كحدر كوشباسشىسى كيم چەن ىن پەكينگە باردى. جاپونيالىق Nihon Television Network تەلەكومپانياسىنىڭ جۋرناليستەرى ونىڭ ۇشاقتان ءتۇسىپ جاتقانىن ءتۇسىرىپ العان.

Flightradar24 پورتالىنىڭ مالىمەتىنشە، پەكيننىڭ اۋەجايىنا كەلىپ توقتاعان ۇشاق سولتۇستىك كورەيالىق مەملەكەتتىك "كورە" اۆياكومپانياسىنا تيەسىلى. ءدال وسى ۇشاقپەن كيم چەن ىن وتكەن اپتادا سينگاپۋرعا اقش پرەزيدەنتى دونالد ترامپپەن كەزدەسۋگە بارعان بولاتىن.

الدىن الا جاسالعان بولجام بويىنشا، كيم چەن ىن جۇڭگو كوشباسشىسى سي جين پيڭمەن اقش-كحدر ءسامميتىن تالقىلاۋ ءۇشىن كەزدەسەدى. ايتا كەتەيىك، اقش پەن سولتۇستىك كورەيا اراسىنداعى سامميت 12 ماۋسىمدا ءوتتى. ال سينحۋا اگەنتتىگىنىڭ مالىمەتىنشە، كيم چەن ىن  مەن سي جين ءپيڭنىڭ كەزدەسۋى 19-20 ماۋسىمدا وتەدى.

كحدر باسشىسى جۇبايىمەن بىرگە قىتايدا ناۋرىزدىڭ 25-28 ارالىعىندا بولىپ قايتقان. بۇل ونىڭ سولتۇستىك كورەيا بيلىگىن قولىنا 2011 جىلى العاننان كەيىنگى العاشقى مەملەكەتتىك ساپارى بولدى. الايدا ول ساپارى جايلى كەزدەسۋ اياقتالعان سوڭ حابارلانعان ەدى. ەكىنشى رەت كيم چەن ىن مەن سي جين پيڭ 7-8 مامىردا كەزدەستى .