جۋىردا استانادا ءبىر ۇلكەن كونفەرەنسيا بولىپ، سونىڭ جۇمىسىنا الماتىدان ءبىر توپ عالىمدار قاتىستى. شاراعا قاتىسقانداردىڭ 99،9 پايىزى قازاقتار. از با، كوپ پە ءبارى دە انا ءتىلىن بىلەدى. الايدا الماتىدان كەلگەن عالىمدارىمىزدىڭ ءبارى، سونىڭ ىشىندە ءۋاليحان قاليجان باستاپ، سوزدەرىن بىر-ەكى اۋىز سوزبەن قازاقشا باستاپ، باياندامالارىن تۇپ-تۇگەل ورىسشا وقىپ بەردى. ودان كەيىن ءسوز العان اكادەميك ابدىمالىك نىسانبايەۆ ءتىپتى «قاتىردى». ول ءوزىنىڭ ءسوزىن قازاقشا باستاۋعا دا جاراماي، سىپىرا ورىسشا سويلەپ شىقتى. تەك ءسوزىنىڭ سوڭىندا «ال ەندى رۇقسات ەتسەڭىزدەر بىر-ەكى اۋىز ءسوزدى قازاقشا ايتايىن» دەپ ءبىر اۋىز بىردەڭە ايتتى. قايران، باسقا ءسىڭىپ قالعان جالتاقتىق-اي دەسەڭىزشى، سونىڭ ءوزىن باسقالار تۇسىنبەي قالدى ما دەپ اۋدارعىسى كەلىپ، سيپاقتاپ تۇردى. مىنە، الماتىلىق اعايىنداردىڭ، اتا ساقالى اۋزىنا تۇسكەن اقساقالدارىمىز دەگەندەردىڭ ۇلگىسى وسىنداي. ولار مەملەكەتتىڭ استاناسىنا كەلىپ، مەملەكەتتىك تىلدە سويلەۋگە رۇقسات سۇرايدى ەكەن... وسىنداي «اقساقالدارىمىز» بولعان سوڭ دا قازاق ءتىلى قارىشتاي الار ما؟ كىنا جاستاردا ەمەس، باستارىنا قۇلدىق سانا ءسىڭىرىلىپ قالعان وسىنداي شال-شاۋقاندارىمىزدا ەكەنىن ۇمىتپايىقشى. جالپى، الماتى تاۋەلسىزدىكتىڭ تۇعىرىن بەكىتۋدە جالتاقتىققا ۇرىنىپ، ارتتا قالعان. ونى باسقا مىسالداردان دا كورىپ ءجۇرمىز. الدە، رەسپۋبليكانىڭ استاناسى بولىپ، بارلىق شوۆينيستەردەن كۇشىگىنەن تالانعاندىقتىڭ كەسىرى مە ەكەن؟ كەرىسىنشە، استانادا تاۋەلسىزدىك رۋحى بار. بىردە سەرگەي گروموۆ باستاعان «نۇروتاندىقتار» حالىققا قىزمەت كورسەتۋ ورتالىقتارىن (حقكو) ءبىر ساباپ الماقشى بولىپ، جينالىس وتكىزىپ جاتتى. سوندا ءبىر حقكو-نىڭ باسشىسى گروموۆتىڭ وزىنە قادالىپ تۇرىپ، جاعدايدى تەك قازاقشا ساقىلداتىپ ايتىپ بەردى. جاڭا عانا جالىن كۇدىرەيتىپ وتىرعان اناۋ كوزىن جىپىلىقتاتىپ، اۋزىن دا اشا الماي وتىرعاندى ءبىلدى. ال مىنا جىگىت «تۇسىنبەسەڭ – ول سەنىڭ پروبلەماڭ» دەگەندەي بارلىق ءسوزىن قازاقشا ايتىپ ءبىتىردى دە، «ال ەگەر سۇراق بولماسا مەن اياقتادىم» دەپ قاسقيىپ بارىپ ورنىنا وتىردى. ءبىر ادام («نۇروتاندىقتاردىڭ» كوبى ورىس تىلدەس بولسا كەرەك) نەگە مەملەكەتتىك تىلدە سويلەيسىڭ دەپ اۋزىن اشىپ قارسىلىق بىلدىرە المادى، نە بىزگە ورىسشا ايت دەي المادى. مىنە، مەملەكەتتىك ءتىلدىڭ قۇدىرەتىن بىلمەيتىندەردىڭ الدىندا وسىلاي قولدانۋ كەرەك قوي، سوندا ونى تۇسىنۋگە تىرىساتىندار كوبەيەر ەدى... ال انا جىگىتكە جۇمىسىڭدا كەمىستىك بار ەكەن دەپ تە ەشكىم اۋزىن اشا الماي قالدى...

تارعىن اسانوۆ، فعك، دوسەنت.