الماتى قالاسىندا ساتبايەۆ پەن سەيفۋللين كوشەلەرىنىڭ قيىلىسىندا ءورت شىقتى. اسحاناعا كەلۋشىلەردىڭ ايتۋىنشا، ءورت 14.20 شاماسىندا دارەتحاناعا جاقىن جەردە شىقتى. بۇل ۋاقىتتا عيماراتتا شامامەن 150 ادام بولدى. ولاردىڭ بارلىعى ەۆاكۋاسيالاندى. اسحانا تەرريتورياسى قورشاۋعا الىندى. ءتىلسىز جاۋدى اۋىزدىقتاۋعا بەس ءورت ءسوندىرۋ تەحنيكاسى جۇمىلدى. ءورت شىققان جەرگە قول جەتكىزۋ ماقساتىندا ءورت سوندىرۋشىلەر عيماراتتىڭ شاتىرىن الىپ جاتىر. سونىمەن قاتار، وقيعا ورنىندا جەدەل جاردەم بريگاداسى جۇمىس ىستەۋ ۇستىندە. دارىگەرلەردىڭ ايتۋىنشا، زارداپ شەككەن ادام جوق. ەشكىمگە مەديسينالىق جاردەم قاجەت بولمادى. ساتبايەۆ كوشەسى سەيفۋللين مەن ناۋرىزباي كوشەلەرىنىڭ ارالىعىندا جابىق تۇر.

 ەسكە سالايىق، وسىعان دەيىن الماتى وبلىسىنداعى تەحنيكالىق جوندەۋ ورتالىعىندا5 ءاۆتوموبيلدىڭ ورتەنىپ كەتكەنى حابارلانعان بولاتىن. ءورت 10 ساۋىردە ساعات شامامەن 20.00-دە قاينار اۋىلىندا شىقتى. 300 شارشى مەتردى شالعان ورتتەن ءبىر ادام زارداپ شەكتى. الدىن الا بولجام بويىنشا، الماتى وبلىسىنداعى ءورت ەلەكتر سىمدارىنان شىققان. ءورت شىققان كەزدە تجو قىزمەتكەرىنىڭ قولى كۇيىپ قالدى، وعان قاجەتتى مەديسينالىق جاردەم كورسەتىلدى. kaz.tengrinews.kz