ورالداعى قاتتى داۋىل سالدارىنان اعاشتار قۇلاپ، عيماراتتارعا زاقىم كەلگەن، داۋىلدان كەيىن بەس ادام دارىگەرلەردىڭ كومەگىنە جۇگىندى دەپ حابارايدى Qamshy.kz اقپارات اگەنتتىگى sputniknews.kz سايتىنا سىلتەمە جاساپ.
"5 تامىزدا قاتتى جەل سالدارىنان ساعات 15.00 مەن 17.00 ارالىعىندا جەدەل جاردەم پۋلتىنە ءتورت رەت قوڭىراۋ ءتۇستى. جەلايەۆو اۋىلىندا شاتىردان شيفەر بولىگى ۇشىپ، سەگىز جاسار قىزدىڭ باسىنا قۇلاعان. ول ورال قالاسىنىڭ كوپسالالى اۋرۋحاناسىنا جەتكىزىلدى"، - دەلىنگەن "موي گورود" پورتالىنىڭ جازباسىندا.
داۋىلدان قالاداعى بىرنەشە اعاش قۇلاعان.
"ءابىلقايىر حان داڭعىلىندا كولىككە اعاشتىڭ جۋعان بۇتاعى قۇلاعان. سالدارىنان 31 جاستاعى ەر ادامنىڭ كوزىنە اينەك سىنىعى كىرىپ كەتىپتى. ول وبلىستىق كوپسالالى اۋرۋحاناعا جەتكىزىلدى. سونداي-اق 16 جاستاعى قىز زارداپ شەگىپ، ورال قالاسىنداعى كوپ سالالى اۋرۋحاناعا جەتكىزىلگەن"، - دەپ مالىمەت بەردى ءوڭىردىڭ دەنساۋلىق ساقتاۋ باسقارماسى.
سونىمەن قاتار دارىگەرلەر 69 جانە 74 جاستاعى ەكى ايەلدىڭ ۇستىنە بۇتاق قۇلاعانىن ايتتى. ولار باسىنان جاراقات العان. بىرەۋى اۋرۋحاناعا جاتۋدان باس تارتسا، ەكىنشىسى مەديسينالىق مەكەمەدە ەم الىپ جاتىر.
قاتتى جەل ورال قالاسىندا 5 تامىز كۇنى تۇستەن كەيىن باستالدى. قالادا ەلەكتر جارىعى ءسونىپ قالىپتى.
وڭىرلىك توتەنشە جاعدايلار دەپارتامەنتىنىڭ مالىمەتىنشە، قاتتى جەل جاڭاجول جانە تالدىقۇدىق اۋىلىنداعى ەكى مەكتەپتىڭ شاتىرىن ۇشىرعان، جانىبەك اۋىلىنداعى م.ب. يحسانوۆ اتىنداعى كوللەدج سپورت زالىنىڭ شاتىرىنا زاقىم كەلىپتى. تاسقالا اۋدانىنداعى تاسقالا اۋىلىندا حالىقتى جۇمىسپەن قامتۋ ورتالىعىنىڭ شاتىرى ۇشقان.
ورالدا №47 مەكتەپتىڭ 144 شارشى مەتر شاتىرى ۇشقان، ءا. مولداعۇلوۆا اتىنداعى №38 مەكتەپ-ليسەيىنىڭ دە شاتىرىنا زاقىم كەلگەن.
