«قازاق حاندىعىنا - 550 جىل» جىر ءمۇشايراسىنا!

  تۇلپار مىنەز تۇياعى ەدىك تەكتىنىڭ، تەبىرەنەيىن، جەر جاھانعا جەتتى ءۇنىم. تاۋەلسىزدىك – ءتاڭىر بەرگەن تۇعىرىم، جار سالاتىن ەڭسەلى ەلمىز دەپ بۇگىن.   كۇللى الەم تاڭدانىسپەن قارايتىن، شۇعىلاسىن سىيلادى التىن اراي كۇن. ەرى دانا، جەرى بايتاق كيەلى، قىزعانىشىن قوزدىراتىن تالايدىڭ.   بەكەم ىرگە بەيبىتشىلىك ۇرانى، اتا تاريح التىن اينا ءجىر-انى. مارتەبەسى كوك تۋىمەن اسپانداپ، كۇن استىنان قالىقتاعان قىرانى.   سىر تولعاسام ابىز بابا ارىدان، قايسارلىعى قارا تاۋدان دارىعان. ۇلانىمىن ۇلاعاتتى ۇلى ەلدىڭ، كوك سەمسەرىن كوك جارتاسقا جانىعان.   قۇبا جوندى كوكجال جورتقان دالاسى، قۇت يىگەن ساعىم قۋعان سالاسى. بالبالىمەن شەجىرەسىن شەرتەتىن، التاي، ارقا، اتىراۋدىڭ اراسى.   رۋحى اسقاق تۋ كوتەرگەن ءبورىلى. ار-نامىسىن تاپتاتپاعان ءور ۇلى. قاراشا ەلدىڭ شاڭىراعى كيەلى، بي، اۋليە، باتىر تۋعان ءتورى ۇلى.   عازيز جانىن قۇربان ەتكەن حالقى ءۇشىن، پاراساتپەن ايگىلەگەن بار كۇشىن. تاعىلىمدى تاسقا باسىپ تاڭباسىن، جەر شارىنىڭ ەنشىگە العان جارتىسىن.   تاۋقىمەتتى تاعدىر كەشىپ سان الۋان، ءار ءداۋىرى قانمەن تەرمەن جاڭارعان. اتام قازاق تونىكوك پەن كۇلتەگىن، ءتۇبىم تۇركى، عۇننان، ساقتان تارالعان.     ءتونىپ باسقا تالاي ناۋبەت سان سىناق، قاس ءدۇشپانى بولعاندا دا جانشىماق. ەسىلدەرى ەڭكەيتپەگەن ەڭسەسىن، ەستەن تانىپ قۇلاسا دا قانسىراپ.   مەكەن ەتىپ ۇلان-عايىر ولكەنى، وسكەن دارحان پەيىلى مەن وركەنى. حاندىق قۇرىپ بابام كەرەي، جانىبەك، نۇرلى جولعا جالعاستى ەلدىڭ ەرتەڭى.   سوندان بەرى عاسىر ءوتتى بەس جارىم، اسۋلاردان استى كەرۋەن كوش قالىڭ. دۇرسىلكىنتكەن دۇنيەنى ءدۇبىرى، ەلدىگىمنىڭ ايعاعى بۇل ەسكە الىم.   ءسالت-داستۇرىن ىزگىلىكتەن جيناعان، تاسقىنداسا ارناسىنا سىيماعان. قاسيەتىڭنەن اينالايىن ءاز بابا، ۇرپاعىنا ۇلى مۇرا سىيلاعان.   بۇگىن ءمالىم عارىشقا دا، ايعا اتى، اتويلاسا ارىستانداي ايباتى. قۇشاق جايسا توگىلەتىن مەيىرىم، قاھارلانسا جاۋ جايراتقان قايراتى.   تىرلىگىنە جاۋاپ بەرەر نانىمدى، ءبىز سولاردىڭ جالعاسىمىز جالىندى. جاراتقانعا شەكسىز-شەكسىز تاۋبە ەتەم، ءقادىر تۇتىپ ءاربىر اتقان تاڭىمدى.  

ايدىن كالىمحان ۇلى – 1969 جىلى 28 شىلدەدە دۇنيەگە كەلگەن. “قازاق ءتىلى مەن ادەبيەتى” ماماندىعى بويىنشا ءبىلىم العان. العاشقىدا كاسىپوداق، مادەنيەت سالالارىندا جۇمىس جاساعان ول 2008-2012 جىلدار ارالىعىندا الماتى وبلىستىق “الاتاۋ” قوعامدىق-ساياسي گازەتىندە جۋرناليست جانە ادەبيەت ءبولىمىنىڭ مەڭگەرۋشىسى بولىپ مىندەت اتقارعان. 1986 جىلدان باستاپ قالام ۇستاعان ونىڭ ءتۇرلى جانرلاردا جازىلعان شىعارمالارى ەلىمىزدە جانە شەتەلدەردە جارىق كورگەن 20-عا جۋىق كىتاپتارعا ەنگىزىلگەن. «بەۋ دۇنيە» اتتى جىر جيناعىنىڭ اۆتورى. ءقازىر «تالدىقورعان» گازەتىندە قىزمەت ەتەدى. وبلىستىق، رەسپۋبليكالىق، جانە شەتەلدە وتكەن 20-دان استام جىر ءمۇشايراسىنىڭ جەڭىمپازى. ول ءوزىنىڭ جانە قازاق حالقىنىڭ ايگىلى اقىن-جازۋشىلارىنان باستاپ، بايروننىڭ، پۋشكيننىڭ شىعارمالارىنان 500-گە تارتا ولەڭ-تولعاۋلار مەن قيسسا-داستانداردى جاتقا وقيدى.