وسى ءبىزدىڭ ۇكىمەت ءبارىن كەرىسىنشە ىستەۋدى اتەدكە اينالدىرىپ العان سەكىلدى كورىنەدى ماعان. ساياساتكەر راسۋل جۇمالى ايتپاقشى، رەسەيلىك «مۋزتۆ» كانسەرتىنە ميلليون دوللار تابىلعاندا، ءوزىمىزدىڭ ەڭ باستى تويىمىز – قازاق حاندىعىنىڭ 550 جىلدىعىنا تەڭگە تابىلماي قالادى. دۇنيەجۇزى وتكىزۋدەن قورقا-قاشاتىن ەكسپو كورمەسىنە ميللياردتاعان دوللاردى اياماي كەپ قۇيامىز دا، قاراپايىم مەكتەپتەردەگى وقۋشىلاردىڭ تەگىن اسىنا بولەتىن قارجىنى قىسىپ، اۋزىمىزدى قۋ شوپپەن سۇرتەمىز. پرورەسەيلىك كو مەن ەەو كىرگەنىمىزگە توقمەيىلسىپ، ماساتتانامىز دا، مىڭداعان كيىكتەرىمىزدىڭ، تورت-تۇلىك مالدارىمىزدىڭ جاپپاي قىرىلعانىنا كوز جۇما سالامىز. سول رەسەي پروتوندارىنىڭ كەسىرىنەن ءقازاقستاننىڭ ەكولوگياسى ءىرىپ-شىرىپ جاتقانى. استانانىڭ تۋعان كۇنىن تويلاۋعا ميلليونداپ اقشا بولگەندە الدىمىزعا جان سالمايمىز دا، حالىققا پايداسى تيەر ءبىر يگىلىكتى ىسكە بىلەك سىبانا كىرىسۋدەن قاشقاقتايمىز-اۋ كەلىپ. ءيا، راسۋل جۇمالى ايتقانداي، قازاق تىلىندە اقپارات تاراتاتىن تەلەارنانى (ەل ارنا) جابا سالۋ تۇككە تۇرمايدى بىزگە. ەسەسىنە رەسەيلىك ربك ارناسىن اشىپ بەرەمىز. سونداي-اق «ءبىلىم جانە مادەنيەت» دەگەن كوپكورىم تەلەارنانىڭ باسشىسى ەتىپ – مەملەكەتتىك تىلدە ءبىر اۋىز ءسوز ايتا المايتىن ادامدى تاعايىنداۋعا قىمسىنبايمىز. قىزىق، ءا؟
وسىلاردى كورگەندە اباي حاكىمنىڭ ءۇشىنشى قارا ءسوزى ويعا ورالادى ەكەن. «وسى كۇندە قازاق ىشىندە «ءىسى بىلمەس، كىسى بىلەر» دەگەن ماقال شىقتى. ونىڭ ءمانىسى: «ءىسىڭنىڭ تۇزۋلىگىنەن جەتپەسسىڭ، كىسىڭنىڭ امالشى، ايلالىلىعىنان جەتەرسىڭ» دەگەن ءسوز. ءۇش جىلعا بولىس سايلانادى. اۋەلگى جىلى «سەنى ءبىز سايلامادىق پا؟» دەپ ەلدىڭ بۇلدانعاندىعىمەن كۇنى وتەدى. ەكىنشى جىلى كانديداتپەنەن اڭدىسىپ كۇنى وتەدى. ءۇشىنشى جىلى سايلاۋعا جاقىنداپ قالىپ، تاعى بولىس بولىپ قالۋعا بولار ما ەكەن دەپ كۇنى وتەدى. ەندى نەسى قالدى؟»
ءبىز دە شە؟ ناۋقانشىل دەپۋتاتتار مەن قۇلقىنشىل باسشىلاردىڭ كەسىرىنەن وزىمىزدىكىن وزگە جەپ بولدى. ەندى نەمىز قالدى؟ ءيا، وسى ءبىزدىڭ بيلىكتەلەر «قازاققا» قارسى جۇمىس جاساپ جاتقان جوق پا؟
«ءا، قۇداي، جاس بالاداي قايعىسىز قىلا گور!»
نۇرگەلدى ءابدىعاني ۇلى
