شىمكەنتتە 200 مىڭ تەڭگە ءۇشىن جاس جولاۋشى قىزدى توناپ، قاساقانا ءولتىرىپ كەتكەن تاكسي جۇرگىزۋشىسى سوتتالدى، دەپ حابارلايدى Qamshy.kz اقپارات اگەنتتىگى وقو-نىڭ قىلمىستىق ىستەر جونىندەگى مامانداندىرىلعان اۋدانارالىق سوتىنا سىلتەمە جاساپ.

سوتتىڭ بەرگەن مالىمەتىنە سۇيەنسەك، 26 جاستاعى تاكسيست 19 جىلعا باس بوستاندىعىنان ايرىلعان. 

"بۇل ءىس سوتقا ق ر قىلمىستىق كودەكسىنىڭ 192-بابىنىڭ 2-بولىگى 5-تارماعى جانە 99-بابىنىڭ 1-بولىگى بويىنشا ءتۇستى. سوت وتىرىسىندا پروكۋرور سوتتالۋشىعا جاڭا ايىپ تاقتى. ناتيجەسىندە ەر ادام ق ر قىلمىستىق كودەكسىنىڭ 99-بابىنىڭ 2-بولىگى 10-تارماعى بويىنشا، ياعني، باسقا قىلمىستى جاسىرۋ ماقساتىندا ادام ولتىرگەنى ءۇشىن سوتتالدى. پروكۋرور 18 جىل سۇرادى، الايدا سوت جاسالعان قىلمىستىڭ اۋىر بولعانىن ەسكەرە وتىرىپ، ەر ادامدى 19 جىلعا سوتتادى"، - دەدى سۋديا ساميددين تەمىرالييەۆ.

ءىس ماتەريالدارىنا سۇيەنسەك، سوتتالۋشى بيىلعى جىلدىڭ قاڭتارىندا ايگەرىم تاسبولاتوۆا ەسىمدى 24 جاستاعى قىزدىڭ بار اقشاسىن سىپىرىپ الىپ، ارتىنشا سوققىعا جىعىپ، ءولتىرىپ كەتكەن. 

مارقۇمنىڭ جاقىندارى تاكسي جۇرگىزۋشىسى قىزدىڭ بانكوماتتان اقشا العانىن كورىپ، اڭدىپ، كولىگىنە وتىرعىزىپ، بۇل قىلمىسقا قاساقانا بارعان دەپ بولجاپ وتىر. قىزدىڭ ءمايىتى ەكى اپتاعا دەيىن تابىلماعان. 

قايتىس بولعان قىزدىڭ تۋىستارى سوتتىڭ شىعارعان ۇكىمىنە نارازى. ولاردىڭ ويىنشا قىلمىسكەر 25 جىلعا قامالۋى ءتيىس.