سەمەيدە مەديسينالىق جەدەل جاردەم اۋرۋحاناسىنىڭ بازاسىندا جاڭا پوليتراۆما جانە ورتوپەديا ورتالىعى اشىلماق، دەپ جازادى Qamshy.kz اقپارات اگەنتتىگى.

2018 جىلى سەمەيدە جاڭا پوليتراۆما جانە ورتوپەديا، گەماتولوگيالىق ورتالىقتارى اشىلادى. سونىمەن قاتار، «رۋحاني جانعىرۋ» باعدارلاماسى اياسىندا شقو ءداستۇرلى قازاق مەديسينا ورتالىعى قۇرىلادى. بىرەگەي ورتالىقتار، كادرلاردى قايتا دايارلاۋ جانە زاماناۋي جابدىقتارمەن قامتۋعا باعىتتالعان ءىس-شارالار لەگى ايماقتاعى مەديسينا سالاسىنا تىڭ سەرپىن بەرەرى ءسوزسىز.  

شقو ازيا كەڭەستىگىندە بالاماسى جوق بىرەگەي، ۇزدىك تەحنولوگيالار قاتارى شوعىرلانعان گەماتولوگيالىق ورتالىقتىڭ جوبالاۋ جۇمىسى اياقتالۋ ۇستىندە. ايماق باسشىسى دانيال احمەتوۆتىڭ باستاماسىمەن الداعى تاڭدا سەمەيدە دە العاشقى پوليتراۆما جانە ورتوپەديا ورتالىعى اشىلماق. 

– سەمەيدە مەديسينالىق جەدەل جاردەم اۋرۋحاناسىنىڭ نەگىزىندە اشىلاتىن جاڭا پوليتراۆما جانە ورتوپەديا ورتالىعى رەسپۋبليكالىق تراۆماتولوگيا جانە ورتوپەديا عىلىمي-زەرتتەۋ ورتالىعىنىڭ جەتەكشى ماماندارىمەن بىرگە ىشكى پروتەزدەۋ جانە كۇردەلى جاراقاتتاردى ەمدەۋ ءۇشىن ەڭ وزىق تەحنولوگيالاردى ەنگىزۋگە مۇمكىندىك بەرەدى، - دەدى وبلىس دەنساۋلىق ساقتاۋ باسقارماسىنىڭ باسشىسى مارات شورانوۆ. - بۇل جەردە سەمەيدەگى جەدەل مەديسينالىق جاردەم اۋرۋحاناسىنىڭ ءرولى وتە ماڭىزدى، سەبەبى بۇل اۋرۋحانا شقو 9 اۋدانىنا قىزمەت ەتەدى.

مەديسينالىق جەدەل جاردەم اۋرۋحاناسىندا قازىرگى تاڭدا مۋلتيمەديالىق قۇرالدارمەن جابدىقتالعان وتا جاساۋ ءبولىمى، ينسۋلت ورتالىعى، ونداعى ناۋقاستارىن ەرتە قالپىنا كەلتىرۋگە زالى قىزمەت ەتەدى. بۇدان بولەك، فيزيوتەراپيا ءبولىمى، جاڭا قۇرالدارمەن جابدىقتالعان ەكى بىردەي گيمناستيكا بولمەسى دە بار. مۇندا سونداي-اق، حالىقارالىق ستاندارتتارعا سايكەس ناۋقاستاردىڭ ءوز سىرقاتتارىن باسقارۋعا ۇيرەتەتىن ءتۇرلى مەكتەپتەر جۇمىس جاسايدى. ال اۋرۋحانا ماماندارى جىل سايىن شەت ەلدە بىلىكتىلىكتەرىن كوتەرىپ، ارنايى كۋرستاردان وتەدى. بۇل رەتتە ايماق باسشىسى ارنايى وبلىستىق باعدارلامانىڭ ارقاسىندا ءوڭىردىڭ دەنساۋلىق ساقتاۋ سالاسى تولىق جەتىلدىرىلىپ، جاڭارۋدان وتەتىن ايتادى.

– دەنساۋلىق ساقتاۋ سالاسىن دامىتۋدىڭ نەگىزگى ەلەمەنتتەرى - مەديسينا قىزمەتكەرلەرىن ۇنەمى دايىنداۋ، الەمدىك مەديسينالىق ستاندارتتاردى قاتاڭ ساقتاۋ بولىپ تابىلادى. كەلەسى جىلى وبلىستىڭ بارلىق مەديسينالىق مەكەمەلەرى ورتا دەڭگەيدەگى الەمدىك جابدىقتارمەن قامتىلاتىن بولادى. وسىلاي، بەس جىلدىڭ ىشىندە ءوڭىر مەديسيناسىنىڭ باسەكەگە قابىلەتتىلىگى بىرنەشە ەسە ارتاتىنىنا تولىق سەنىمدىمىن. بۇدان بولەك، «رۋحاني جانعىرۋ» باعدارلاماسى اياسىندا ءداستۇرلى قازاق مەديسينا ورتالىعىن اشامىز. مەن حالىق مەديسيناسى جاقسى دامىعان قىتايدا بولىپ قايتتىم. وتكەندى ۇمىتپاۋىمىز كەرەك. بابالار مۇراسىن، ولاردىڭ تاجىريبەلەرىن كەڭىنەن قولدانساق، ۇتارىمىز كوپ بولماك، – دەدى دانيال احمەتوۆ.