الماتى وبلىسىندا 602 ازامات «چەرنوبىل اپاتىن زالالسىزداندىرۋعا قاتىسقانى ءۇشىن» توسبەلگىسىمەن ماراپاتتالدى، دەپ حابارلايدى Qamshy.kz اقپارات اگەنتتىگى.

ماراپاتتى تاپسىرۋ ءراسىمى  تالدىقورعان قالاسىندا  چەرنوبىل اپاتى قۇرباندارىن ەسكە الۋ جانە الماتى وبلىستىق «چەرنوبىل ارداگەرلەرى مەن مۇگەدەكتەرى» قوعامدىق بىرلەستىگىنىڭ 25 جىلدىعىنا ارنالعان «ەرلىككە تاعزىم» اتتى سالتاناتتى جيىندا بارىسىندا ءوتتى. 

وبلىس اكىمىنىڭ ورىنباسارى لاززات تۇرلاشوۆ چەرنوبىل اپاتىنا بايلانىستى ستاتيستيكالىق دەرەكتەردى اتاپ ءوتتى. ونىڭ ايتۋىنشا، اتوم ەلەكتر ستانساسىنداعى اپات زارداپتارىن جويۋعا 32 مىڭنان استام قازاقستاندىق قاتىسقان. سونىڭ ىشىندە الماتى وبلىسىنىڭ 2 مىڭداي تۇرعىنى بار.

«پرەزيدەنتىمىز نۇرسۇلتان ءابىش ۇلى نازاربايەۆتىڭ باسشىلىعىمەن ەلىمىز تاۋەلسىزدىككە قول جەتكىزگەن تۇستا مەملەكەت باسشىسى ەڭ الدىمەن يادرولىق قارۋدان باس تارتىپ، سەمەي پوليگونىن جابۋ تۋرالى تاريحي شەشىم قابىلدادى. ويتكەنى چەرنوبىل اپاتى بۇكىل الەمگە اتوم ەنەرگياسىنىڭ باقىلاۋدان شىعىپ كەتسە قانداي كۇيگە ۇشىراتىنىن كورسەتىپ بەردى. سونىمەن قاتار بۇل قايعىلى وقيعا ءوز ومىرلەرىن اياماستان اپاتتىڭ زاردابىن جويۋعا اتسالىسقان ادامداردىڭ ەرىك-جىگەرى مەن باتىرلىق ۇلگىسىن دە تانىتا الدى. بۇگىن ءبىز چەرنوبىلدىق ەرلەردى ەسكە الۋعا جينالىپ وتىرمىز. ءارقايسىلارىڭىزدىڭ سول كەزەڭدەگى ىس-ارەكەتتەرىڭىز - بۇگىنگى ۇرپاق ءۇشىن ەرلىكتىڭ ۇلگىسى»، - دەدى ل. تۇرلاشوۆ.