ادام ءومىرى – كەز-كەلگەن پەندە ءۇشىن ەڭ باستى ءارى وتە قۇندى سىي. ونى گۇلدەندىرۋ مەن قايعى-مۇڭعا تولتىرۋ، قۋانىشقا كەنەلتۋ مەن جاعىمسىز كوڭىل كۇيگە باتىرۋ اركىمنىڭ ءوز قولىندا. ەگەر جاقسى ءومىر سۇرگىڭىز كەلسە، ءومىرىڭىزدىڭ ءار ساتىنەن ءلاززات العىڭىز كەلسە، وندا ءبىرشاما دۇنيەلەردى وزگەرتۋىڭىزگە تۋرا كەلەدى. ول قانداي دۇنيەلەر؟ ءبىز سىزگە بۇگىن وسى جايىندا شاما-شارقىمىزشا كەڭەس بەرمەكپىز. ەندەشە، ءارى قاراي وقىڭىز.

ءسىزدىڭ ءاربىر كۇنىڭىز بىر-بىرىنە ۇقساي ما؟ ۋاقىتىڭىزدىڭ زايا كەتىپ جاتقانىن ىشتەي سەزەسىز بە؟ ەگەر "ءيا" دەپ جاۋاپ بەرە الساڭىز، قازىردەن باستاپ وزىڭىزبەن جۇمىس جاساعانىڭىز ءجون. ويتكەنى، ءسىز ءومىردى ءبىر رەت قانا سۇرەسىز. ال قامشىنىڭ سابىنداي قىسقا ۋاقىتتا سىزگە قايعى-مۇڭعا، قيىنشىلىقتان تارىعۋعا ۋاقىت بولماۋى ءتيىس. بارلىعىن جۇرەگىڭىزگە جاقىن قابىلداماي، اقىلعا سۇيەنە وتىرىپ، شەشە بىلگەنىڭىز ابزال.

مىسالى، ەگەر جۇمىسىڭىزدا باسشىڭىز ايلىق ەسەپتى ءقازىر تالاپ ەتسە، نە ىستەيسىز؟ ەمتيحان ۋاقىتى كەلدى. ءبىراق ستۋدەنت تۇراقتى ساباققا قاتىسىپ جۇرسە دە، سۇراقتاردىڭ جاۋابىن تاپپاي قالادى. نە ىستەمەك كەرەك؟ بۇلار – جاستار اراسىندا ەڭ ءجيى كەزدەسەتىن ءارى تىعىرىققا تىرەيتىن سەبەپتەردىڭ بىرەگەيلەرى. بۇل قاتارعا كوپتەگەن مىسالداردى تىركەي بەرۋگە ابدەن بولادى.

بۇگىنگى ماقالامىزدا جاستاردى، جالپى ادامداردى تىعىرىققا تىرەپ، قامىعۋ جاعدايىنا الىپ كەلەتىن بىرنەشە سەبەپتەردى اتاپ وتكەلى وتىرمىز.

ءسىز بىرەۋگە رەنجۋ ارقىلى ءوز ءومىرىڭىزدىڭ شىرقىن بۇزاسىز

ادام مەن ادامنىڭ رەنجىسۋى، وكپەگە بوي الدىرۋى ءجيى كەزدەسەتىن جايت. ءسىز بىرەۋگە رەنجۋ ارقىلى وزىڭىزگە جاعىمسىز كوڭىل كۇي سىيلايسىز. ال بۇل كوڭىل كۇي ءسىزدىڭ جايدارى جۇرۋىڭىزگە، قالاعان ىسىڭىزبەن اينالىسىپ، ودان ءلاززات الۋعا كەدەرگى جاسايدى.

ءسىز ەشكىمدى كەشىرە المايسىز جانە بىرەۋگە رەنجى ارقىلى ول ادامدى وزىڭىزگە قايتارامىن دەپ ويلايسىز. بۇل – وتە قاتە پىكىر. عۇمىرىڭىزدىڭ بەلگىلى ءبىر ۋاقىتىن رەنىشكە جۇمساۋ – اقىماقتىق. ارينە، كەز-كەلگەن ادامدا كوڭىل قالۋ سىندى جاعداي كەزدەسەدى. ءبىراق ونى اشىق سويلەسۋ ارقىلى جەڭىپ كەتكەن ابزال.

وزىڭىزگە ۇنامايتىن جۇمىسپەن اينالىسۋ

كەز-كەلگەن ادام بالاسىندا ءوزىنىڭ جان دۇنيەسى قالايتىن قىزمەتى بولادى. ول ادام سول ىسپەن اينالىسۋ ارقىلى جان راحاتىن سەزىنەدى جانە ومىردەن ءلاززات الادى.

قازىرگى ۋاقىتتا اپتانىڭ التى كۇنىن وزىنە ۇنامايتىن قىزمەتكە جۇمساپ، باسشىدان ۇرىس ەستىپ ءارى قۇلىقسىز قىزمەت ەتىپ، ءبىر اي ءومىر سۇرەتىن جالاقىعا جۇمىس جاسايتىنداردى كوپتەپ كەزىكتىرۋگە بولادى.

ەڭ دۇرىسى – وزىڭىزگە ۇنايتىن جۇمىسپەن اينالىسىڭىز. سول ۋاقىتتا ءسىزدىڭ ەڭبەك ونىمدىلىگىڭىز دە جوعارى بولماق.

وزگە پىكىرلەرمەن ساناسۋ

"الەمدە قانشا ادام بولسا، سونشا پىكىر بار" دەگەن قاعيدانى ەستىگەن بولارسىز. وزگەلەردىڭ پىكىرىمەن ءومىر سۇرەتىندەر ءۇشىن ءار ىسىنەن ءلاززات الۋ قيىنعا سوعاتىنى انىق.

ءسىز "بۇل ارەكەتىمە باسقالار نە دەيدى؟ ەگەر وزگەلەرگە ۇناماي قالسا، قايتەمىن؟" دەگەن سۇراقتى قوياسىز با؟

بۇل سۇراق ادامداردى ءوز قالاۋىنداعى نارسەمەن اينالىسۋدان شەكتەيدى. سوندىقتان، وسىنداي ادەتىڭىز بولسا، ەرتەرەك دوعارعانىڭىز ءجون بولماق.

دەنساۋلىق – ءبىرىنشى بايلىق

دەنى ساۋ ادامدا ءور رۋح بولادى. ءسىز، ارينە، تاڭەرتەڭ ۇيقىدان تۇرعاندا جاسالاتىن جاتتىعۋلاردى تاپتاۋرىن ارەكەت دەپ ويلايسىز. نەمەسە ءبىر مەزگىل كەشكىلىك جۇگىرۋگە ەرىنەسىز.

دەگەنمەن، دەنە ساۋلىعى – جان ساۋلىعى. ءسىزدى اۋرۋ مەڭدەگەن كەزدە عانا بارلىعىن تۇسىنە باستايسىز.

دۇرىسى – سپورتشىعا اينالماساڭىز دا، جەڭىل جاتتىعۋلاردى ورىنداپ، ءبىر مەزگىل جۇگىرىپ تۇرۋ.

شاعىم مەن وكىنىش – قاجەتسىز دۇنيەلەر

ءسىز كۇن سايىن وزىڭىزگە قاتىستى ءتۇرلى نارسەلەرگە شاعىمداناسىز. ءسىزدىڭ شاعىم كىتاپشاڭىز قازىرگى ۋاقىتتا 5 تومدىق كىتاپ سەكىلدى كورىنۋى مۇمكىن. ءومىر ءسۇرىڭىز. ءار نارسەگە شاعىم جاساعاننان، ەشتەڭە وزگەرمەيتىنىن ءتۇسىنىڭىز.

سونىمەن قاتار، كۇن سايىن وزىڭىزگە ەسەپ بەرەر كەزدە كۇندىز ايتقان سوزدەرىڭىزگە، جاساعان قىلىقتارىڭىزعا، جاساۋ قاجەت ەدى دەگەن ويلارىڭىزعا وكىنىش ءبىلدىرىپ جاتاسىز. ەسىڭىزدە بولسىن، وتكەنگە وكىنۋ – ۋاقىت جوعالتۋعا دا تۇرمايتىن دۇنيە. وتكەننەن تەك قانا ساباق الىڭىز.

ماحابباتسىز ەشقانداي ارەكەتكە بارماڭىز

قازاقتا "جار تاڭداۋدا قاتەلىككە بوي الدىرماۋ قاجەت" دەگەن ءسوز بار. تاڭداعان جارىڭ – ءسىزدىڭ وتباسىلىق ومىرىڭىزگە، الداعى بارلىق عۇمىرىڭىزعا اسەر ەتەتىن جان. سوندىقتان، باقىتتى وتباسىنى قالاساڭىز، ماحابباتپەن شاڭىراق كوتەرۋگە ۇمتىلىڭىز.

سالىستىرۋ – ەشقانداي پايدا اكەلمەيتىن ارەكەت

كەز-كەلگەن ادام ءوزىن بىرەۋمەن سالىستىرعاندى جاقسى كورەدى. سونداي-اق، وزگەلەردەن ءوزىن تومەن سەزىنسە، سوعان ءىشى كۇيىپ، ءوزىن ەشكىمگە قاجەتسىز ءارى باسەكەگە قابىلەتسىز، ەڭبەككە قىرى جوق ادام رەتىندە ەسەپتەيدى.

ەسىڭىزدە بولسىن، ءسىز – ءوزىڭىز ءۇشىن ەڭ قىمبات ادامسىز. وزىڭىزبەن جۇمىس جاساۋ ارقىلى الگى سالىستىرعان ادامعا وڭاي جەتۋگە ابدەن بولادى.

كولىك جەتكەن جەرگە جىلقىمەن دە جەتۋگە بولاتىنىن ۇمىتپاعانىڭىز ابزال. تەك قانا ارتىق ەڭبەك ەتۋ مەن العا ۇمتىلىس تولاستاماۋى ءتيىس. بۇل – سالىستىرعان ادامعا يىق تىرەستىرەر جولداعى ەڭ باستى قاعيدالار.

باقىت اقشادا ەمەس

باقىت دەگەن ۇلكەن ۇعىمنىڭ قۇنىن كوك قاعازبەن ولشەۋ – ابەستىك. ماتەريالدىق جاعداي جاقسى ءومىر سۇرۋگە اسەر ەتكەنىمەن، بارلىعىن شەشە بەرمەيدى.

ويلاڭىزشى، ومىردە ايىنا 6 ميلليون تەڭگە تاپسا دا، شاڭىراعىنان باقىت ءيىسى سەزىلمەيتىن ادامدار بار. ال كۇزەتشى نەمەسە اۋلا سىپىرۋشى بولىپ قىزمەت ەتىپ، 60 مىڭ تەڭگە جالاقىمەن باقىتتى كۇن كەشىپ جاتقاندار دا بار.

ءسىز ءۇشىن اقشا ەڭ باستى قۇندىلىق بولىپ ەسەپتەلمەۋىن قاداعالاڭىز. ەگەر دە ءالى سونداي پىكىردە بولساڭىز، ونى ەرتەرەك وزگەرتكەن ابزال. بۇل قاتە باعىت، قاتە پىكىر ەكەنىن ەسكەرىڭىز.

العىس ايتا ءبىلۋ – ادامشىلىق بەلگىسى

ءسىز وزىڭىزگە قول كومەگىن ۇسىنعان ادامدارعا، قىزمەتىڭىزدىڭ ساپالى بولۋىنا كومەكتەسكەن ادامدارعا قۇددى بارلىعى سولاي بولۋى ءتيىس سەكىلدى العىس ايتپاۋىڭىز مۇمكىن. ءتىپتى، قۇدايعا دا وزىڭىزدە بار نارسەلەر ءۇشىن، قۇندىلىقتارىڭىز ءۇشىن العىس، تاۋبە بىلدىرمەۋىڭىز مۇمكىن.

"راحمەت!" دەگەن ءسوزدى ايتا ءبىلۋ – كىشىپەيىلدىكتىڭ بەلگىسى. ەگەر ءسىز ادامدىقتان الشاقتاماساڭىز، بويىڭىزدا كىشىپەيىلدىك ساقتالىپ قالادى.

ال ادام بولىپ، قورشاعان ورتانىڭ جىلۋىن سەزىنىپ ءومىر سۇرە ءبىلۋ – ناعىز ءومىر ءسۇرۋدىڭ كورىنىسى. ەشقانداي ادام ماڭگىلىك ەمەس. زامانداس بولىپ، كۇن كەشىپ جاتقاننان كەيىن قايىرىمدى، مەيىرىمدى بولعان ابزال. ءور كوكىرەكتىك سىندى مىنەز، داعدىلاردى شەتكە ىسىرىپ تاستاۋ قاجەت.

وتىرىك ورگە باسپايدى

وتىرىك ايتۋ – كوپ ادامنىڭ بويىندا كەزدەسەتىن ءارى وتە ناشار قاسيەت. وتىرىك ءسوز ارقىلى، جالعان ءىس ارقىلى ەلدەر مەن قالالاردى قۇردىمعا جىبەرۋگە نەمەسە كەرىسىنشە قۇرۋعا بولادى. وتىرىكتىڭ قۇدىرەتى وتە جوعارى.

جاقسى ءىس ءۇشىن، دۇرىس باعىتتاعى قاجەتتىلىك ءۇشىن وتىرىك ايتۋ دەگەن ۇعىم بار. بۇل وتىرىكتى كوپشىلىگى اقتاپ، ءوز ءىسىن سول ارناعا سىيعىزۋعا ۇمتىلادى. دەگەنمەن، وتىرىكتىڭ اتى – وتىرىك.

وتىرىك ايتۋ ارقىلى ادامداردىڭ سىزگە دەگەن ىستىق ىقىلاسىن، ماحابباتىن، وڭ كوزقاراسىن قۇرتۋىڭىز مۇمكىن.

لاجى كەلسە، وتىرىكتەن بويدى اۋلاق سالىپ، شىنايى ءومىر سۇرۋگە تىرىسقان ابزال. ءومىر – وتىرىك ايتاتىن ورىن ەمەس، شىنايىلىقپەن تازا جۇرەتىن ورىن.

ۋايىم – بەرەكەڭدى قاشىراتىن ادەت

ارينە، ادام بولعان سوڭ، ميىڭ ادەتتەگىدەي جارامدى قىزمەت ەتىپ تۇرعان سوڭ، ويعا، ۋايىمعا بوي الدىرماۋ استە مۇمكىن ەمەس. دەگەنمەن، بولاردى دا، بولماستى دا ۋايىمداي بەرۋ – تۇككە تۇرعىسىز ءارى پايداسى جوق ارەكەت.

ۋايم-قايعىعا بوي الدىرۋ ارقىلى ءسىز ءوز پسيحولوگياڭىزدى لاستاپ، ومىرگە دەگەن قۇشتارلىعىڭىزدى جوعالتاسىز. ادامداردىڭ بارلىعىندا پراگماتيستىك كوزقاراس، دۇرىس قادامعا دەگەن باتىل ۇمتىلىس بولۋى قاجەت.

"كىم تاۋەكەل ەتپەيدى، سول ماقساتىنا جەتپەيدى" دەگەن ءسوز بار. سوندىقتان، وتكەندى دە، كەلەردى دە شامادان تىس ويلاپ، سارى ۋايىمعا بوي الدىرعاننان ەشتەڭە ونبەيدى.

باقىتتى عۇمىر كەشۋ ءۇشىن قاجەتسىز ادەتتەردەن قازىردەن باستاپ ارىلعانىڭىز ءجون.