ورتالىق كوممۋنيكاسيالار قىزمەتىندە باتىس قازاقستان وبلىسىنىڭ اكىمى التاي سەيدىر ۇلى كولگىنوۆتىڭ قاتىسۋىمەن وڭىردە «رۋحاني جاڭعىرۋ» باعدارلاماسىنىڭ جۇزەگە اسۋى تۋرالى باسپا ءسوز كونفەرەنسياسى ءوتتى دەپ حابارلايدى Qamshy.kz اقپارات اگەنتتىگى. 

«باعدارلاماعا 2017 جىلى مەسەناتتار قارجىسى ەسەبىنەن 2،5 ملرد. تەڭگە جۇمسالىپ، 60 جوبا جۇزەگە اسىرىلدى. ونىڭ ىشىندە 10 الەۋمەتتىك نىسان (بالاباقشا، سپورت كەشەندەرى، مەديسينالىق امبۋلاتوريالار)، 5  مادەنيەت نىسانى (ەسكەرتكىشتەر، مۋزەيلەر) سالىندى جانە جوندەۋدەن وتكىزىلدى. 24 نىساندا اباتتاندىرۋ (كىشى ساۋلەت فورمالارى، ساياباق، تىنىمباقتار) جۇمىستارى اتقارىلدى. 21 نىساننىڭ ماتەريالدىق-تەحنيكالىق بازاسى جاڭارتىلدى. بيىل دا وسى جۇمىستار قارقىندى جۇزەگە اسىرىلاتىن بولادى»، - دەدى وبلىس اكىمى  التاي كولگىنوۆ.

سونداي-اق  ا.كولگىنوۆ وبلىستاعى ءبىلىم سالاسىنداعى اتقارىلعان جۇمىستاردى اتاپ ءوتتى. سونىڭ ىشىندە وتكەن جىلى مەكتەپ تۇلەكتەرىنە 200 گرانت بولىنگەندىگى، IT-مەكتەبىن اشۋ جوسپارى، جوعارى وقۋ ورىندارىندا كاسىپكەرلىكتى قولداۋ ورتالىعىنىڭ جۇمىسىنا توقتالدى. 

ا.كولگىنوۆ ءوز بايانداماسىندا وڭىردەگى ۇلتتىق ءداستۇردى قايتا جاڭعىرتۋ بويىنشا جۇمىستاردى دا ايتتى. «ءوڭىرىمىزدىڭ بارلىق مەكتەپتەرىندە ءۇزىلىس كەزىندە قازاق كومپوزيتورلارىنىڭ كۇيلەرىن ويناتۋدى قولعا الدىق. وعان قوسا، مەكتەپتەردە دومبىرا ۇيىرمەلەرى كەڭەيتىلۋدە. سونداي-اق، ورال قالاسىندا «دومبىرا كۇنىن» وتكىزۋ جوسپارلانىپ وتىر»، - دەپ اتاپ ءوتتى وبلىس اكىمى.

بقو اكىمى بايانداماسىنىڭ ءبىر بولىگى ءوڭىردىڭ قاسيەتتى ورىندارىنا ارنالدى. «قاسيەتتى ورىندار» تىزىمىنە ەنگەن «بوكەي ورداسى» تاريحي-مۋزەي كەشەنىنە وزىمىزدەن جانە الىس-جاقىن ەلدەردەن كەلەتىن تۋريستەردىڭ قىزىعۋشىلىعى ايرىقشا. بۇل ءوڭىرىمىز ءۇشىن وتە ماڭىزدى جوبا. وبلىس ورتالىعىنان شالعاي جەردە، 600 شاقىرىم قاشىقتىقتا ورنالاسقان كەشەندە ءتۋريزمدى دامىتۋ ماقساتىندا كىشى اۆياسيانى، جەرگىلىكتى اۋە جەلىلەرىن دامىتۋدى قولعا الۋدامىز. وسىعان سايكەس، بۇرىن بولعان اۋە ايلاقتارى 2021 جىلعا دەيىن قايتا قالپىنا كەلتىرىلەتىن بولادى»، - دەدى بقو اكىمى.

ايتا كەتۋ كەرەك، بيىل ورال قالاسىندا زاماناۋي مادەنيەت سارايىنىڭ قۇرىلىسى باستالادى.