تانىمال ءانشى اقبوتا كەرىمبەكوۆا DAT باسىلىمىنا سۇحبات بەرىپ، قازىرگى ەسترادا تۋرالى ويىمەن ءبولىستى.
ءانشى "بۇگىنگى شوۋ-بيزنەسكە مۇلدە كوڭىلىم تولمايدى. قارنىڭدى اشىتاتىن دۇنيەلەر وتە كوپ. قولىما بيلىك تيسە، ونەردى دارىنسىزداردان تازارتامىن" دەپ ايتقانىن مويىنداعان.
"ءيا، كوڭىلىم مۇلدەم تولمايتىن دارىنسىزدارعا ناليتىنىم – شىندىق. ءقازىر ولاردىڭ اتىن اتاپ، ءتۇسىن تۇستەمەي-اق قويايىن. ءتىپتى بالا-شاعامىزعا دەيىن بىلەدى: كىمنىڭ ونەرلى يا كىمنىڭ قاراجاياۋ ەكەنىن. سوڭعى كەزدە قولدى ءبىر سىلتەپ، ساحنادان، ونەردەن كەتىپ كالعىم كەلەدى"، - دەيدى كەرىمبەكوۆا.
ول بۇگىنگى كۇنى ايتىلاتىن اندەردىڭ ساپاسى، ماعىناسى، مازمۇنى تىم جەڭىل ەكەنىن ايتادى.
"الدە حالىقتىڭ تالعام دەڭگەيى تومەن ءتۇسىپ كەتتى مە دەپ ويلايسىڭ. دەگەنمەن، اركىمنىڭ ءوز پىكىرى، ءوز كوزقاراسى بار: ونىمەن دە ساناسقىڭ كەلەدى. ءبىراق، شىنى كەرەك، ونەردىڭ ءقادىرى كەتتى: قاراپ وتىرساڭىز، ەرىككەننىڭ ءبارى ءانشى"، - دەدى ول سۇحباتىندا.
سونداي-اق، ول ەسترادادا جۇرگەن انشىلەردى دارىنسىزدار دەپ، سىن ساداعىنا العان.
"ەسترادادا جۇرگەن انشىلەردىڭ 80 پايىزى دارىنسىزدار دەپ تولىقتاي ايتا الامىن. بۇل – مەنىڭ جەكە پىكىرىم. جالپى، ونەر – تازا دۇنيە، كىرشىكسىزدىكتى قاجەت ەتەدى. بىزدە ونەر سالاسىن زەرتتەيتىن، ب ا ق ارقىلى ويىن ايتىپ وتىراتىن سىنشى جوق. شىندىقتى بەتكە ايتاتىن ساراپشى جوق: تەك كىمنىڭ پايداسى بار، كىمنىڭ قولىنان نە كەلەدى – سونىڭ ارتىنان ءجۇرىپ، پايداسىن كورىپ، سول ادامعا جاعىنىپ قالسا – بولدى. ونەردىڭ بويىنداعى تەكتىلىك جوعالىپ، بولشەكتەنىپ، ۇساقتالىپ بارادى"، - دەيدى ءانشى.
اقبوتا كەرىمبەكوۆا جاستارعا سىن ايتقان سوڭ، كەيىن باسقالارىنا جەككورىنىشتى بولىپ كەتەتىنىن دە جاسىرمادى.
"جاستارعا سىن ايتساڭ، تاعى دا بالەگە قالاسىڭ. اقىرىندا جەك كورىنىشتى بولىپ، جەكسۇرىن اتاناسىڭ. بۇگىندە اقىل تۇرماق، بىرۋگە جاقسىلىق جاساساڭ دا، بالەگە قالاسىڭ. قورقاتىنىم – بالالارىمنىڭ، وسكەلەڭ ۇرپاقتىڭ تاعدىرى قالاي بولماق؟"، - دەپ اقتارىلدى ءانشى.
بيىلعى جىلدان باستاپ انشىلەردىڭ ءوز ونەرى ءۇشىن سالىق تولەيتىنى تۋرالى دا اقبوتا ءوز ويىن بىلدىرگەن.
"ەندى نە ىستەيمىز؟ ايتقان ەكەن – اقىرى سالىق تولەۋگە تۋرا كەلەدى. ۇكىمەتتىڭ جاعدايى قيىن ەكەن... ايتىپ وتىرمىن عوي، تەلەارنا بولسىن، جۋرناليستەر بولسىن – ءبارى بىزگە قاراپ وتىر. انشىلەر بولماسا، ءبارى تاقىر كەدەي بولاتىن ءتۇرى بار... ەندى، مىنە، ۇكىمەتتىڭ جاعدايىن ويلايىق دەپ، سالىق تولەۋدى باستايمىز"، - دەيدى كەرىمبەكوۆا.
سونىمەن قاتار، ول ءوزىنىڭ ءالى جاس ەكەنىن، ءوز جانىن تۇسىنەتىن ەر-ازامات كەزدەسسە، ءالى دە 5-6 بالا تابۋعا مۇمكىندىگى بار ەكەنىن ايتقان.
"راس، كوپ بالالى انا بولۋدى ارماندايمىن. كىشكەنە جاعدايىمدى رەتتەپ السام، 2–3 بالانى اسىراپ الۋ دا ويىمدا بار"، - دەدى ءانشى ءسوز سوڭىندا. abai.kz
