قازاقتان قىز العىڭ كەلسە - ءمارحابات. ءبىراق، مەملەكەت پايداسىنا سالىق تولە! بەلگىلى زاڭگەر ابزال قۇسپان وسىنداي باستاما كوتەرىپ، ەۋرازيا ارناسىندا پىكىر ءبىلدىردى. ونىڭ ويىنشا، بۇل اتاق-ابىروي جيناۋدى كوزدەيتىن پيار قادام ەمەس، تۇسىنگەن جانعا اتالعان يدەيانىڭ استارىندا ۇلت مۇددەسى جاتىر. كورشى تۇرىكمەن حالقىنان ۇلگى الىپ، مۇنداي قادامعا بارعان دۇرىس پا؟ قىز-كەلىنشەكتەردىڭ پىكىرى قانداي؟
قازاقتىڭ قاراكوز قىزىنىڭ شەتەلدىكتەر ءۇشىن قۇنى بار. زاڭگەردىڭ وسى ءسوزى قازنەتتە قىزۋ تالقىعا تۇسۋدە. ابزال قۇسپان بىلاي دەيدى:
«ۇلتتىڭ كەلەشەگىن ويلاۋ قاپەرلەرىنە كىرمەيدى. وسى ماسەلەنى اينالاداعىلارعا ايتساڭ: «وزگە ۇلتتىڭ كوڭىلىنە كەلەر. وقىس جاعداي تۋىپ كەتەر. ءقازىر زامان باسقا، قىز كىمدى كوڭىلى قالاسا، سونىمەن بىرگە بولعانى ءجون عوي»، - دەگەن جالتاق ءۋاج ايتادى. بۇل قازاقتىڭ بولاشاعىنا بەي-جاي، سامارقاۋ قاراۋ دەگەن ءسوز. مۇنىڭ ءبارىن ءبىز ايتپاساق، كىم ايتادى؟ قازاق ءۇشىن ويلاناتىن دا، تولعاناتىن دا ماسەلە كوپ».
زاڭگەردىڭ پايىمىنا سالساق، ءبىزدىڭ قىزدار بالاباقشادان باستاپ قولىنا ديپلومىن العانعا دەيىن وقيدى-توقيدى. سوسىن، بوي جەتكەندە وزگە ۇلتتىڭ قولىنان ۇستاپ كەتە بارۋى دۇرىس ەمەس. وسى تاقىرىپقا وراي، استانالىق ارۋلاردىڭ پىكىرى قانداي؟
«ەگەر ونداي شەشىم قابىلداناتىن بولسا، وندا مەن قۇپتايمىن. جوعارىداعى باسشىلىق ءوزى بىلەدى عوي: نە دۇرىس، نە بۇرىس ەكەنىن. ءوز باسىم مەن قازاق جىگىتىنە تۇرمىسقا شىققىم كەلەدى»، - دەدى ءبىر ارۋ.
«مەنىڭ ويىمشا، بۇل دۇرىس ەمەس. ءار ادام ۇلتىنا قاراماي سۇيگەن ادامىنا قوسىلۋى ءتيىس. سوندىقتان مەن كەلىسپەس ەدىم»، - دەدى تاعى ءبىر بويجەتكەن.
ماحابباتتى عىلىمي كاتەگورياعا جاتقىزا المايسىڭ. وعان سوت جۇرمەيدى. الەۋمەتتانۋشىلار ۇسىنعان سوڭعى ستاتيستيكاعا ءمان بەرسەك، ارالاس نەكەلەردىڭ ۇلەس سالماعى تىم كوپ ەمەس ەكەن.
«سوڭعى كەزدەردەگى كورسەتكىشتەرگە قاراساق، ارالاس نەكەلەردىڭ سانى سونشا كوپ ەمەس. جانە ونىڭ كولەمى ۇلتتىڭ بولاشاعىنا سونشالىقتى قاۋىپ-قاتەر توندىرمەيدى دە، اسسيميلياسياعا ۇشىرايتىنداي تاعى باسقا. وزگە مەملەكەتتەر سياقتى ارالاس نەكەگە سالىق سالىپ، ەرەكشە قوسىمشا ءبىر تولەماقى الۋ ول مەنىڭ ءوز تۇسىنىگىمدە ونشا كوڭىلگە قونبايدى»، - دەيدى الەۋمەتتانۋشى رامازان ساتتار ۇلى.
بۇل ماسەلەگە قاتىستى دەپۋتاتتار دا سويلەپتى. نۇرتاي سابيليانوۆتىڭ پىكىرىنشە، بۇل ءۇردىستى وزگەرتۋدىڭ ءبىر جولى مىنادا.
«ءوزىمىز وتباسىمىزدا تاربيە جۇرگىزىپ، ءوزىمىزدىڭ ازاماتتاردى قازاقتارعا تۇرمىسقا شىعارىپ، قازاقتان قىز الۋدى جالعاستىرۋىمىز كەرەك. ال قازىرگى جاعدايدا باسقا ۇلتقا شىعىپ جاتاتىن بولسا، نەگە شىعىپ جاتىر، سونى زەرتتەپ، تالداپ الدىن الۋ كەرەك دەپ ويلايمىن»، - دەيدى پارلامەنت ءماجىلىسىنىڭ دەپۋتاتى نۇرتاي سابيليانوۆ.
بابالارىمىز «تاربيە تال بەسىكتەن باستالادى» دەيدى. اڭگىمەنىڭ تۇپ-توركىنى وسىعان كەلىپ تىرەلەتىندەي. ماحاببات، ارالاس نەكە دەگەن ماسەلە بار جەردە ۇلتتىڭ مۇددەسى، قان تازالىعى دەگەن تاقىرىپتار دا توبە كورسەتەدى. قازاقتان قىز العان وزگە ۇلت وكىلدەرى مەملەكەت پايداسىنا سالىق تولەسىن دەگەن زاڭ بۇگىن-ەرتەڭ قابىلدانۋى ەكىتالاي. ءبىراق، تالقىلاۋعا ءتۇسىپ، ءتۇبى يدەيا رەتىندە ءپىسىپ، اقىرى ۇسىنىسقا اينالۋى ابدەن مۇمكىن.
