جوعارى سوت ءتوراعاسى جاقىپ اسانوۆ كەزەكتەن تىس پرەزيدەنت سايلاۋى كەزىندەگى سوت جۇمىسى تۋرالى، ورىن العان زاڭ بۇزۋشىلىقتار جايلى تارقاتىپ ايتىپ بەردى دەپ جازادى Qamshy.kz اقپارات اگەنتتىگى.

"سايلاۋ ناۋقانىندا سوتقا تەك باقىلاۋشىلار عانا ەمەس، پرەزيدەنتتىككە كانديداتتار، سەنىمدى وكىلدەر، قوعامدىق ۇيىمدار دا شاعىم ءتۇسىردى. بيۋللەتەندەردى قاتە تاراتۋ فاكتىسى بويىنشا 26 اكىمشىلىك ءىس قوزعالىپ، سوتقا دەيىن جەتتى"، - دەدى جاقىپ اسانوۆ سوت جۇيەسى جۇمىسىن قورىتىندىلاعان وتىرىس بارىسىندا.

ونىڭ ايتۋىنشا، تۇسكەن ارىز-شاعىمدار ناتيجەسىندە سايلاۋ كوميتەتتەرىنىڭ بىرنەشە مۇشەسى جاۋاپقا تارتىلىپ، ايىپپۇل ارقالاعان.

"ءبىز ولارعا زاڭ بۇزۋشىلىق ارەكەتى ءۇشىن ايىپپۇل سالدىق. ءتىپتى، ولاردىڭ اراسىندا ءتوراعالار دا بار ەدى"، - دەدى ول.

سونداي-اق، سايلاۋ كەزىندە سوتقا ۇسىنىلعان ارىز-شاعىمداردىڭ ءبىرشاماسى قايتا قاراۋعا جىبەرىلىپتى.

"سوتقا تۇسكەن بارلىق ارىز-شاعىم سانى – 67. ءبىراق ءبىز ولاردىڭ ءبىرازىن قايتا قاراۋعا جىبەردىك. ويتكەنى، ولاردىڭ فورماسى ازاماتتىق كودەكس تالاپتارىنا قايشى كەلدى. كەيدە اۆتورلار ءوز اتى-جوندەرىن كورسەتپەگەن، كەيدە ارىز تۇسىرگەن ازاماتتىڭ اتىن كورسەتپەگەن. سونداي-اق، باقىلاۋشىمىن دەپ جازىلعان ارىز-شاعىمداردا زاڭ تالاپ ەتەتىن قۇجاتتار جوق"، - دەپ ءتۇيدى جوعارى سوت ءتوراعاسى.