الماتىدا تۇركسىب اۋدانىندا جىگىتتەرگە ءجونسىز جابىسقانى ءۇشىن جەتپىس قىز اكىمشىلىك جاۋاپكەرشىلىككە تارتىلدى. بۇل تۋرالى قالالىق ءىىد باسپا ءسوز قىزمەتى حابارلادى.

اۋداندىق ءىىب حابارلاۋىنشا، اكىمشىلىك كودەكستىڭ جاڭا نورمالارى تەك قانا جەڭىل ءجۇرىستى قىزدارعا عانا ەمەس، ادامدارعا تاۋارىن تىقپالاعان 5 ادامعا، 5 قايىرشىعا، ءۇيىن جالعا بەرەتىن 10 ادامعا قاتىستى قولدانىلدى.

ءتارتىپ ساقشىلارىنىڭ نەگىزگى كۇشى سەيفۋللين كوشەسىن تازالاۋعا كەتكەن سياقتى.

«سونىڭ ىشىندە سەيفۋللين كوشەسىندەگى №82 ءۇيدىڭ تۇسىندا تۇراتىن 32 جاسار قىرعىز ازاماتشاسى اكىمشىلىك جاۋاپكەرشىلىككە تارتىلىپ، قازاقستاننان شىعارىلدى. 2014 جىلدىڭ قورىتىندىسى بويىنشا، سەيفۋللين كوشەسىنىڭ بويىندا 1537 ادام جاۋاپكەرشىلىككە تارتىلدى. 576 ادامعا ەسكەرتۋ جاسالسا، 32 ادام اكىمشىلىك جازاعا تارتىلدى. مىڭنان اسا ادامعا ايىپپۇل سالىندى. وسى ارالىقتا  جەڭگەتايلىق ارەكەتتىڭ 124 دەرەگى اشكەرەلەندى. ولاردىڭ 36-سى جولدا ورنالاسقان قوناق ۇيلەردە ورىن العان. ادامدارعا جىنىستىق قىزمەت ۇسىنعان 70 قىز جاۋاپكەرشىلىككە تارتىلدى»، — دەدى تۇركسىب اۋداندىق ءىىب باسشىسىنىڭ ورىنباسارى جاسۇلان بايكەنوۆ.

جاقىندا پوليسيا قىزمەتكەرلەرى سەيفۋللين كوشەسىن تاعى دا ءسۇزىپ شىقتى. جەڭىل ءجۇرىستى قىزدار تار كوشەلەرگە جاسىرىنىپ، زاڭعا باعىنۋعا قۇلقى جوقتىعىن كورسەتتى.

«جاڭا اكىمشىلىك كودەكستەگى قاتاڭ نورمالاردىڭ بارىن بىلە تۇرا جەڭىل ءجۇرىستى قىزدار زاڭعا باعىنۋعا قۇلىق تانىتار ەمەس. ارالارىندا بىرنەشە رەت پوليسيا بولىمىنە كەلگەن ادامدار بار. بۇرىن ولاردى ۋچاستوككە اكەلىپ، ەكى-ۇش ساعات اڭگىمە جۇرگىزۋمەن عانا شەكتەلەتىنبىز. ءقازىر ءتۇرلى اكىمشىلىك  جازا قولدانىلا باستادى. اتالعان ۋچاسكەدە پوليسيا قىزمەتكەرلەرى مەن ۋچاسكەلىك ينسپەكتورلار قوعامدىق ءتارتىپ ورناتۋدا. ءتىپتى ۇلتتىق گۆارديا ۇلاندارى دا كومەككە شاقىرىلۋدا»، — دەدى تۇركسىب اۋداندىق ءىىب اكىمشىلىك پوليسياسى ءبولىمىنىڭ باسشىسى فارحات سىبانبايەۆ.

قازاقپارات