ماڭعىستاۋ وبلىسىنىڭ قاراقيا اۋدانىنا قاراستى سەنەك اۋىلىنا 50 جىل. قويناۋى قۇتقا، ءورىسى مالعا تولى اۋىل مەرەيلى مەرەكەنى دۇركىرەتىپ اتاپ ءوتتى. جارتى عاسىر تاريحى بار اۋىلدىڭ مەرەيتويى وشاق بايگە جانە تاي جارىستان باستاۋ الدى. ات سپورتى دوداسىنا ءوڭىرىمىزدىڭ جانە كورشىلەس وبلىستاردان شاباندوزدار قاتىستى. بايگەدە جەڭىسكە جەتكەن جەڭىمپازداردى اۋدان اكىمى قىدىربەردى بەكوۆ پەن اۋداندىق ءماسليحات دەپۋتاتى قالپاق ناۋرىزماعانبەتوۆ العىس حاتپەن، كۋبوكپەن جانە باعالى سىيلىقتارمەن ماراپاتتادى.

بايگەدەن كەيىن سەنەك اۋىلىندا ورتالىق ساياباقتتىڭ سالتاناتتى اشىلۋ ءراسىمى ءوتتى. جيىندا الدىمەن اۋدان اكىمى قىدىربەردى بەكوۆ تۇرعىنداردى مەرەكەمەن قۇتتىقتادى. قۇرىق اۋىلىنىڭ اكىمى باۋىرجان ەركەعۇلوۆ اۋىلدىڭ وركەندەپ دامۋىنا ۇلەس قوسقان ءبىر توپ ازاماتتى ماراپاتتاپ، اۋىل تاريحىندا اتى قالعان، بۇرىنعى ارداگەر ادامدارعا سىي-سياپات جاسادى. سالتاناتتى جيىن اۋىل جانە اۋدان ونەرپازدارىنىڭ، ەلگە بەلگىلى ونەر يەلەرىنىڭ كونسەرتىنە جالعاستى. سەنەكتىڭ سەڭگىر كوگىن انگە بولەگەن كەشتە ەلدىڭ سۇيىكتى ءانشىسى تۇرعانباي جايلاۋبايەۆ، قازاقستان رەسپۋبليكاسىنىڭ مادەنيەت قايراتكەرى مارات جارييەۆ جانە «دجاحان» توبى تۇرعىندارعا رۋحاني تاماشا كەش سىيلادى. سونىمەن قاتار، قوناقتار جانە اۋىل تۇرعىندارى ءۇشىن كيىز ۇيلەر قالاشىعى تىگىلىپ، قىزمەت ەتتى. ال، الاڭدا فۋتبولدان، قازاق كۇرەسى جانە قول كۇرەستەن سپورتتىق جارىستار ءوتتى.