الماتى وبلىسىندا ءبىر اپتا بۇرىن جوعالعان 18 جاستاعى ستۋدەنت ءولى تابىلعان بولاتىن.  وقيعا ورنىن تەكسەرگەن ءتارتىپ ساقشىلارى ول ءوز-وزىن ءولتىردى دەگەن بولجام جاساپ وتىر دەپ حابارلايدى Qamshy.kz اقپارات اگەنتتىگى كتك تەلەارناسىنا سىلتەمە جاساپ. 

سەبەبى، اسىلعان كۇيى تابىلعان بويجەتكەننىڭ دەنەسىندە بىردە-بىر زورلىق ىزدەرى بولماي شىققان. دەگەنمەن، قىزدىڭ اۋىلداستارى پوليسيامەن كەلىسپەيدى. ولاردىڭ ايتۋىنشا، قالاعا قاتىناپ وقىپ جۇرگەن ستۋدەنتكە الدەبىرەۋلەر قيانات جاساعان بولۋى مۇمكىن.

تالعار اۋدانىنداعى ءوزى تۇرعان بەلبۇلاق اۋىلىنان الماتىعا ەمتيحان تاپسىرۋعا شىعىپ كەتكەن قىزدىڭ دەنەسى ءبىر اپتادان سوڭ تاۋدان تابىلدى. پوليسيانىڭ الدىن الا مالىمەتىنە قاراعاندا، ايگۇل امانگەلدى وندا ءوزى بارىپ اسىلعان.  

دەسە دە، قىزدىڭ الاسا تاۋ باۋرايىندا قالاي اسىلىپ قالعانىن ءتارتىپ ساقشىلارى ناقتى اشىپ ايتپاي وتىر. ءتىپتى، قىزدىڭ تاكسيگە وتىرعانى، نە وتىرماعانى دا بەلگىسىز. بەلگىلىسى سول، ءمايىتى اۋىلدان الىس ەمەس جەردە تابىلعان. ال جوعالاتىن كۇنى ايگۇل ساعات تاڭعى 9-دا ۇيىنەن اسىعىپ شىعىپ كەتىپتى. ويتكەنى، اسفەندياروۆ اتىنداعى ۇلتتىق مەديسينا ۋنيۆەرسيتەتىنىڭ 1-كۋرس ستۋدەنتى سول كۇنى اناتوميادان ەمتيحان تاپسىرۋى ءتيىس بولعان. الايدا اناسىنىڭ باتاسىن الىپ شىققان قىز وقۋ ورنىنا جەتپەگەن.

پوليسيا «سۋيسيد» جاسادى دەپ بولجاعان قىز باۋىرلارىنا ۇنەمى باس-كوز بوپ ءجۇرىپتى. كوپبالالى وتباسىدان شىققان بويجەتكەن 7 پەرزەنتتىڭ ەكىنشىسى ەكەن. قالاي دەگەنمەن دە ءىستىڭ اق-قاراسىن ساراپتاما قورىتىندىسى اشىپ بەرمەك.

وقي وتىرىڭىز:  
♦ الماتى وبلىسىندا جوعالعان قىز ءولى كۇيىندە تابىلدى

♦ الماتى وبلىسىندا ءولى كۇيىندە تابىلعان قىزعا قاتىستى مالىمەتتەر پايدا بولدى