بيىل قازاق ادەبيەتىنىڭ كورنەكتى وكىلى، ايگىلى اقىن تاڭجارىق جولدى ۇلىنىڭ تۋعانىنا - 110 جىل. بار عۇمىرىن الاشتىڭ ازاتتىعى ءۇشىن ارناعان تاڭجارىقتىڭ ەسىمى قازاق تاريحىنان وشپەس ورىن الارى ءسوزسىز. ول - بۇگىنگى تاۋەلسىز قازاقستاننىڭ ىرگە تاسىن قالاپ كەتكەن الاشوردانىڭ جۇڭگو جەرىندەگى تىكەلەي وكىلى بولدى. الاش يدەياسىنىڭ تاراتۋشىسى، جوقتاۋشىسى اتاندى. سونىڭ سالدارىنان سول كەزدەگى جۇڭگو وكىمەتىنىڭ اياۋسىز ەزگىسىنە ۇشىراپ، بار-جوعى 44 جاسىندا بۇ دۇنيدەمەن قوشتاستى ەسىل ەر!

بۇگىن ساعات 16:00-دە، الماتىداعى جازۋشىلار وداعىندا  اقىن رۋحىنا ارنالعان سالتاناتتى كەش وتەدى. ءساليقالى اڭگىمە، اسەرلى ءان تىڭداعىڭىز كەلسە ادەبيەتشىلەر ۇيىنە تارتىڭىز، ءقادىرلى قاۋىم.

اقىن تاڭجارىق جولدى ۇلىنىڭ «تۇرمە ءحالى» تولعاۋىنان ءۇزىندى: ...ءبارى ءولدى ءۇرىمجىنىڭ قالاسىندا، قىرىق ەكى، قىرىق ءۇشىنشى جىل اراسىندا. قورلىقپەن سول سابازدار كەتتى ارماندا، بالاڭنىڭ قالدى بۇل كەك بالاسىنا. ولسەك تە، ولمەس ءبىزدىڭ اتاعىمىز، بەلگىلى ىستەپ جۇرگەن «شاتاعىمىز». الىستان التىن ساۋلە ءبىر كۇلىمدەر، بولعانمەن ءقازىر تۇنەك جاتاعىمىز. الاتىن قۇندى قۋىپ يەمىز بار، ءبىز دە ەلمىز شوبەرەلى، اتالىمىز. زۇلىمعا راس قارسى تۇرعانىمىز، ول دا راس، قۇپيا ۇيىم قۇرعانىمىز. كەكپەنەن قولىمىزعا قۇرال الىپ، جەلكەدەن گومينداڭدى ۇرماعىمىز. كەلسەڭدەر ءۇرىمجىنىڭ قالاسىنا، كوزىڭ سال قالتارىس، ساي-سالاسىنا. وسىنى ولە-ولگەنشە ۇمىتپا دەپ، تاپسىرىپ كەت بالاڭنىڭ بالاسىنا. كورگەنىن اتاسىنىڭ وقىپ كورسىن، كەكتەنىپ، كوزىن سالىپ، كوڭىل ءبولسىن! بابامنىڭ تاريحى دەپ تابىن تانىپ، زالىمنان كەگىن الىپ، قولىندا ءولسىن! كەلەدى ءتۇن ورنىنا جارىق ساۋلە، سەنەمىن، ەمەس مۇنىم بەكەر اۋرە. ءسوزىمنىڭ ءتۇبىن ويلا ەندى ەلىم، قولىڭا وسى ءسوزىم تيسە زاۋدە.