قىرعىزستان جەڭىل ونەركاسىپ قاۋىمداستىعىنىڭ (جەڭىل ونەركاسىپ) پرەزيدەنتى ساپار اسانوۆ قاراعاندىدا ساتىلعان قىرعىز كيىمىنەن ۋلى زات تابىلدى دەگەن اقپاراتقا تۇسىنىكتەمە بەردى دەپ حابارلايدى Qamshy.kz اقپارات اگەنتتىگى sputniknews.kz سايتىنا سىلتەمە جاساي وتىرىپ.

ايتا كەتەيىك، «قىرعىزستاندا جاسالعان» دەگەن تاڭباسى بار جايالىقتاردان، جەيدەلەر مەن جەمپىرلەردەن فورمالدەگيد تابىلعان ەدى.  

«جەڭىل ونەركاسىپ» باسشىسى قىرعىزستاننىڭ اتىن جامىلعان الدەكىمدەر ەلدىڭ بەدەلىن ءتۇسىرۋ ءۇشىن وسىنداي زياندى كيىمدەر تىگىپ، ساۋدالاپ جاتىر دەپ ەسەپتەيتىنىن مالىمدەدى. سونىمەن قاتار ول بۇل كيىمدەر قىرعىزستان اۋماعىنداعى جاسىرىن سەحتاردا تىگىلۋى مۇمكىندىگىن دە جوققا شىعارمادى.     

«بىزدە، اسىرەسە، بالالار كيىمى ءوندىرىسى قاتاڭ باقىلانادى. ساپا سەرتيفيكاتىنسىز ەلدەن كيىم شىعارىلمايدى. بىزگە «قىرعىزستاندا جاسالعان» تاڭباسىمەن جۇڭگو كيىمى ءجيى تۇسەدى. قازاقستان جانە رەسەيمەن 20 جىلدان استام جۇمىس ىستەپ كەلەمىز، وسى ۋاقىت ىشىندە ءبىزدىڭ تاۋارلارعا قاتىستى بىردە-بىر ەسكەرتۋ بولعان ەمەس. بۇل جاساندى بۇيىمدار دەپ ويلايمىن، الدەكىمدەر بەدەلىمىزدى ءتۇسىرۋ ءۇشىن بىزگە ور قازىپ وتىر»، — دەدى اسانوۆ. 

مەملەكەتتىك سانيتارلىق-ەپيدەميولوگيالىق قاداعالاۋ دەپارتامەنتى باعىناتىن دەنساۋلىق ساقتاۋ ءمينيسترى تالانتبەك باتىرالييەۆ ءقاۋىپتى تاۋار ءوندىرىسى تۋرالى ازىرگە ناقتى اقپارات جوق ەكەنىن حابارلادى. سوندىقتان بۇل كيىمدەر قىرعىزستاندا تىگىلدى دەۋگە ءالى ەرتە.  

«ەگەر اقپارات راستالسا، ءبىز بۇل ىسپەن اينالىسىپ، سوڭىنا دەيىن جەتكىزەمىز. الايدا بىزدە ءوندىرۋشى جانە تاۋار قۇرامى تۋرالى ناقتى اقپارات جوق. ءوز باسىم وتاندىق ونەركاسىپ ونىمىنە قاتىستى بىردە-بىر شاعىم العان جوقپىن. ول ءتيىستى دەڭگەيدە تەكسەرىلىپ جاتىر»، — دەپ اتاپ ءوتتى مينيستر.