وقۋشىلار سارايىنىڭ الدىنداعى الاڭدا مەدەۋ اۋدانىنىڭ اكىمى ەرجان جىلقىبايەۆتىڭ كەزەكتى كوشپەلى قوعامدىق كەزدەسۋى ءوتتى. ءىس-شارا بيلىك پەن حالىقتىڭ اراسىنداعى بايلانىستى نىعايتۋ، كۇندەلىكتى ماسەلەلەردىڭ دۇرىس شەشىمىن تابۋ جانە اۋداندا اتقارىلىپ جاتقان جۇمىستارمەن تۇرعىنداردى تانىستىرۋ ماقساتىن كوزدەءدى. قوعامدىق قابىلداۋعا مەدەۋ اۋدانىنىڭ اكىمى، اۋدان اكىمىنىڭ ورىنباسارلارى، الماتى قالاسىنىڭ باسقارما وكىلدەرى، جەرگىلىكتى پوليسيا قىزمەتىنىڭ وكىلدەرى، سونىمەن قاتار مەدەۋ اۋدانى بويىنشا توتەنشە جاعدايلار ءبولىمى، «نۇر وتان» پارتياسىنىڭ اۋداندىق فيليالى، اۋداندىق ءبىلىم بەرۋ ءبولىمى، اۋداندىق حالىققا قىزمەت كورسەتۋ ورتالىعى مەن باسقا اۋداندىق قۇرىلىم وكىلدەرى قاتىستى.
– كوشپەلى قوعامدىق قابىلداۋ بيلىك پەن حالىقتىڭ اراسىنداعى بايلانىستى نىعايتۋدىڭ، حالىقپەن تىعىز قارىم-قاتىناس جاساۋدىڭ ءتيىمدى ءتاسىلى. بۇل ىزگى شارانى تۇرعىندارمەن تىعىز بايلانىس جاساۋ، قوعامعا اشىقتىعىمىزدى كورسەتۋ ماقساتىندا ۇيىمداستىرامىز. كوبىنەسە ازاماتتار اۋداندىق قۇرىلىم وكىلدەرىن كابينەتتەرىنەن تابا الماي جاتاتىن جاعدايلار بولادى عوي. ال بۇل ءىس-شارادا اۋداندىق قۇرىلىم وكىلدەرى جۇرتشىلىقپەن جۇزدەسىپ، تۇرعىنداردى تولعاندىرعان وزەكتى ماسەلەلەردى شەشۋ ءۇشىن حالىقتىڭ الدىنا وزدەرى بارادى. حالىققا اشىقتىعىمىزدى كورسەتەتىن بۇل تاجىريبەنى ەنگىزگەنىمىزگە ەكى جىل بولدى. وسى ۋاقىت ارالىعىندا ەكى جارىم مىڭ ادامدى قابىلدادىق. شارا شەڭبەرىندە اۋدان تۇرعىندارىن مازالاعان ماسەلەلەردىڭ 90 پايىزدان استامى شەشىمىن تاپتى. جالپى، اۋدان تۇرعىندارىن سۋ، جارىق، جول، اۋلالاردى جوندەۋ ماسەلەلەرى تولعاندىرادى. 2 جىلدا اۋدانىمىزدا 2،5 ملرد. تەڭگەگە 200 اۋلا جوندەۋدەن وتكىزىلدى. مەدەۋ اۋدانىنداعى 512 اۋلانىڭ 300-دەن استامىنا ەكى جىلدا جوندەۋ جۇمىستارى جۇرگىزىلىپ، رەتكە كەلتىرىلەدى. بۇگىنگى تاڭدا 30 مىڭ حالىق تۇراتىن «دۋمان» ىقشاماۋدانىن سۋمەن، كارىز جۇيەسىمەن قامتاماسىز ەتۋ جۇمىستارىن بيىلعى جىلدىڭ سوڭىنا دەيىن بىتىرەمىز. بيىل اۋدانداعى 65 كوشەگە جارىق جۇيەسىن جۇرگىزۋ جوسپارلانعان. مەملەكەتتىك ورتالىق مۇراجايى سكۆەرى مەن جۋرناليستەر سكۆەرى، سونىمەن قاتار، اۋدانىمىزداعى 22 جول جوندەۋدەن وتكىزىلەدى. ءبىز كوشپەلى قوعامدىق قابىلداۋعا كەلگەن اۋدان تۇرعىندارىنىڭ وتىنىشتەرىن مۇقيات تىڭداپ، تۇيتكىلدى ماسەلەلەردىڭ شەشىمىن تابۋعا تىرىسامىز. شارا بارىسىندا بۇگىنگى تاڭدا اۋداندا اتقارىلىپ جاتقان ىرگەلى ىستەرىمىز تۋرالى جۇرتشىلىققا جان-جاقتى اقپارات بەرۋدى ماقسات قىلامىز. جىلدىڭ سوڭىنا دەيىن بارلىق ىقشاماۋدانداردا قوعامدىق قابىلداۋ وتكىزىپ، اۋدان تۇرعىندارىنىڭ تىلەگىن تىڭدايمىز. كەلەسى كەزەكتى قوعامدىق قابىلداۋ ماۋسىم ايىندا №2 ەمحانادا وتكىزىلەتىن بولادى. كوشپەلى قوعامدىق قابىلداۋ وتەتىندىگى تۋرالى تۇرعىندارعا الدىن-الا ينستاگرام ارقىلى ۇنەمى حابارلاپ وتىرامىز، – دەدى مەدەۋ اۋدانىنىڭ اكىمى ەرجان جىلقىبايەۆ.
كوشپەلى قوعامدىق قابىلداۋعا ارنايى كەلگەن ادامداردىڭ اراسىندا «دۋمان» ىقشاماۋدانىنىڭ تۇرعىنى راحىمحان نۇپتەكەيەۆ تە بار.
– «دۋمان» ىقشاماۋدانىندا №172 مەكتەپ-گيمنازياسى بار. نەگىزى مىڭ وقۋشى ءبىلىم الۋعا لايىقتالعان وقۋ ورنىندا بۇگىنگى تاڭدا 2100 شاكىرت وقىپ ءجۇر. «دۋمانداعى» حالىق سانى كۇننەن-كۇنگە ۇلعايۋدا. مەكتەپتەگى وقۋشىلار سانى دا جىلدان-جىلعا ارتىپ كەلەدى. وسىعان بايلانىستى 3 جىلدان بەرى ىقشاماۋدانىمىزدىڭ تۇرعىندارى اۋدان باسشىلىعىنا تاعى ءبىر مەكتەپ سالىپ بەرۋ تۋرالى ءوتىنىش ايتىپ ءجۇر. نەگىزى، قالا اكىمى مەن اۋدان اكىمىنىڭ تۇرعىندارمەن ەسەپتىك كەزدەسۋىندە بۇل ماسەلە ايتىلعان بولاتىن. مەن «دۋمانداعى» ارداگەرلەر كەڭەسىنىڭ ءتوراعاسىمىن. بۇل كوشپەلى قوعامدىق قابىلداۋعا تۇرعىنداردىڭ تىلەگىن ارقالاپ كەلگەندىكتەن، اۋدان باسشىسىمەن تىكەلەي تىلدەستىم. اۋدان اكىمى مەكتەپتىڭ جانىنا سالىناتىن قوسىمشا عيماراتتىڭ قۇرىلىسى بيىل باستالىپ، كەلەسى جىلى اياقتالاتىنىن ايتتى. دۋماندىقتاردى قۋانىشقا بولەيتىن بۇل كۇندى ءبارىمىز اسىعا كۇتەتىن بولامىز، – دەيءدى اتالعان ىقشاماۋداندا تۇراتىن ارداگەر.
ال اۋداننىڭ ەندىگى ءبىر تۇرعىنى گۇلجان راحمانبەكوۆا بالالاردىڭ قاۋىپسىزدىگىنە بايلانىستى مازالاعان ماسەلەسىن جەتكىزدى.
– مەن وقۋشىلار سارايىنىڭ جانىنداعى كوپقاباتتى ۇيلەردىڭ بىرىندە تۇرامىن. كۇندە كەشكە وتباسىمىزبەن بىرگە وقۋشىلار سارايىنىڭ الدىنداعى الاڭدا سەرۋەندەۋدى ۇناتامىز. اۋدان تۇرعىندارى دا وسى جەرگە كەلىپ، تابيعات اياسىندا تازا اۋادا تىنىعادى. كەيبىرەۋلەر تۇمىلدىرىقسىز يتتەرىن ەرتىپ قىدىرىپ جۇرەدى. شىنىن ايتقاندا، ءبىز بالا-شاعامىزدىڭ ءقاۋىپسىزدىگىنە قاتتى الاڭدايمىز. كەيبىر الىپ دەنەلى يتتەردىڭ يەلەرى «ول تىستەمەيدى، قورىقپاڭىزدار» دەپ بىزگە كەپىلدىك بەرسە دە، ول ءبارىبىر جانۋار ەمەس پە؟ ءارى يت ءجۇرىپ وتكەن جەر تازا بولماۋى دا مۇمكىن، ول جەرلەردە بالالاردى ويناتقىمىز كەلمەيدى. وسى ماسەلەگە بايلانىستى ءتيىستى شارالار قولدانۋ قاجەتتىگى تۋرالى وتىنىشپەن كەلدىم، – دەيدى اۋدان تۇرعىنى.
شارا شەڭبەرىندە تۇرعىندار تىلەگى تىڭدالدى. تۇسكەن وتىنىشتەرگە ءتيىستى جاۋاپتار بەرىلدى.
پىكىر قالدىرۋ