇمىستار قولعا الىنىپ وتىر. قازاقستان كوپ ۇلتتى مەملەكەت بولعاندىقتان از ۇلتتى تەاترلار اراسىندا جانە درامالىق تەاترلار «وپەرالي» اتتى وپەرا تەاترلارىنىڭ فەستيۆالدەرى، قۋىرشاق تەاترى كارناۆالى سياقتى كولەمدى ءىس-شارالار وتكىزۋ جوسپارلاندى.
- ءسىزدىڭ تەاتر رەجيسسەرى ەكەنىڭىزدى بىلەمىز. ع.مۇسىرەپوۆ اتىنداعى قازاق مەملەكەتتىك بالار مەن جاسوسپىرىمدەر تەاترىنىڭ ساحناسىندا جاڭا قويىلىم دايىنداپ جاتىر ەكەنسىز سول تۋرالى ايتىپ بەرسەڭىز.
- بۇل سپەكتاكلدى قويۋ تۋرالى ۇسىنىس اكتەرلەر تاراپىنان تۇسكەن بولاتىن. وسى ونەر ۇجىمىندا قارىمدى ەڭبەك ەتىپ جۇرگەن جاس اكتەرلەردىڭ ءبىرازىن جاقسى تانيمىن. ولارمەن شىعارماشىلىق بايلانىستامىز دەسەكتە بولادى. مىنە، وسى جاستار ءبىر پەسا وقىپ بەرۋىمدى سۇرادى. سودان وسەتين حالقىنان شىققان كەڭەس تەاتر رەجيسسەرى، دراماتۋرگ گ.حۋگايەۆتىڭ «قارا شەكپەن» دراماسىن ۇسىندىم. ەڭ باستىسى مۇندا وينايتىن دۇنيە بار. «قارا شەكپەن» ءافسانا-دراماسى ءوزىنىڭ فورماسى وزگەشە. ءبىزدىڭ تۇسىنىكتە ەرتەگى بولسا ول بالالارعا ارنالۋى كەرەك. مۇندا تۇبىرىمەن باسقا.
پەسانىڭ كەيىپكەرلەرى جان-جانۋارلار بولعانىمەن ءبىز حايۋانتتاردىڭ جان دۇنيەسىن ادامي تۇرعىدا تۇسىندىرۋگە كۇش سالىپ وتىرمىز. سپەكتاكلدى كورىپ وتىرىپ ادامداردىڭ دا وسىنداي جانۋار تەكتەس بولاتىنىن اڭعارامىز. قازاقتا سۇر جىلانداي قىز ەكەن دەپ ءتىلىنىڭ ۋىتى بار ازداپ شاعىپ الاتىن قىزداردى اللەگوريالىق كەيىپكەرلەرگە تەلىپ جاتادى. ءبىز وسى قولعا العان دۇنيەمىزگە سول تۇرعىدان كەلدىك. پەسا اۆتورى گ.حۋگايەۆ قوعامدا كەز كەلگەن ادامنىڭ بويىندا قۋاتى، جىگەرى، كۇشى تاسىپ تۇرعان كەزدە ورتا ونى پايدالاناتىنىن العا تارتادى. ەگەر ول رۋحاني نەمەسە فيزيكالىق داعدارىسقا ۇشىراپ توقىراۋعا تاپ بولسا، ونى لاقتىرىپ كەتەتىنى تاعى بار. وسىنداي ادامي قۇندىلىقتاردى ارقاۋ ەتكەن تۋىندى، ادالدىق، ار مەن ۇيات سياقتى ابسوليۋتتىك ۇعىمدار بولاتىنىن ايتادى. مىنە، وسىلاردى وي بەزبەنىنەن وتكىزۋ جانە ادام سەنىمىن جوعالتسا نە ىستەيدى؟ ەكى جۇزدىلىك قايدا اپارادى؟ دەگەن سۇراققا جاۋاپ ىزدەيمىز. ادامنىڭ جان دۇنيەسىندە كۇندەلىكتى تىنىم بەرمەيتىن سۇراقتارعا جاۋاپ بەرۋگە تىرىسامىز. بۇل سپەكتاكلدە ۇيرەنگەن جاقسىلىقتىڭ زۇلىمدىقتى جەڭۋى جوق، كەرىسىنشە بولايىن دەپ تۇر. ادامنىڭ ومىرىندە جاقسىلىق ەمەس زۇلىمدىق الدىڭعى قاتارعا شىعاتىنىن كورسەتەدى. ءبىرىنشى كەزەكتە كورەرمەننىڭ ساناسىنا اسەر ەتۋ كەرەك. قازىرگى ءومىر ەرتەگىدەگىدەي جاقسىلىق پەن شۋاققا تولى ەمەس كەرىسىنشە كولەڭكەلى تۇستارى وتە كوپ. زۇلىمدىق جەرگە بۇعىپ جاتادى دا باسىن كوتەرەتىن كەزى دە بولادى. سول كەزدە سەنىڭ بويىڭدا قارسى تۇرارلىقتاي جىگەر مەن رۋح ادامي قۇندىلىقتار بولۋى كەرەك. وسى سپەكتاكلدە اتالعان قىرلاردى كورسەتۋ ءۇشىن ۇجىممەن جان كەشتى ەڭبەك ەتۋدەمىز. وسى جۇمىسىمىز ارقىلى تەاتردىڭ ستيمۋلىن ارتتىرىپ، شىعارماشىلىق پوتەنسيالىن جۇزەگە اسىرساق دەگەن وي بار. اكتەرلەردىڭ مۇمكىندىگىن كورىپ دەڭگەيىن بايقاعىم كەلدى. كەيىن ونەر دودالارىنا ۇسىنعان كەزدە ۇجىمنىڭ مۇمكىندىگىن ءبىلىپ باعالاپ شىعارماشىلىق بايلانىستى نىعايتا تۇسەمىز. بولاشاقتا تەاتر جانە كينو سالالارى بويىنشا بىرلەسكەن جوبالار بولىپ جاتسا اركىمنىڭ مۇمكىندىگىن جەتە بىلە وتىرىپ ۇسىنۋعا بولادى.
- اسەكە، اڭگىمەمىز اكتەرلەرگە قاراتا ويىسىپ كەلەدى. ءسوز اراسىندا تەاتر جاستارىنىڭ مۇمكىندىگى جايىندا ايتا وتىرساڭىز. ولاردىڭ ىزدەنىستەرىنە كوڭىلىڭىز تولادى ما؟
- جاسىراتىنى جوق، الماتى مادەنيەتتىڭ شوعىرلانعان جەرى. اكەم تەاتر مەن وسى ع.مۇسىرەپوۆ تەاترىنىڭ ترۋپپاسىنا اكادەميا تۇلەكتەرىنىڭ ۇزدىكتەرى تاڭدالىپ الىنىپ ترۋپپا قۇرامىنا قوسىلاتىنى بەلگىلى. ولاردىڭ وسىندا كاسىبي قادامدارى باستالىپ، كانىگى ساقا اكتەرلەرگە اينالادى. بۇل تۇرعىدان كەلگەندە تەاتردىڭ اكتەرلىك پوتەنسيالى جاقسى دەپ ايتار ەدىم. سپەكتاكل قويۋ بارىسىندا بىردەن دايىن دۇنيەنى كورىپ وتىرۋ مۇمكىن ەمەس. ءقازىر بىزدە پروسەسس جالعاسىپ جاتىر، جاستار قالاي جۇمبازداساڭ دا ءيىلىپ قۇلشىنىپ تۇر. تەاتردا ساحنا قوزعالىسى، ساحنا سايىسى، بي، جەكە ءان سالۋ، حور سەكىلدى ساباقتاردىڭ كۇندە جۇرگىزىلىپ وتىرۋى جۇيەگە ەنىپ تارتىپكە اينالدىرىلعان. بۇل اكتەرگە ءوزىن اركەز فورمادا ۇستاۋعا كومەكتەسەدى. جانە دە ءاربىر جەكە ونەر جاساۋشىنىڭ اشىلماي جاتقان قىرلارىن اشۋعا دا مۇمكىندىك بەرەدى.
- ايماقتارداعى تەاترلار جونىندەگى پىكىرىڭىز قانداي؟ قازىرگى تاڭدا ولار قالاي كۇي كەشىپ جاتىر؟
- مادەني ساياسات تۋرالى تۇجىرىمداما قابىلداندى عوي مۇندا كوتەرىلگەن باستى ماسەلەنىڭ ءبىرى ادەبيەت پەن ونەر بويىنشا ۇلتتىق كەڭەس قۇرۋ بولدى. سودان سوڭ ءاربىر ونەردىڭ جانرلار بويىنشا كەڭەس قۇرۋ دا بۇگىنگى كۇننىڭ ماسەلەسى. بۇل قاداعالاۋ ەمەس شىعارماشىلىق ۇجىمداردىڭ اقىلداسا وتىرىپ ءبىر بىرىمەن بايلانىستا جۇمىس جاساۋ. ايماقتىق تەاترلاردىڭ جاعدايى اۋىز تولتىرارلىق دەپ ايتا المايمىز. سەبەبى، جەرگىلىكتى اكىمشىلىك قۇزىرەتىنە بەرىلگەندىكتەن سوققان سويىلى دا نىساناعا ءدوپ تيمەي جاتادى. بىردەن اشىپ ايتاتىنىم، ايماقتارداعى تەاترلاردىڭ جاعدايىن الماتى مەن استاناداعى ونەر ۇجىمدارىمەن سالىستىرۋعا كەلمەيدى. مادەني ورتادان قاشىق جاتقان ولاردىڭ دەڭگەيلەرى مەن احۋالىن جوعارى دەپ ايتا الماسىمىز انىق. ونىڭ ۇستىنە، ايماقتاردا جۇمىس ىستەپ جۇرگەن اكتەرلەردىڭ الەۋمەتتىك جاعدايى، باسپانا ماسەلەسى كوپ جاعدايدا ەسكەرۋسىز قالىپ جاتادى. وبلىستىق تەاترلاردى قارجىلاندىرۋ جەرگىلىكتى بيۋدجەتتىڭ ەسەبىنەن جۇرەتىن بولعاندىقتان، بۇل ونەر ۇجىمدارى كوبىنە-كوپ سونداعى باسشىلاردىڭ ىقپالىمەن جۇرۋگە ءماجبۇر. ال رەسمي نۇسقاۋلاردىڭ تار شەڭبەرىندە شىرمالىپ تۇراتىن مۇنداي ونەر ۇجىمدارىندا شىعارماشىلىق ەركىندىك بولۋى قيىن. بۇل ونسىز دا اقساپ تۇرعان ونەر سالاسىنىڭ، جالپى، رۋحانياتىمىزدىڭ وسىپ-وركەندەۋىنە كەرى اسەر ەتەدى.
دەگەنمەن، وبلىستارداعى تەاترلاردىڭ بارلىعىنا بىردەي سىن ايتۋدان اۋلاقپىن. ءبىراق ايماقتارداعى اكتەرلەردىڭ ماتەريالدىق جاعىنان لايىقتى قامقورلىققا قول جەتكىزە الماي وتىرعانى، رەپەرتۋارداعى تالعام ماسەلەسى اقساپ جاتقانى جاسىرىن ەمەس. جوعارىدا ايتىپ وتكەنىمدە، ولارداعى اكتەرلەردىڭ ايلىق جالاقىلارى دا تومەن. اكىمدىكتەر بولسا قاراۋىنداعى تەاترلار ارتىستەرىن ساحنالىق قويىلىمداردان گورى نەشە ءتۇرلى مادەني-كوپشىلىك شارالارعا، الاڭداردا جالاۋلاتىپ وتەتىن جيىندار مەن مەرەكەلىك شەرۋلەردى ۇيىمداستىرۋعا پايدالانۋعا اۋەس. ونەر اكادەمياسى سياقتى ءبىلىم شاڭىراعىنان جوعارى ءبىلىم الىپ، تالانتتارىن ەڭبەكپەن ۇشتاستىرىپ جۇرگەن ايماقتارداعى ارىپتەستەرىمنىڭ جاي-كۇيىنە جاناشىرلىقپەن الاڭداپ وتىرعان كىمدەر بار؟ جاس مامانداردى باسپانامەن قامتاماسىز ەتۋ جاعى دا دۇرىس قارالماعان. سويتە تۇرا، ءبىز «وبلىستار مەن اۋدانداردا ماماندار جەتىسپەيدى» دەپ شىرىلداعان بولامىز. ال ادامعا قاجەتتى جاعداي جاسالماسا، مامان قايدان بولسىن؟! مىنە، وسىنداي پروبلەمالاردىڭ ءسال دە بولسا شەشىمىن تابۋ ءۇشىن جەرگىلىكتى اكىمدىكتەرگە الاقان جايىپ وتىرعان وبلىستىق تەاترلاردى مادەنيەت مينيسترلىگىنىڭ قۇزىرىنا بەرگەن ءجون. قانشا دەگەنمەن، مينيسترلىكتىڭ اتى - مينيسترلىك. ونىڭ قۇزىرەتى دە، ىقپالى دا باسىم. ونىڭ توڭىرەگىندە تىكەلەي مادەنيەتكە قاتىسى بار ادامدار شوعىرلانعان. ەلىمىزدەگى رۋحاني احۋالعا جاۋاپ بەرەتىن بولعاندىقتان، مادەنيەت مينيسترلىگى ءوز قۇزىرىنداعى تەاترلارعا مويىن بۇرماي قويماس. جەرگىلىكتى بيلىك قۇزىرەتىندەگى تەاترلار ۇجىمى كوركەمدىك جەتەكشى مەن ديرەكتورلاردى ءوز ەرىكتەرىمەن جۇمىستان بوساتۋ سەكىلدى ارەكەتتەر ورىن الماسپا ەدى. شىعارماشىلىق سۋرەتكەر ادامنىڭ ەڭبەك ەتۋىنە ەڭ الدىمەن جاعداي جاسالىپ كەيىن تالاپ قويىلسا ەكەن. جالپى، كوتەرىلىپ وتىرعان وسى ماسەلەنى تەاتر قايراتكەرلەرى وداعى باس قوسىپ، بەلگىلى ءبىر ۇسىنىستارىمەن جوعارىعا شىقسا، يگىلىكتى ءىس بولار ما ەدى؟ نەگىزى، ونەرمەن ونەردى بىلەتىندەر اينالىسۋ كەرەك قوي.
بۇگىندە ا.توقپانوۆتىڭ 100 جىلدىعىنا ارنالعان ءىس شارالار اياسىندا عىلىمي پراكتيكالىق كونفەرەنسيا وتكىزىپ عىلىمي تۇرعىدا وزەكتى ماسەلەلەردى سارالاپ شەشىلۋ جولدارىن قاراستىرىپ ءبىر مامىلەگە كەلۋى كەرەك سياقتى. كورەرمەندەردى تەاتر ونەرىنە تارتۋ ءۇشىن مونيتورينگ جۇرگىزۋ ماسەلەسىن دۇرىس جولعا قويسا ەكەن دەگەن ويدامىز. تەاترلار شاما شارقى كەلگەنشە تەاتر سىنشىلارىن شاقىرتىپ وتىرۋ كەرەك. ماۋسىم ايىندا ساحنالانعان جاڭا سپەكتاكلدەردى كورسەتىپ تالداۋ جاسالىپ پىكىر الماسىپ وتىرسا تەاتردىڭ شىعارماشىلىق وسۋىنە وڭ ىقپال ەتەرى ءسوزسىز. تەاتر سىنشىلارى تالداپ ايتىپ بەرەدى تەاتردىڭ ءوسۋ جولى قانشالىقتى دۇرىس ەكەنىن ايتىپ بەرەدى. وسى جاعىنان كەلگەندە ەۋروپا دەمەي اق قويايىن رەسەيدەن ۇيرەنۋ كەرەكپىز. بۇل ايتىلىپ وتىرعان ماسەلەلەر جۇيەلى جولعا قويىلعان. وسى جەردە مادەنيەت جانە سپورت ءمينيسترى ارىستانبەك مۇحامەدي ۇلىنىڭ رەپەرتۋارلىق القا – كوركەمدىك كەڭەس قۇرۋ جونىندەگى يدەياسى وتە قۇپتارلىق ماسەلە ەكەنىن ايتا كەتكىم كەلەدى. سەبەبى، جەرگىلىكتى اۆتورلاردىڭ ماردىمسىز پەسالارىن ساحنالاۋدا تۇشىمدى دۇنيە تۋمايتىنى ءسوزسىز. رەپەرتۋارلىق كەڭەس بارلىعىنا اۋىزدىق بولار ەدى.
- بيىلعى جىلى قازاق تەاتر ونەرىنە 100 جىل تولىپ وتىرعانى بەلگىلى. وسى ءبىر عاسىردىڭ ىشىندە قازاق تەاترى ءوز كەلبەتىن تاپتى ما؟
- ءبىزدىڭ تەاتردا كەلبەت ارينە بار. ۇلتتىق اكتەرلىك ونەرىمىزدىڭ وزىنە ءتان كەلبەتى بار ەكەنى ءسوزسىز. اكتەرلىك مەكتەپتىڭ ءوزىنىڭ دەڭگەيى دە جوق ەمەس. قازاق تەاترى دەگەندە ءبىر نارسەنى ءبىلۋ كەرەك: ۇلتتىق مىنەز، ءۇن دەگەندەر كورىنىس تاۋىپ وتىرۋى كەرەك. بۇل ءبىر. ەكىنشىدەن، ۇلتتىق كيىم كيىپ الىپ ويناۋ عانا ەمەس پسيحولوگيالىق جالاڭاشتاۋعا جەتۋىمىز كەرەك. ۇلتتىق سالت ءداستۇر مەن ءومىر سۇرگەن ورتاسىن كورسەتۋ مول مۇراجايلىق قويىلىمعا ءتان. ال قازاق تەاترى ول زاماناۋي تالاپتارعا تولىعىمەن جاۋاپ بەرەتىن كاسىبي بىلىكتىلىگى جوعارى ونەر ورداسى. مەنىڭ ويىمشا قازاق تەاترىنا ەڭ باستى جەتپەيتىن نارسە ادامنىڭ ىشكى جان دۇنيەسىن اشىپ كورسەتۋ تۇسى كەنجەلەپ تۇر. ءبىز كوبىنەسە ارلەۋمەن، مۋزىكامەن، كيىممەن اكتەردىڭ كەيىپكەر سومداۋداعى ءوز وبرازىن قالايتىنىن، وزىندىك شەشىمگە كەلگەنىن جەتكىزۋ جاعى اقساپ جاتادى. مىنە وسى جاعىنا باسا ءمان بەرسە دەگەن وي بار. سوسىن اكتەردىڭ ەنەرگياسى، ءقازىر الەم وسىعان ءمان بەرىپ وتىر، سەبەبى، كورەرمەن اكتەردەگى قۋاتتى الۋعا، سودان ءبىر رۋحاني تازارۋعا كەلەدى. اكتەردىڭ جەكە پوزيسياسى، اكتەر شەبەرلىگىنە ءتان ەلەمەنتتەردى يگەرۋ، كەز كەلگەن جانردا امبەباپ ويناۋى بۇگىنگى اكتەرگە قويىلاتىن تالاپتىڭ كۇشتىلىگىنىڭ كورىنىسى. كوبىنەسە تەاتر ساحناسىندا ادام ەموسياسىنا عانا اسەر ەتەتىن قويىلىمدار بولماۋ كەرەك. راسيونالدىق قويىلىمدارعا تالپىنۋىمىز كەرەك. جوعارىدا ايتىلعان ۇلتتىق تەاتر ونەرىندە كەيىپكەر جاندىلىق پەن كەيىپكەر سىندىلىقتىڭ كەرەمەت التىن ورتاسىن ءدوپ باسىپ اكتەرلەر ويىن كورسەتەتىن سياقتى. ءبىز وسى ەكى مەكتەپتى بىردەي مەڭگەرىپ ارەكەت ەتەمىز. مۇنداي دۇنيە ورىس اكتەرلەرىنىڭ وزىنە قيىن، ال بۇل ءبىزدىڭ تابيعاتىمىزعا جاقىن. كوشپەندى حالقىمىزدىڭ وركەنيەتتى مادەنيەتى اكتەرلەردىڭ ويىنى بارىسىندا وسى تابيعيلىعىمىزبەن قاتار كورىنىپ تۇرادى. ساحنادان قازاق ءتىلى مەن قازاقي ءۇن جوعالماۋ كەرەك. سەبەبى ءقازىر قازاقى ءۇن جوعالىپ بارادى. مىسالى مەن وتكەندە گرۋزين، ارميان تەاترلارىندا بولعانىمدا بايقاعانىم ولاردىڭ تەك وزدەرىنە عانا ءتان ۇندەرى بار.
ۇلتتىق تەاترعا بايلانىستى ايتىلاتىن دۇنيەلەر وتە كوپ.
تۇركى تىلدەس حالىقتارعا ءتان ورتاق ۇعىمدار بار. ءبىراق ءوزىمىزدىڭ ۇلتتىق كەلبەتى بار نو، كابۋكي، جۇڭگو وپەراسى سياقتى قازاق تەاتر ونەرىنىڭ مەتودولوگياسى جاسالعان جوق. ءبىز جاسىراتىنى جوق تەاتر سالاسىنداعى پسيحولوگيالىق مەكتەپتى ورىستاردان الدىق. ءقازىر بەرليندە تۇراتىن يۋري الچەس دەگەن تەاتر پەداگوگى، رەجيسسەرمەن ءجيى حابارلاسىپ، اقىلداسىپ وتىرامىن. شىن مانىندەگى ۇلتتىق تەاتردىڭ كيىمى، ەتنوگرافياسى، ءتۇسى ەمەس ۇلتتىڭ رۋحىن كورسەتەتىن قازاق تەاترىن قۇرۋ كەرەك دەپ ءجيى ايتىپ وتىرادى. بۇل جاعىنا شىعىس حالىقتارىنىڭ ىشىنەن جۇڭگو حالقى الدىڭعى قاتاردا كەلە جاتىر. ولار ناعىز ۇلتتىق تەاترلارىن ساقتاپ قالدى.
سۇحباتتاسقان: ايجان احمەت
