«قازگيدرومەت» رمك سوڭعى جىلدارى ەلىمىزدە كوپتەپ ورىن الا باستاعان كوكتەمگى سۋ تاسقىندارىنىڭ سەبەبىن ءتۇسىندىردى، دەپ حابارلايدى Qamshy.kz اقپارات اگەنتتىگى قازاقپاراتتىڭ دەرەگىن نەگىزگە الىپ.

قازگيدرومەتتىڭ مالىمەتىنە سۇيەنسەك،  رەسپۋبليكا تەرريتورياسى رەلەف پەن كليماتتىڭ ايرىقشا ارتۇرلىلىگىمەن ەرەكشەلەنەتىندىكتەن، اپاتتى گيدرولوگيالىق قۇبىلىستار ءبىر وبلىستا نەمەسە باسقا دا وڭىرلەردە جىل سايىن قايتالانادى. قازاقستان اۋماعىندا ناۋرىز-مامىر ايلارىندا ءاردايىم سۋ تاسقىنى جۇرەدى.

«سۋ تاسقىنى مەن سۋ باسۋ ۇلكەن كولەمدەگى قار قورى، قاردىڭ قارقىندى ەرۋى، كۇزدەن باستاپ قاتتى ىلعالدانعان جانە قاتىپ قالعان توپىراق جاعدايى جانە قاتتى جاۋىن-شاشىننىڭ ءتۇسۋى سىندى بىرنەشە تابيعي فاكتور سالدارىنان بولادى. ءبىراق، قار قورى كوپ بولماسا دا قاتتى جاۋىن-شاشىن جانە توپىراقتىڭ قاتىپ قالۋى كەزىندە شىعىس قازاقستان وبلىسىنداعىداي ەكسترەمالدى جوعارى سۋ تاسقىنى قالىپتاسۋى مۇمكىن. وزەندەردە سەڭ كەپتەلىستەرىنىڭ پايدا بولۋى دا سۋ دەڭگەيلەرىنىڭ كۇرت كوتەرىلۋىنە، سۋدىڭ تاسۋى مەن جايىلماعا شىعۋىنا ىقپال ەتۋى ىقتيمال»، - دەپ جاۋاپ بەردى "قازگيدرومەت"رمك باسپا ءسوز قىزمەتى اگەنتتىكتىڭ رەسمي ساۋالىنا.

تاۋ وزەندەرىندە سۋ تاسقىنى بارلىق كوكتەم-جاز مەزگىلىندە نوسەر جاڭبىر جاۋعاندا بولادى. تاسىعان سۋدىڭ  باسىم بولىگى وزەن جۇيەلەرى دامىعان تاۋلى اۋداندار - الماتى (سۋ تاسۋدىڭ جوعارى كورسەتكىشى مەن سەل) شىعىس قازاقستان (سۋ تاسقىنى مەن مۇز كەپتەلىسى)، وڭتۇستىك قازاقستان وبلىستارى (سۋ تاسقىنى) اۋماعىندا.

«قازاقستاننىڭ ەكونوميكاسىنا زيان كەلتىرەتىن سۋ تاسقىنى قايتالانۋى جوعارىلادى. بۇل، ەڭ الدىمەن، سوڭعى ونجىلدىقتا وتكەن كەزەڭمەن سالىستىرعاندا قازاقستاننىڭ كوپتەگەن تاۋلى وزەندەرىندە سۋ كولەمىنىڭ ارتۋىنا بايلانىستى. ال تاۋلى وزەندەردە سۋ كولەمىنىڭ ارتۋى جانە سۋ تاسۋدىڭ قايتالانۋى كليماتتىڭ وزگەرۋىنە، اۋا تەمپەراتۋراسىنىڭ جوعارىلاۋىنا، تاۋ مۇزدىقتارىنىڭ دەگراداسياسىنا جانە مۇزدىقتاردان سۋ بەرىلۋىنىڭ جوعالۋىنا بايلانىستى. بۇدان باسقا، جىلىمىقتىڭ اسەرىنەن تاۋلى اۋدانداردا سۋ تاسقىنىن ۇلعايتاتىن جاۋىن-شاشىن كوپتەپ جاۋا باستادى»، - دەلىنگەن حابارلامادا.