«ماڭعىستاۋ - اشىق اسپان استىنداعى مۇراجاي» دەگەن اتاۋعا يە. سوندىقتان دا بۇل ولكەنىڭ تۋريستىك الەۋەتى جوعارى. تابيعات انا كاسپيي تەڭىزى مەن شولەيتتى ايماقتى قاتار توعىستىرىپ، سان عاسىرلىق تاريحى بار جادىگەرلەر مەن قايتالانباس نىسانداردى بارىنشا مول شوعىرلاندىرعان. ەندەشە مۇنداي عاجاپ جەرلەرگە ءتۋريزمدى دامىتۋعا نە كەدەرگى؟ ساياحاتشىلاردى ولكەگە كوپتەپ تارتۋ ءۇشىن قانداي جوبالار جۇزەگە اسۋى كەرەك؟ بۇل تۋرالى اقتاۋداعى وڭىرلىك كاسىپكەرلەر پالاتاسىندا ق ر «اتامەكەن» ۇكپ باسقارما ءتوراعاسىنىڭ ورىنباسارى ولجاس وردابايەۆتىڭ قاتىسۋىمەن وتكەن دوڭگەلەك ۇستەلدە ءمالىم بولدى.

شارادا ءسوز العان «Kazakh Turism» ۇلتتىق كومپانياسىنىڭ باسقارما ءتوراعاسى وركەن بيساقايەۆ: «ماڭعىستاۋ- قازاقستاننىڭ تۋريستىك ايماعى سانالاتىن ۇزدىك وندىققا ەندى. اقتاۋ قالاسى مەن قۇرىق پاروم كەشەنى ارالىعىن قامتيتىن اۋماقتاعى ءتۋريزمدى دامىتۋعا رەسپۋبليكالىق بيۋدجەتتەن 18 ملرد تگ ءبولىندى. جاعاجاي دەمالىسىن دامىتۋ باستى نازاردا. وعان وسىنداعى ينفراقۇرىلىم جاساقتالىپ، اقتاۋ مەن «الاۋ» لاگەرى جولدارى جوندەلەتىن بولادى»،- دەيدى.

ال، ق ر «اتامەكەن» ۇكپ باسقارما ءتوراعاسىنىڭ ورىنباسارى ولجاس وردابايەۆتىڭ ايتۋىنشا، ماڭعىستاۋ ءتۋريزمىن دامىتۋ ءۇشىن الدىمەن تۋريستەردى كۇتىپ الۋ تالاپتارىن جەتىلدىرۋ كەرەك. اۋەجاي مەن تەمىرجول ۆوكزالىنىڭ دايىندىعى قانداي؟ كولىك جولدارىنان اقتاۋ-اتىراۋ تاس جولىنىڭ ساپاسى جوعارى ەكەنىن كوردىك. ال، جولداردا تۋريستەرگە سەرۆيستىك قىزمەت كورسەتۋ دەڭگەيىن لايىق دەپ ايتا المايمىز. ساياحاتشىلاردى قاراپايىم شايحانامەن ەمەس، قىزىقتى، تىڭ جوبالارمەن تارتۋدى ويلاستىرۋ كەرەك. «جوبالاۋ ءوفيسى» جوباسى وسى جايتتاردى جۇزەگە اسىرۋعا مۇمكىندىك بەرەدى.

دوڭگەلەك ۇستەلدە تۋريستىك ايتاقتارعا حالىقتى تارتۋ ءۇشىن ىشكى اۋە قاتىناستارىن وڭتايلاندىرۋ ۇسىنىلدى. مەكتەپ دەمالىسى ماۋسىمىندا بالالار بيلەتتەرىن سۋبسيديالاۋ، ءبىر ەرەسەك ادامعا ەكى بالانى تەگىن الىپ ءجۇرۋ جاعدايىن قاراستىرۋ تۋراسىندا پىكىر ايتىلدى. سوندا وتباسى بيۋدجەتى 30 پايىزعا ۇنەمدەلىپ، حالىق شەتەلگە ەمەس، وتاندىق تۋريستىك جەرلەرگە ىنتا بىلدىرەدى ەكەن. تۋر پوليسيا قىزمەتىن قۇرۋ، اۆتو كەرۋەن، مەديسينالىق تۋريزم، بالالار ءتۋريزمى ت.ب دامىتۋ ۋاقىت ەنشىسىندە. مۇنىڭ ءبارى قازاقستاندى تۋريستىك تارتىمدىلىعى بار 50 ەلدىڭ قاتارىنا قوسۋ مىندەتىن جۇزەگە اسىرۋعا كومەكتەسپەك.

اشىق ديالوگقا كاسىپكەرلەر دە قاتىستى. اقتاۋ حالىقارالىق اۋەجايىنىڭ  ديرەكتورى  ەرعازى جولداسوۆ: «يران مەن تۇركىمەنستان سياقتى كورشىلەس ەلدەرگە رەيس اشا الماي وتىرمىز. نيەت بىلدىرگەن كومپانيالارعا رۇقسات بيۋەرىلمەدى. كورشى ءازىربايجاندا بۇل ماسەلە جوق. يراندىق تۋريستەر باكۋدە ۆيزاسىز ءجۇر. باكۋگە تۋريستەر اعىلادى. قوسىمشا رەيستەر ۇيىمداستىرىپ جاتامىز. بىزگە نەگە سونداي جاعداي جاساماسقا؟ تۋريستەردى تىركەۋ اۋەجاي عيماراتىندا بولۋى كەرەك، ولار كوپ ۋاقىتىن قۇجاتتارمەن اۋرە-سارساڭعا جۇمساماۋى ءتيىس. ىشكى رەيستەردى سۋبسيديالاۋ جەدەلدەتىپ قولعا الىنسا.جاز مەزگىلىندە اتىراۋدان كۇنىنە 4 رەيس جاسالادى. وسىنداي سۇرانىس ەلىمىزدىڭ بارلىق ايماعىنان، جاقىن شەتەلدەردەن دە تۇسەرىنە سەنىم مول»، دەدى.

باسقوسۋدا ايتىلعان بارلىق ۇسىنىستار «اتامەكەن» ۇكپ باسشىلىعىمەن تالقىلانىپ، ۇكىمەتكە جولداناتىن بولادى.