الماتى قالاسىنىڭ مەدەۋ اۋدانىنداعى ەسەنوۆ كوشەسىنىڭ بويىندا ورنالاسقان №15ء-شى بەس قاباتتى تۇرعىن ءۇيدىڭ شاتىرىنان ءورت شىقتى. بۇل تۋرالى الماتى قالالىق توتەنشە جاعدايلار دەپارتامەنتىنىڭ باسپا ءسوز حاتشىسى نۇربەك قوجاحمەت حابارلادى.

ونىڭ ايتۋىنشا، تج دەپارتامەنتىنىڭ “101” كەزەكشى بولىمىنە ءورت تۋرالى حابار ساعات 20.06-دا كەلىپ تۇسكەن. “ارتىنشا، بارلىق ءورت ءسوندىرۋ بولىمدەرى وقيعا ورنىنا جونەلتىلدى. وندا ساعات 20.15-تە ءورت سوندىرۋشىلەردىڭ العاشقى بولىمشەسى كەلىپ جەتتى. ءتىلسىز جاۋ ساعات 21.24-تە اۋىزدىقتالىپ، ساعات 22-لەر شاماسىندا تولىعىمەن ءسوندىرىلدى. ونى جويۋعا 12 نەگىزگى جانە 10 ارنايى تەحنيكا مەن جەكە قۇرامنىڭ 90 ادامى جۇمىلدىرىلدى. ءورتتىڭ اۋماعى 1000 شارشى مەتر جەردى قۇرادى. وقيعا ورنىنان ءقاۋىپسىز اۋماققا 200-گە تارتا ادام كوشىرىلدى. قۇربان بولعاندار مەن زارداپ شەككەندەر جوق. ءقازىر ءورتتىڭ شىعۋ سەبەپتەرى انىقتالۋ ۇستىندە”، – دەدى نۇربەك قوجاحمەت. ايتا كەتەلىك، ءقازىر مەدەۋ اۋدانىنىڭ اكىمدىگى ادامداردى ۋاقىتشا باسپانامەن جانە ىستىق تاماقپەن قامتاماسىز ەتۋگە كۇش سالۋدا.