تۇركىستان وبلىسىنىڭ اكىمى جانسەيىت تۇيمەبايەۆ جۇمىس ساپارىمەن كەلەس اۋدانىنا باردى. وندا اۋەلى دوستىق ەلدى مەكەنىندەگى «نۇرلى جەر» باعدارلاماسى بويىنشا اتقارىلىپ جاتقان جۇمىستارمەن تانىستى. وندا قازىرگى تاڭدا تۇرعىن ءۇي قۇرىلىسى ءۇشىن 69 گەكتار اۋماق قارالىپ، ينفراقۇرىلىم جۇيەسى قاراستىرىلۋدا. كەيىن ءوڭىر باسشىسى جۇزىمدىك اۋىلدىق وكرۋگىندە ورنالاسقان كەلەس وزەنىندەگى ويماۋىت سۋ بوگەتىنە تۇراقتاپ، ونداعى نىساننىڭ جاعدايىنا قانىق بولدى.

وبلىس اكىمى باستاعان ساپار جۋانتوبە ەلدى مەكەنىندەگى «تم-ستروي-21» ءجشس-نىڭ پرەسس ءجىپ ءيىرۋ جانە قىش زاۋىتتارىنىڭ جۇمىستارىمەن تانىسۋمەن جالعاستى. جوبانىڭ جالپى قۇنى – 250 ملن. تەڭگە، ءوندىرىس ورنى جىلىنا 1000 توننا پرەسس ءجىبىن دايىندايدى. ال جوبالىق قۇنى 160 ملن.تەڭگەنى قۇرايتىن قىش زاۋىتىنىڭ جىلدىق قۋاتتىلىعى 32،4 ملن. دانانى قۇراماق. بيىل قۇرىلىسى باستالعان ءوندىرىس ورنى 2020 جىلى تولىق ىسكە قوسىلادى.
كەلەس اۋدانىنا رەسمي ساپار اياسىندا ايماق باسشىسى وشاقتى اۋىلدىق وكرۋگىندەگى 600 ورىندىق №105 قوڭىرتوبە جالپى ورتا مەكتەبىنىڭ اشىلۋ سالتاناتىنا قاتىستى. ايتۋلى شارادا ءسوز العان وبلىس اكىمى جەرگىلىكتى جۇرتتى جاڭا نىساننىڭ اشىلۋىمەن قۇتتىقتادى. 

«ەلباسىمىز نۇرسۇلتان ءابىش ۇلى: «كەز – كەلگەن ەل ءوزىنىڭ كەلەشەگىن وسكەلەڭ ۇرپاعىمەن بايلانىستىرادى» دەپ اتاپ وتكەندەي، مەملەكەتىمىز بالا تاربيەسى مەن ونىڭ ءبىلىم الۋىنا ۇلكەن ءمان بەرىپ، جان-جاقتى جاعداي جاساۋدا. ماسەلەن، بيىل وبلىس بويىنشا رەسپۋبليكالىق جانە وبلىستىق بيۋدجەت ەسەبىنەن 18،4 ملرد. تەڭگەگە 90 مەكتەپتىڭ قۇرىلىسى جۇرگىزىلۋدە. ونىڭ ىشىندە سارىاعاش اۋدانىندا 19 مەكتەپتىڭ قۇرىلىسى باستالدى. جىل قورىتىندىسىمەن وبلىس بويىنشا 45 ءبىلىم ورداسى پايدالانۋعا بەرىلەتىن بولادى. ونىڭ ىشىندە 15 مەكتەپ «نۇرلى جول» مەملەكەتتىك باعدارلاماسى اياسىندا سالىنۋدا. ونىڭ 5ء-ى كەلەس اۋدانىنىڭ ۇلەسىندە. جاڭا وقۋ جىلىنىڭ قارساڭىندا 600 ورىندىق مەكتەپتىڭ جاڭا عيماراتى پايدالانۋعا بەرىلگەلى وتىر. وسى ءبىلىم ۇياسىنان ەلگە قىزمەت ەتەر ازاماتتار تاربيەلەنىپ شىعا بەرسىن»، - دەدى جانسەيىت قانسەيىت ۇلى. 

ساپار سوڭىندا وبلىس اكىمى قوشقاراتا اۋىلدىق وكرۋگىندەگى «قاينار» ءجشس-نىڭ تىڭ جوباسىمەن تانىستى. جوبانىڭ نەگىزگى باعىتى - قىمىز ءوندىرۋ جانە ات سپورتىن دامىتۋ. بۇگىندە سەرىكتەستىك جالپى سانى 50 ساۋىندى بيەدەن كۇنىنە 150-200 ليتر قىمىز ءوندىرىپ وتىر.