5 قاراشادا تۇنگى ساعات 00:50-دە شىمكەنت قالاسى قازىبەك بي كوشەسىندە ورنالاسقان وبلىستىق كلينيكالىق اۋرۋحاناسىنىڭ جان ساقتاۋ بولىمىنە اۋىر حالدە تۇسكەن 5 جاستاعى بالا قايتىس بولدى دەپ جازادى Qamshy.kz اقپارات اگەنتتىگى.

بۇل قۇجاتتى تانىمال زاڭگەر ايگۇل ورىنبەك ءوزىنىڭ فەيسبۋك پاراقشاسىنا جاريالادى. اتالمىش قۇجاتتاعى مالىمەتكە سۇيەنسەك وقيعا قاراشا نەمەسە جەلتوقسان ايىندا بولعان.  ال زاڭگەردىڭ ءوزى بۇل سوراقىلىقتىڭ وسىدان ءبىر اي بۇرىن بولعانىن ايتقان. 

تەكسەرۋ بارىسىندا بالا قايتىس بولعان كۇنى كەشكى ساعات 21:20-دا م.ر.امانگەلدى ەسىمدى 5 جاستاعى بالانى وگەي اكەسى قۇپتان نامازىنىڭ ازانىن دۇرىس شاقىرمادىڭ دەپ ايىپتاپ، سوققىعا جىققان. ءجاسوسپىرىمدى كەۋدە جانە ءىش تۇسىنان ۇرىپ-سوققاننان كەيىن بالا ەسىن جوعالتقان. جەدەل جاردەم وبلىستىق كلينيكالىق اۋرۋحاناعا جەتكىزىپ، دارىگەرلەر «ءىش جاراقىتى، ىشتەن قان كەتۋ» دياگنوزىن قويعان. كەلەسى كۇنى ساعا تۇنگى 00:40-تا م.ر.امانگەلدى جان تاپسىرادى.

اتالمىش ءىس بويىنشا اتىراۋ قالاسىندا تۋعان، 22 جاس شاماسىنداعى جولداسوۆ ەربولات ماسوت ۇلى كۇدىكتى دەپ تانىلدى. 

شاريعات نە دەيدى؟

ءداستۇرلى يسلام دىنىندە بالا 7 جاسقا تولعاندا ناماز تۋرالى، ءدىن تۋرالى ايتىپ، ناسيحات جۇمىستارىن جاساڭدار دەگەن ماعىنادا حاديس بار. ءبىراق دىندە زورلىق جوق ەكەنىن باسا نازاردا ۇستاعان ءجون. جاسوسپىرىمگە نامازدى قالاي جانە قاشان ۇيرەتۋ كەرەكتىگى تۋرالى islam.kz سايتىندا تولىعىراق جازىلعان. ءدىني الاۋىزدىق تۋىنداماس ءۇشىن Qamshy.kz اقپارات اگەنتتىگى اتامىش اقپاراتتى وقىرمان نازارىنا ۇسىنادى. 

«جەتىگە تولعاندا بالالارىڭا ناماز وقۋدى بۇيىرىڭدار. ونعا تولعاندا دا وقىماسا، اقىرىنداپ ۇرىپ-سوعىپ تاربيەگە سالىڭدار، سونداي-اق ولاردى وسى جاستان باستاپ بولەك جاتقىزىڭدار»

(ابدۋللاھ يبن امر يبن ءال-اس(ر.ا.) جەتكىزگەن. ءابۋ ءداۋىت، ءسالا 26)

حاديستە پايعامبارىمىز (ساللاللاھۋ ءالايھي ءۋا ءساللام) ەسى كىرە باستاعان جاس بالاعا ەڭ الدىمەن ناماز ۇيرەتۋدى بۇيىرعان. نەلىكتەن ناماز؟! ويتكەنى ناماز – ءدىننىڭ دىڭگەگى، تاربيەنىڭ نەگىزى. ادامنىڭ كوكىرەگى مەن ءومىر جولىن شۋاققا بولەيتىن نۇر. سونداي-اق بەلگىلى ۋاقىتتاردا وتەلەتىن ناماز ادامعا ۋاقىتتىڭ ءقادىرىن ءبىلدىرىپ، ۋاقىتپەن ءجۇرۋدى ۇيرەتەتىن، ءارى ونى جۇيەلىلىككە، تۇراقتىلىققا جانە بايسالدىلىققا باۋليتىن تەڭدەسسىز قۇلشىلىق. مىنە، سوندىقتان دا، اللا ەلشىسى (ساللاللاھۋ ءالايھي ءۋا ءساللام) جەتىگە تولىپ، وڭ-سولىن ەپتەپ اجىراتا باستاعان بالانى بارىنەن بۇرىن نامازعا ۇيرەتۋدى بۇيىرىپ، ال ەگەر جاسى ونعا تولىپ بۋىنى قاتا باستاعاندا دا نامازعا ۇيرەنبەسە، تاربيەلىك ماقساتتا عانا ءبىر جەرىن زاقىمداپ المايتىنداي اقىرىنداپ ۇرۋعا(ءولىمشى ەتىپ ساباۋ ەمەس) بولاتىنىن ايتقان.

ۇيادا نە كورسە، ۇشقاندا سونى ىلەدى»، دەمەكشى بالا ۇيدەگى ۇلكەندەرگە ەلىكتەپ وسەدى. سوندىقتان، الدىمەن ۇلكەندەردىڭ ءوزى نامازعا ەرەكشە دەن قويۋ ارقىلى ونىڭ قانشالىقتى ماڭىزدى قۇلشىلىق ەكەنىن بالاعا ءىس جۇزىندە كورسەتە ءبىلۋى كەرەك. نامازدىڭ ماڭىزى زور قۇلشىلىق ەكەنىن كوزىمەن كورىپ، زەردەسىنە توقىپ وسكەن بالا ەسى كىرگەندە، ءبىر اۋىز ناسيحاتپەن-اق نامازعا جىعىلادى، ءھام وسە كەلە ونى ءومىرىنىڭ ەڭ باستى ۇستانىمىنا اينالدىرادى. ال قانشا جەردەن كورسەتىپ، ايتىپ، ۇيرەتسەڭ دە جالقاۋلىقتان قۇلشىلىق جاساعىسى كەلمەيتىن بويكۇيەز بالانى دەر كەزىندە قولعا الىپ، تاربيەگە سالماسا، كەيىن قانشا تاربيەلەگەنمەن ەش ناتيجە شىقپاۋى مۇمكىن. سول سەبەپتى، پايعامبارىمىز (ساللاللاھۋ ءالايھي ءۋا ءساللام) ونداي بالانى قاجەت بولسا، قولمەن تۇزەتۋگە بولاتىنىن ايتقان. ويتكەنى، بالا كۇننەن ىستەپ ۇيرەنگەن ءىستىڭ ۋاقىت وتە كەلە قالمايتىن ادەتكە اينالارى ءسوزسىز.