"ارسەلورميتتال تەمىرتاۋ" اق ءىرى ونەركاسىپتىك كاسىپورنى العاشقىلاردىڭ ءبىرى بولىپ ەل پرەزيدەنتىنىڭ جالاقىنى كوتەرۋ تۋرالى باستاماسىن قولدادى دەپ حابارلايدى Qamshy.kz اقپارات اگەنتتىگى. 

2019 جىلدىڭ 1 قاڭتارىنان باستاپ كومپانيا قىزمەتكەرلەرىنىڭ تاريفتەرى مەن جالاقىلارى 8-10% كوتەرىلەتىن بولادى. سونىمەن قاتار ۇجىمدىق كەلىسىمگە سايكەس كومپانيا قىزمەتكەرلەرىنىڭ جالاقىسى 2018 جىلدىڭ قۇنسىزدانۋ دەڭگەيىنە ساي 50% شاماسىندا يندەكساسيالاناتىن بولادى.

بۇل تۋرالى «ارسەلورميتتال تمد» كومپانياسىنىڭ باس ديرەكتورى پارامجيت كالون 26 قازان، جۇما كۇنى حابارلادى.

- سىزدەر پرەزيدەنتىمىزدىڭ قازاقستانداعى ەڭ تومەنگى جالاقىنىڭ 2019 جىلدىڭ 1 قاڭتارىنان باستاپ كوتەرىلەتىنى جايلى ايتقانىن بىلەسىزدەر. ءبىز نۇرسۇلتان نازاربايەۆتىڭ ءوزىنىڭ العاشقى ەڭبەك جولىن مەتاللۋرگ رەتىندە ءبىزدىڭ كومبيناتتان باستاعاندىعىن ماقتان تۇتامىز. ءبىز مەملەكەت باسشىسىنىڭ ەڭ تومەنگى جالاقىنى كوتەرۋ جونىندەگى باستاماسىن العاشقىلاردىڭ ءبىرى بولىپ قولدادىق. بۇل شەشىم ۇجىمدىق تۇردە قابىلداندى.

قىزمەتكەرلەردىڭ جالاقىسىن كوتەرۋ «ارسەلورميتتال تەمىرتاۋ» كومپانياسىنىڭ بارلىق قۇرىلىمدىق بولىمشەلەرى مەن ەنشىلەس كومپانيالارىن قامتيتىن بولادى.

بۇدان وزگە 2019 جىلدىڭ 1 توقسانىندا كومپانيا ءوزىنىڭ وندىرىستىك ناتيجەلەرىنە ساي 13 جالاقىنى تولەيتىن بولادى.

پارامجيت كالون 2019 جىلدىڭ 1 قاڭتارىنان باستاپ "ارسەلورميتتال تەمىرتاۋ" اق زياندى جۇمىس جاعدايىندا قىزمەت اتقاراتىن قىزمەتكەرلەر ءۇشىن جاڭا ەڭ تومەنگى جالاقى كولەمى سالالىق كوەففيسيەنت ەسەبىمەن 77 000 مىڭنان استام تەڭگەنى قۇرايتىن بولادى - دەپ اتاپ ءوتتى.