ەڭبەك جانە حالىقتى الەۋمەتتىك قورعاۋ ءمينيسترى بەردىبەك ساپاربايەۆ تۇرمىسى تومەن ازاماتتاردىڭ ءتىزىمى قالاي جاسالاتىنىن ءتۇسىندىردى. سول بويىنشا بانكتەگى كرەديتتىڭ ءبىر بولىگى وتەلەدى دەپ حابارلايدى Qamshy.kz اقپارات اگەنتتىگى Sputnik قازاقستان سايتىنا سىلتەمە جاساپ. 

"مينيسترلىككە ناقتى مىندەت جۇكتەلدى. ءبىز وسى بورىشكەرلەردىڭ كاتەگورياسىن انىقتاۋىمىز قاجەت. قازىرگى تاڭدا التى سانات انىقتالدى. ول – كوپبالالى، اسىراۋشىسىنان ايىرىلعان، جەتىم بالالار، اتاۋلى كومەك الاتىندار. بارلىعىنىڭ مالىمەتتەرى مەن ءتىزىمى مينيسترلىكتە بار. جەتىم بالالارعا قاتىستى مالىمەتتى ءبىلىم مينيسترلىگى بەرەدى. سولاردان ونى دا الامىز"، - دەدى ساپاربايەۆ ءماجىلىستىڭ جالپى وتىرىسىندا.

ءمينيستردىڭ ايتۋىنشا، بانكتەر مەن ميكروقارجىلاندىرۋ ۇيىمدارى ءوز كەزەگىندە بورىشكەرلەردىڭ ءتىزىمىن جاسايدى دا، مەملەكەتتىك نەسيە بيۋروسىنا جىبەرەدى. بيۋرو ول ءتىزىمدى قورعا بەرەدى. ال قور ءوز كەزەگىندە مينيسترلىككە ۇسىنادى.

"ءبىز ول ءتىزىمدى تاعى تەكسەرەمىز. سەبەبى مينيسترلىك وسى باعدارلامانىڭ اكىمشىسى بولىپ سانالادى. جاڭاعى ايتىلعان 88 ميلليارد تەڭگە ءبىزدىڭ مينيسترلىگىمىز ارقىلى وتەدى. ءبىز ءتىزىمدى تەكسەرگەننەن كەيىن ول اقشانى قورعا اۋدارامىز. قور ارى قاراي ەكىنشى دەڭگەيلى بانكتەر مەن ميكروقارجىلاندىرۋ ۇيىمدارىنا اۋدارادى. بارلىق مالىمەت بار. ءبىز ول اقشانىڭ دۇرىس تولەنگەنىن باقىلاپ وتىرامىز"، - دەدى ساپاربايەۆ.

توقايەۆتىڭ تاپسىرماسى

ايتا كەتەيىك، پرەزيدەنتتىڭ تاپسىرماسى بويىنشا كەپىلسىز كرەديت العان 5 ميلليونعا جۋىق ادامنىڭ ايىپپۇلدارى مەن ءوسىماقىلارى وتەلەدى. ال تۇرمىسى تومەن ازاماتتار ءۇشىن وسىنداي جەڭىلدىكپەن بىرگە 300 مىڭ تەڭگەگە دەيىنگى قارىز سوماسى كەشىرىلەدى. ءبىراق كرەديتتىڭ سوماسى 3 ميلليون تەڭگەدەن اسپاۋى قاجەت.

تۇرمىسى تومەن ازاماتتاردىڭ قاتارىنا كوپبالالى وتباسىلار، مۇگەدەك بالاسى بار وتباسىلار، اسىراۋشىسىنان ايىرىلعاندار، جەتىم بالالار جانە اتاۋلى الەۋمەتتىك كومەك الاتىندار جاتادى. پارلامەنت ءماجىلىسى ءتيىستى زاڭ جوباسىن ماقۇلدادى، ەندى ونى سەناتتا قارايدى.