الماتىدا «رۋحاني جاڭعىرۋ» باعدارلاماسى اياسىندا جامبىل اتىنداعى كىتاپحانا جاستاردىڭ زياتكەرلىك ورتالىعى رەتىندە قايتا جاسالىپ، مودەرنيزاسيالاندى.

كۇردەلى جوندەۋدەن وتكەن كىتاپحانادا كىتاپتارمەن، ەلەكتروندى اقپاراتپەن جۇمىس ىستەۋگە، جاڭا شىعارمالاردى تانىستىرۋعا، قۇجاتتى جانە عىلىمي- تانىمدىق فيلمدەردى كورۋگە مۇمكىندىك بەرەتىن زاماناۋي «open space» جانە تەگىن «Wi-fi» مەن كوفەينيا بار.

«مەملەكەت باسشىسى اتاپ وتكەندەي، «جاڭا گۋمانيتارلىق ءبىلىمنىڭ» العاشقى وقۋلىقتارىن تانىستىرۋدا زاماناۋي ۇلت باسەكەلەستىگىنىڭ باستى شارتتارىنىڭ ءبىرى جاس ۇرپاقتىڭ بىلىمدىلىگى. «پرەزيدەنتتىڭ «قازاقستان-2050 ستراتەگياسىن قولداۋ» قوعامدىق قورىنىڭ قارجىلىق كومەگى ارقاسىندا ءبىلىم مەكەمەلەرىن مودەرنيزاسيالاۋدىڭ جاڭا ءتاسىلى جۇزەگە استى. جوباعا قاتىسقان الماتىلىق جاستار كلاسسيكالىق كىتاپحانانى جاستاردىڭ كوۆوركينگ- ورتالىعىمەن ويداعىداي ۇندەستىرە ءبىلدى»، - دەپ اتاپ ءوتتى مەگاپوليس اكىمى باۋىرجان بايبەك.

جاڭارعان ينتەرەرمەن قوسا «سيفرلى قازاقستان» باعدارلاماسىنا ساي كىتاپحانانىڭ بارلىق كىتاپ قورى سانالىپ، ەلەكتروندىق فورماتقا كوشەدى. بۇلاردان وزگە، قايتا جاڭعىرعان جامبىل اتىنداعى كىتاپحانا جالپى كىتاپ قورى 1،8 ميلليون دانا بولاتىن قالانىڭ بىرەگەي كىتاپحانا جۇيەسىنە ەندى. كوپشىلىك وقىرمان ءۇشىن كىتاپحانا بيىلعى جىلدىڭ مامىر ايىندا اشىلادى.

«مۇندا وقىرمان قاجەتتى اقپاراتتى الىپ قانا قويماي، ءوز پىكىرىمەن ءبولىسىپ، ونى تالقىلاي الادى. ءبىز كەڭىستىكتى زاماناۋي جانە جايلى جاساۋعا تىرىستىق. مىسالى، 550 سپوت جاقسى جارىق بەرۋمەن قاتار قولايلى اتموسفەرانى تۋعىزادى»، - دەدى جوبا كۋراتورى كاميللا لۇقپانوۆا.

ەسكە سالساق، قالانى جاڭارتۋدىڭ ەكىنشى جىلى بويىنا بيىلعى جازدا ءبىرقاتار نەگىزگى داڭعىلدار، سونىڭ ىشىندە نازاربايەۆ، اباي، ابىلاي حان داڭعىلدارى جانە باسقالارى جاڭارادى. بۇلاردان وزگە، بۇرىننان جاڭارعان 455 اۋلا الاڭدارىنا قوسىمشا تاعى دا 585 اۋلا جوندەلەدى. مەگاپوليستە 157 كوشە مەن 30 شاقىرىم قالا تروتۋارلارى جاڭارادى.