مەملەكەت باسشىسى نۇرسۇلتان نازاربايەۆ قازاقستاندىقتاردى پاسحا مەرەكەسىمەن قۇتتىقتادى، دەپ حابارلايدى اقوردانىڭ باسپا ءسوز قىزمەتى.

Qamshy.kz اقپارات اگەنتتىگى قۇتتىقتاۋ ءماتىنىن وقىرمان نازارىنا ۇسىنادى. 

قىمباتتى وتانداستار! بارشاڭىزدى جارقىن مەرەكە - پاسحامەن شىن جۇرەكتەن قۇتتىقتايمىن! كوكتەمنىڭ وسى كۇنى الەمنىڭ ءار تۇكپىرىندەگى ادامداردىڭ جۇرەگى ەرەكشە جىلىلىققا، قۋانىش پەن ءۇمىت سەزىمىنە بولەنەدى.

پاسحا مەيرامىنىڭ سيمۆولدارى سانالاتىن ماحابباتتىڭ ماڭگىلىك قۇندىلىقتارى، قايىرىمدىلىق پەن مەيىرىمدىلىك - ەلىمىزدىڭ بۇكىل تۇرعىنى ءۇشىن قىمبات ءارى قاستەرلى.  بارلىق كونفەسسيا وكىلدەرىنىڭ ءوزارا ۇيلەسىمدى ىقپالداستىقتا بولىپ، بەيبىت ەڭبەك ەتۋى - قازاقستاننىڭ باستى بايلىعى.

ءبىز مۇنى كوزدىڭ قاراشىعىنداي ساقتاپ، ءارى قاراي دامىتا بەرۋىمىز كەرەك.  جاڭارۋ مەن جاقسىلىققا دەگەن سەنىمدى بىلدىرەتىن بۇل مەرەيلى مەرەكە قوعامىمىزدىڭ بارلىق سالاسىندا ءجۇرىپ جاتقان جاڭعىرۋمەن ۇندەسەدى.

جوعارى ادامگەرشىلىكتى دارىپتەيتىن پاسحا مەيرامىنىڭ ءمان-ماڭىزى يگى ىستەرگە جەتەلەپ، ءبىزدىڭ ءومىرىمىزدىڭ گۋمانيستىك نەگىزدەرىن نىعايتا تۇسەدى.

بارشاڭىزدىڭ شاڭىراقتارىڭىزدا تاتۋلىق پەن تىنىشتىق بولسىن! سىزدەرگە زور دەنساۋلىق، باقىت، باق-بەرەكە تىلەيمىن!