ق ر ۇلتتىق بانكتىڭ  ەكس-توراعاسى گريگريي مارچەنكو مىرزا  "ەۋرازيالىق ەكونوميكالىق وداق ەلدەرى ورتاق ۆاليۋتالىق وداق قۇرۋعا مۇلدەم دايىن ەمەس"، دەپ ەسەپتەيدى. ول بۇل تۋرالى "روسسيا-24" ارناسىنا بەرگەن سۇحباتىندا مالىمدەگەن.

"مەنىڭ كوزقاراسىمدا ەۋرازيالىق ەكونوميكالىق وداققا مۇشە ەلدەردىڭ ەشقايسىسى دا ورتاق ۆاليۋتالىق وداق قۇرۋعا تولىق دايىن ەمەس. بۇل جايلى ءسوز قوزعاۋدىڭ ءوزى ءقازىر اقىلعا سىيىمسىز. وداققا مۇشە ەلدەردە ماكروەكونوميكالىق  پارامەترلەردى تولىق كەلىسىم-شارتتاردى تولىق ورىنداعاندا بارىپ ورتاق ۆاليۋتا تۋرالى ءسوز ەتۋگە بولادى. ءار ەلدە ورتالىق ۇلتتىق بانكتەر قۇرۋ، بانكتەردى باقىلايتىن ۇلتتىق ۇيىمدار قۇرۋ، ۆاليۋتانى قولما-قول اقشاسىزداندىرۋدا ەميتاسيا جاساۋ، سوسىن قولما-قول اقشاعا ەميتاسيا جاساۋ كەرەك. سوسىن بارىپ، ۆاليۋتانى ورتاق جاساۋعا بولادى. ال ءدال ءقازىر، ورتاق ۆاليۋتا قۇرۋ تۋرالى ءسوز ەتپەك تۇگىلى، ماڭايىنا دا جاقىن كەلە المايمىز"،-دەيدى گريگوريي مارچەنكو مىرزا.

ەكس-بانكيردىڭ ايتۋىنشا، ەۋرازيالىق وداققا مۇشە ەلدەردىڭ  ورتالىق ۇلتتىق بانكتەرى كوبىنەسە سەرىكتەستەردىڭ مۇددەلەرىنە ءمان بەرمەيدى. سونداي-اق، ەاەو ەلدەرى ورتاق قارجىلىق كوورديناسيا جاسالماعاندىقتان وداق اياسىنداعى ەلدەردە ديەۆالۆاسيا ورىن الىپ جاتىر.

"سەبەبى، وتكەن جىلدىڭ جەلتوقسانىندا رەسەيدە رۋبل ديەۆالۆاسياعا ۇشىرادى، بەلارۋسيادا سالىقتى 30 پايىزعا جوعارىلاتىپ جىبەردى. ال قازاقستان كۋرستى تۇراقتى ۇستاپ قالدى. وسى ورايدا كرىلوۆتىڭ "اققۋ، شورتان ءھام شايان" دەگەن مىسالىن ەسكە تۇسىرە كەتكەن ءجون بولار. ءبىزدىڭ وداقتاعى جاعدايىمىز ءدال وسى مىسالداعىداي بولىپ وتىر "،-دەيدى ەكس-توراعا.

مارچەنكونىڭ ايتۋىنشا، ەاەو اياسىندا ورتاق ۆاليۋتا قۇرۋ ءۇشىن ماكروەكونوميكالىق پارامەترلەردى، فيسكالدى ساياسات پەن ەڭبەك نارىعىندا ورتاق كەلىسىمدەر جاسالۋى كەرەك.

"ءبىز مۇلدە دايىن ەمەسپىز. ءبىزدىڭ ەلدەردە قارجى جۇيەلەرى دە مۇلدە باسقاشا قۇرىلعان. بىزدەگى بانك جۇيەلەرىندەگى قارجىلىق-نەسيەلىك ساياساتتا وزگەشە. سوندىقتان، ورتاق ۆاليۋتا تۋرالى ءسوز ەتۋگە ەرتە دەپ ەسەپتەيمىن"،-دەيدى مارچەنكو مىرزا.

نۇرزات توعجان