يزرايل مەملەكەتى رەسمي تۇردە قازاق ۇلتىن "ۇستاز-حالىق" دەپ مويىنداۋدى ۇسىندى، - دەپ جازادى nur.news.kz.

قازاقستاندا 140-تان استام ۇلت پەن ۇلىس وكىلدەرى ءبىر شاڭىراقتىڭ استىندا تاتۋلىق پەن ىنتىماقتىڭ تۋىن جەلبىرەتۋدە. جانە قازاقستانداعى ەۆرەي دياسپوراسى ەشبىر مۇقتاجدىق پەن قىسىمدىق كورمەي ءومىر سۇرۋدە. وسىعان العىس رەتىندە يزرايلدە قازاق ۇلتىن "ۇستاز-حالىق" دەپ مويىندايدى دەيدى ەۆرەي مادەني-اعارتۋشىلىق، قوعامدىق -ساياسي "الەف" ورتالىعىنىڭ وكىلى نيكولاي (ناحۋم) گوربۋنوۆ.

يزرايلدە "الەمنىڭ ۇستازى" بولۋعا لايىق ۇلتقا ەسكەرتكىش ءمۇسىن ورناتىپ، قۇرمەتىنە اعاش وتىرعىزۋ ءداستۇرى بار. ولار ۇلتى ەۆرەي ەمەس، قيىن-قىستاۋ كەزەڭدەردە ولاردان كومەگىن اياماعاندار. مىسالى، ۇوس كەزىندە بەلورۋس ايەل بىرنەشە ەۆرەي بالالارىن باسىنا تونگەن قاۋىپتەن جاسقانباي فاشيستتەردەن قۇتقارىپ قالادى. ونىڭ قۇرمەتىنە يزرايل كوشەلەرىنىڭ بىرىنە ەسكەرتكىش ءمۇسىن ورناتىلىپ، ەسىمى التىنمەن اپتەلىپ جازىلعان جانە اعاش وتىرعىزعان. ول اعاش يەرۋساليم كوشەلەرىنىڭ بىرىندە ءالى جايقالىپ تۇرعان كورىنەدى. قازىرگى ۋاقىتتا اتالمىش قۇرمەتتى مارتەبەنى "قازاق" ۇلتىنا بەرۋ جوباسى تالقىلانۋدا. العاشقىدا بىرنەشە ۇمىتكەرلەر بولعان. ءبىراق، ەۆرەي قالقىنىڭ جوعارى مارتەبەسىنە، ادامزاتتىڭ ۇستازىنا بىردەن ءبىر لايىقتى ۇلت "قازاق" دەپ تاپقان.

اتالمىش ورتالىقتىڭ جەتەكشىسى ن.گوربۋنوۆ: "تاۋەلسىزدىك جىلدارىندا قازاقستان حالقى اسسامبلەياسى وتە ماڭىزدى ءرول اتقاردى. يزرايلدە قازاق كوشباسشىسى نۇرسۇلتان ءابىش ۇلىنىڭ كورەگەن ساياساتىن ەرەكشە باعالايدى"-دەي كەلە، ورتالىق جەتەكشىسى، بەلگىلى جۋرناليست مويسەي گولدبەرگ: " نۇرسۇلتان ءابىش ۇلىنىڭ اسسامبلەيا جۇمىسىن تىكەلەي قاداعالاپ وتىرعانىنىڭ ناتەجيەسىندە بارشا ۇلت پەن ۇلىس وكىلدەرى تىنىشتىقتا ءومىر سۇرۋدە. كەز كەلگەن ماسەلەنى جينالىپ، دوڭگەلەك ۇستەل بارىسىندا ورتاق تالقىعا سالۋعا، دۇرىس شەشىم قابىلداۋعا بولادى"-دەدى.