بۇگىن Halyk قارجى توبىنىڭ 2018 جىلدىڭ 1 توقسانىنداعى قىزمەتىنىڭ قورىتىندىسىنا ارنالعان باسپا ءسوز جيىنىندا «قازاقستان حالىق بانكى» اق باسقارما ءتورايىمى ءۇمىت شاياحمەتوۆا Qazkom مەن Halyk-تى بىرىكتىرۋ پروسەسىنىڭ بارىسىمەن تانىستىردى، دەپ حابارلايدى Qamshy.kz اقپارات اگەنتتىگىنىڭ ءتىلشىسى. شاياحمەتوۆانىڭ ايتۋىنشا، Qazkom جانە Halyk bank قىزمەتكەرلەرىنىڭ سانى قىسقاراتىن بولادى.
الايدا بانكتىڭ باسقارما ءتورايىمى «قازكومدىق» قىزمەتكەرلەردى قىسقارتىپ، «حالىقتىق» قىزمەتكەرلەردى قالدىرامىز دەگەن تۇسىنىكتەن ارىلۋدى ەسكەرتتى. قازىرگى ۋاقىتتا ەكى بانكتە دە جاڭا قىزمەتكەرلەردى قابىلداۋ تۋرالى موراتوريي ءجۇرىپ جاتىر.
– ءبىز تەك مىقتى مامانداردى تاڭدايمىز. قازىردە ەكى بانكتە دە موراتوريي ءجۇرىپ جاتىر. ءبىر قىزمەتكەر جۇمىستان شىعادى، ەكىنشىسى كوشىپ بارادى. وسىلايشا ەكى بانكتىڭ قىزمەتكەرلەرى قىسقارعانىمەن بوس ورىندار قىسقارمايدى. بۇل موراتوريي ەكى بانك قوسىلعان ۋاقىتقا دەيىن جالعاساتىن بولادى. ول ۋاقىتتا ءبىز قىسقارعان قىزمەتكەرلەردىڭ سانىن قارايمىز، سودان ناتيجە شىعارامىز. ال كاسسيرلەر، مەنەدجەرلەر (زاڭدى جانە جەكە تۇلعا بويىنشا) بولىمدەرى ساقتالادى. ءارى ينتەرنەت-بانكينگ، ساتۋدىڭ ديستانسيالىق بولىمدەرى، بانكوماتتىق جەلى، POS-تەرمينالدارى، call-ورتالىقتارىنىڭ باعىتتارى كوبەيەدى. ەگەر اتالمىش باعىتتار بويىنشا قازىرگى ۋاقىتتا 80 ادام جۇمىس ىستەسە، بىرىككەن كۇنى 540-قا دەيىن جەتەدى. سەبەبى ول ۋاقىتتا قوڭىراۋلار كوپ شالىناتىن بولادى، سۇراقتار دا كوبەيەدى، ءبىز ونى تۇسىنەمىز، – دەيدى ءۇمىت شاياحمەتوۆا.
بۇعان قوسا ەكى بانك بىرىككەن كۇنى قىسقارتۋ پروسەسى بىردەن بولمايدى. ءبارى كەزەڭ-كەزەڭىمەن جۇزەگە اسادى. الايدا بانكتەر بىرىككەنىمەن باستى برەند بىرەۋ، ول – Halyk bank. شاياحمەتوۆانىڭ ايتۋىنشا، مۇنداي پروسەستىڭ وزىندە جۇمىس بارىسى بۇرىنعىشا جالعاساتىن بولادى. كليەنت Qazkom-داعى ءوزىنىڭ ۇيرەنشىكتى بولىمشەسىنە بارىپ، مەنەدجەر وعان ەش قيىندىقسىز قىزمەت كورسەتەدى. تەك ءبىرىڭعاي جۇيە قالىپتاسادى. ماسەلەن Xalyk پەن Qazkom تاريفتەرى ءارتۇرلى دەڭگەيدە. Qazkom-نىڭ كوميسسياسى Halyk-تان تومەن. وندايدا Halyk bank ءوز تاريفتەرىنىڭ دەڭگەيىن تومەندەتەدى، شىعىن دا ازايادى. ەسەسىنە كليەنتتەر ءۇشىن قىزمەت اياسى كەڭەيەدى.
– دەپوزيتتەر تۇرعىسىنان ەشتەڭە وزگەرمەيدى، ءبارى سول قالپىندا قالادى. Qazkom تاراپىنان جۇيە قالىپتاسقانىمەن، باستىسى Halyk بازاسىنا تيەسىلى، – دەدى شاياحمەتوۆا.
سونىمەن قاتار فيليالدارى جاعىنان دا قىسقارتۋلار بولادى. بۇل پروسەس تە جۇيەلى تۇردە جۇزەگە اسادى. ال بانك كليەنتتەرىنىڭ ارتۋى نەمەسە كەمۋى قاداعالانىپ وتىرادى.
شاياحمەتوۆا بانكتەردىڭ بىرىگۋىنەن ۇركۋدىڭ قاجەتى جوق دەيدى. بۇل ءۇردىس كليەنتتەر ءۇشىن دە، بانك قىزمەتكەرلەرى ءۇشىن دە ءتيىمدى بولاتىنىنا سەندىردى. ال Qazkom مەن Halyk 2018 جىلدىڭ ەكىنشى جارتىسىندا تولىعىمەن بىرىگىپ، ەكەۋىنە ورتاق جاڭا ستراتەگيا قالىپتاسادى.
بۇعان قوسا ءۇمىت شاياحمەتوۆا حالىق بانكتىڭ 2018 جىلدىڭ 1 توقسانىنداعى قارجىلىق ناتيجەلەرىنە توقتالىپ ءوتتى.
ماسەلەن، Qazkom-نىڭ كورسەتكىشتەرىن ەسكەرە وتىرىپ Halyk توبىنىڭ تازا كىرىسى 2018 جىلدىڭ 1 توقسانى ءۇشىن 62،1 ملرد تەڭگەنى قۇرادى. بۇل 2017 جىلعى 4 توقساننىڭ ناتيجەسىنەن 63،1 پايىزعا اسىپ تۇر. Qazkom-نىڭ تازا كىرىسى 2018 جىلدىڭ 1 توقسانى ءۇشىن 32،9 ملرد تەڭگەنى قۇرادى.
ال قىزمەتتەر مەن كوميسسيالار بويىنشا كىرىستەر 2017 جىلدىڭ 4 توقسانىمەن سالىستىرعاندا 8،3 پايىزعا تومەندەگەن. وزگە پايىزدىق ەمەس كىرىستەر 2018 جىلدىڭ 1 توقسانى ءۇشىن 10،2 پايىزعا – 43،3 ملرد تەڭگەگە دەيىن تومەندەدى.
