«اق جول» فراكسياسى ەۋرازيالىق ەكونوميكالىق وداقتا تاۋارلاردى مىندەتتى تاڭبالاۋ تۋرالى زاڭ جوباسىن راتيفيكاسيالاۋعا قارسى شىقتى – ازات پەرۋاشيەۆ مۇنداي زاڭدى قولدانىسقا ەنگىزۋ كاسىپكەرلىك قىزمەتكە تەرىس اسەر ەتىپ، تاۋارلار قۇنىنىڭ وسۋىنە جول بەرەدى دەپ ەسەپتەيدى. بۇل جونىندە پارلامەنت ءماجىلىسىنىڭ پلەنارلىق وتىرىسىندا سويلەگەن سوزىندە مالىمدەدى دەپ حابارلايدى «اق جول» قدپ باسپا ءسوز قىزمەتى.

ول 2014 جىلى ەۋرازيالىق وداقتاعى ارىپتەستەرىمىز تاڭبالاۋ بويىنشا جوبا ازىرلەپ بىزگە ۇسىنعاندا فراكسيانىڭ ونى قۇپتاماعانىن، ءتىپتى قازاقستاندىق كەلىسسوز جۇرگىزۋشىلەرگە بۇل ماسەلەگە تىيىم سالۋدى ۇسىنعانىن ەسكە سالىپ ءوتتى.

«الايدا ۇكىمەت ونى جۇزەگە اسىرۋدى جالعاستىرا بەردى. بۇل پيلوتتىق جوبانىڭ مەرزىمى 2016 جىلى اياقتالعان بولاتىن، ءبىراق ونى ورىنداۋشىلار نەگە ەكەنى بەلگىسىز 2018 جىلعا دەيىن ۇزارتۋىن سۇرادى. بۇعان ءبىزدىڭ شەنەۋنىكتەر تاعى دا كەلىستى. سايىپ كەلگەندە، ەگەر ەكسپەريمەنت ساتسىزدىككە ۇشىراسا، ونى دەرەۋ دوعارادى. ەكىنشى رەت قايتالامايدى. ال، ەندى كەلىپ قارجى مينيسترلىگى بىزگە پيلوتتىق جوبا ءساتتى ءوتتى دەپ وتىر. الايدا، بۇل دەگەنىمىز – فاكتىلەردى بۇرمالاۋ»، - دەدى دەپۋتات.

وسى ورايدا، «اق جول» پارتياسىنىڭ ءتوراعاسى تاۋارلاردى تاڭبالاۋدى ەنگىزۋگە قارسى ناقتى ارگۋمەنتتەردى جىكتەپ بەردى.

«بىرىنشىدەن، مىندەتتى تاڭبالاۋ مەن تولەمدەردى ەنگىزۋ – بۇل بيزنەسكە تاعى دا قوسىمشا سالىق سالۋ دەگەن ءسوز. ونى مەملەكەتتىڭ پايداسىنا ەمەس، جەكە كوممەرسيالىق كومپانيالاردىڭ مۇددەسى ءۇشىن ەنگىزۋ نيەتى تاڭعالارلىق دۇنيە. ءبىر نارسەنى جاقسىلاپ تۇسىنگەن ءجون، تاۋاردىڭ ءبىر ولشەمىنە تاڭبالاۋدى ەنگىزبەك. ياعني ءار شۇلىقتىڭ، جەيدە مەن ءسۇتتىڭ ءاربىر قورابىن تاڭبالايتىن بولادى. قارجى مينيسترلىگى كاسىپكەرلەر ءۇشىن ءبىر ماركا ءۇش تەڭگەنى قۇرايدى دەيدى، ال سول بيزنەستىڭ ءوز ەسەبى بويىنشا – 25 تەڭگە. نەلىكتەن قازاقستاندىقتار بۇل اقشانى الدەقانداي ءبىر جەكە كومپانياعا تولەۋى ءتيىس؟»، - دەگەن ساۋال قويدى ازات پەرۋاشيەۆ.

«ول حالىقتىڭ ءار كۇن سايىن ءار ءتۇرلى تاۋارلار ساتىپ الاتىنىن جانە ونىڭ تەك ءبىر عانا دانادان ەمەس ەكەنىن، سوعان سايكەس ولار 25 تەڭگەدەن ەمەس، 200-300 تەڭگە كۇن سايىن تولەپ تۇراتىنىنا» مىسال كەلتىردى.

«ال، ەندى ويشا سول اقشا مولشەرىن 18 ميلليون حالىقتىڭ سانىنا كوبەيتىپ كورىڭىز. اڭگىمە ميللياردتاعان قاراجاتتا بولىپ تۇر. ونىڭ ءبارى تاڭبالاۋدىڭ (ماركيروۆكا) وپەراتورى – جەكە مەنشىك كومپانيالاردىڭ قورجىنىنا تۇسەدى. دەمەك، وسىنشاما اۋقىمدى قارجى رەسەيگە كەتەدى، جوباعا باستاماشىلىق ەتكەن كومپانيالاردىڭ مۇددەسىنە جۇمىس ىستەيدى»، - دەپ تۇيىندەدى دەپۋتات.