اقتاۋ قالاسى حيميا-بيولوگيا باعىتىنداعى نازاربايەۆ زياتكەرلىك مەكتەبى 57 تۇلەككە جوعارعى مەكتەپتى ءتامامداۋ تۋرالى اتتەستات تاپسىردى. تۇلەكتەر زياتكەرلىك مەكتەپ تاريحىندا ەكىنشى رەت ۇشىرىلىپ وتىر.
سالتاناتتى شاراعا ماڭعىستاۋ وبلىسى اكىمىنىڭ ورىنباسارى رۋسلان ساكەيەۆ، قامقورشىلار كەڭەسىنىڭ مۇشەلەرى، اتا-انالار، مەكتەپ اكىمشىلىگى جانە مۇعالىمدەر قاتىستى. 
- سىزدەردى مەكتەپ بىتىرۋلەرىڭىزبەن قۇتتىقتايمىن! وزدەرىڭىز تاڭداعان ماماندىقتىڭ ناعىز يەسى بولۋلارىڭىزعا تىلەكتەسپىن. ءومىر بويى ءبىلىم الۋدان جالىقپاڭىزدار، - دەدى وبلىس اكىمىنىڭ ورىنباسارى رۋسلان ساكەيەۆ.
شارا بارىسىندا وبلىس اكىمىنىڭ ورىنباسارى ءبىلىم ورداسىن ۇزدىك ءتامامداپ، قورىتىندى جيىنتىق باعالاۋدى ءساتتى تاپسىرىپ شىققان نۇرعايسا جاقسىبەكقىزىنا «التىن بەلگى» توسبەلگىسىن تاقتى. ال ايدا زينۋر قىزى، فاريزا شىنجىروۆا، مەرۋەرت بيجانوۆا قىزىل اتتەستاتقا يە بولدى. 
اقتاۋلىق زياتكەرلەر حالىقارالىق ءبىلىم ارەناسىنداعى جەتەكشى ۋنيۆەرسيتەتتەردىڭ ءبىلىم گرانتىنا دا يە بولىپ وتىر. ماسەلەن، كوپتەگەن رەسپۋبليكالىق پاندىك وليمپيادالار جەڭىمپازى ارمان جۇماحان «City University of Hong Kong» جوعارعى وقۋ ورنىنا «Data science» ماماندىعى بويىنشا ءبىلىم گرانتىن جەڭىپ الدى. ايتا كەتۋ كەرەك، بۇل زامان سۇرانىسىنا يە جاڭا ماماندىقتاردىڭ ءبىرى. 12 «س» سىنىبىنىڭ تۇلەگى الۋا كانايەۆا گونگ-كونگ پوليتەحنيكالىق ۋنيۆەرسيتەتىنىڭ ءبىلىم گرانتىنا يە بولدى. ال قىزىل اتتەستاتقا العان فاريزا شىنجىروۆا نازاربايەۆ ۋنيۆەرسيتەتىندە تەگىن وقۋعا شاقىرتۋ الدى. 
سالتاناتتى شارادا مەكتەپ ۇستازدارى دا ءسوز الىپ، جۇرەكجاردى لەبىزدەرىن ءبىلدىردى.
- زياتكەرلىك مەكتەپتىڭ تۇلەكتەرى جوعارى كورسەتكىشتەردى كورسەتىپ وتىر. مىسالى، IELTS حالىقارالىق ەمتيحانىنىڭ ناتيجەسى بويىنشا،بارلىق تۇلەكتىڭ اعىلشىن ءتىلىن مەڭگەرۋ دەڭگەيىنىڭ ورتاشا بالى 6،3. كوپتەگەن تۇلەكتەر ەلىمىزدەگى جوعارى وقۋ ورىندارىن تاڭداپ وتىر، - دەيدى كاسىبي باعدار بەرۋ بويىنشا كەڭەسشىسى ساۋلە الدابەرگەنوۆا.
پىكىر قالدىرۋ