ەلىمىزدە ۆاليۋتا ايىرباستاۋ قيىنداۋى مۇمكىن دەپ جازادى Qamshy.kz اقپارات اگەنتتىگى كتك تەلەارناسىنا سىلتەمە جاساپ. اقشا ايىرباستاۋ پۋنكتتەرى ءار وپەراسيانى جۋرنالعا تىركەپ وتىرادى. ياعني، كەلەر جىلدان باستاپ اقشا ايىرباستاعان ادامنىڭ ءاتى-جونى مەن جەكە كۋالىگىنىڭ نومەرى جازىلادى. مۇنداي باستامانى ۇلتتىق بانك كوتەرىپ وتىر.

وعان قوسا قارجى نارىعىن رەتتەۋشى ءبىر ادامعا 500 مىڭ تەڭگەدەن اسا اقشا ايىرباستاۋعا نەمەسە ساتۋعا رۇقسات ەتپەيدى. ەڭ باستى جاڭالىق - ۆاليۋتا ايىرباستاۋ پۋنكتتەرىنىڭ جۇمىسىن كۇندىزگى 10:00-نان كەشكى 19:00-نە دەيىن شەكتەۋدى ۇسىنىپ وتىر. بۇل تۋرالى «قازاقستان رەسپۋبليكاسى قولما-قول شەتەل ۆاليۋتاسىمەن ايىرباستاۋ وپەراسيالارىن ۇيىمداستىرۋ قاعيدالارىن بەكىتۋ تۋرالى» قاۋلىنىڭ جوباسىندا جازىلعان. اقشا ايىرباستاعان تۇلعالارعا قاتىستى اقپاراتتىڭ قالاي تىركەلەتىنى 51ء-شى تارماقتا كورسەتىلگەن. قۇجات 16 تامىزعا دەيىن قوعام تالقىسىنا تۇسەدى. ەكونوميستەردىڭ پىكىرىنشە، ۇلتتىق بانكتىڭ باستاماسى شيكى جانە ەل ەكونوميكاسىن تىعىرىققا تىرەيدى. 

"اياق استىنان ءبىر ادام ۆاليۋتا ايىرباستاعىسى كەلسە، امالىن تابادى. بۇل جەردە ۆاليۋتا ايىرباستاۋ پۋنكتتەرىنىڭ جۇمىس ۋاقىتىن شەكتەۋ ارقىلى كولەڭكەلى بيزنەسكە جول اشامىز. سەبەبى، اقشانى جاسىرىن، قولما-قول ساتاتىنداردىڭ ساۋداسى قىزادى. وعان قوسا، ۆاليۋتانى ءبىر العاندا، ساۋدا 500 مىڭ تەڭگەدەن اسپاۋى كەرەك دەگەن دە كۇلكىلى. سوندا قۇنى 1500 دوللاردان اساتىن جىلجىمايتىن مۇلىكتى ساتقاندار نە ىستەمەك؟"، - دەيدى الەمدىك ەكونوميكا جانە حالىقارالىق قاتىناستار ينستيتۋتىنىڭ ديرەكتورى اكىمجان ارۋپوۆ.