جاقىندا ماڭعىستاۋ وبلىسىندا ءتورتىنشى مۇناي وڭدەۋ زاۋىتى سالىناتىن بولادى. بۇل تۋرالى بريفينگتە وبلىس اكىمىنىڭ ورىنباسارى راحىمبەك ءامىرجانوۆ مالىمدەدى دەپ حابارلايدى «قامشى» پورتالى «لاداعا» سىلتەمە جاساي وتىرىپ.

ءامىرجانوۆتىڭ ايتۋىنشا مۇناي وڭدەۋ زاۋىتى قۇرىلىسى يران رەسپۋبليكاسىمەن بىرلەسىپ وتىرىپ جۇرگىزىلەدى.

«قازىرگى تاڭدا اقتاۋ پورتى ارقىلى 5 ميلليون تونناعا جۋىق شيكى مۇناي يرانعا جونەلتىلۋدە. وبلىستىق اكىمشىلىك ءقازىر يران تارابىمەن كەلىسسوزدەر جۇرگىزۋدە. وبلىستا ءتورتىنشى مۇناي وڭدەۋ زاۋىتىنىڭ قۇرىلىسىنا قاتىستى ماسەلەلەر تالقىلانۋدا. ءبىز ساراپتاما جۇرگىزىپ كوردىك. يران تارابى دا ءبىزدى قولداپ وتىر. كەزىندەگى قازاقستان مەن يران اراسىنداعى بىرلەسكەن جوبالار ءوز ناتيجەلەرىن بەرۋدە.  ەندى ءبىز بىرلەسكەن مۇناي وڭدەۋ زاۋىتىن سالۋ تۋرالى ۇسىنىس جاسادىق. ول ارينە، ماڭعىستاۋ وبلىسىندا سالىنادى. ماڭعىستاۋداعى مۇناي ونىمدەرى يراننىڭ سولتۇستىك پورتىنا، ال شيكىزات وڭتۇستىك پورتقا جونەلتىلەتىن بولادى. ءبىز ءقازىردىڭ وزىندە يراننىڭ مۇناي مينيسترىمەن ءبىرقاتار كەلىسسوزدەر وتكىزدىك. يران تارابى دا بۇل جوباعا قىزىعۋشىلىق تانىتىپ وتىر»،-دەيدى اكىم ورىنباسارى ءامىرجانوۆ.

سونىمەن قاتار، اكىم ورىنباسارى بۇل زاۋىتقا ەكى جاق بىردەي قارجى بولەتىنىن جانە جاقىن ارالىقتا زاۋىتتىڭ تەحنيكالىق-ەكونوميكالىق جوبالارى دايىن بولاتىنىن ايتقان. ورىنباسار مىرزانىڭ سوزىنە سەنسەك،  جىل اياعىنا قاراي، زاۋىت قۇرىلىسىن باساتاۋ تۋرالى شەشىمگە قول قويىلاتىن بولادى. جوبا قۇرىلىسىنىڭ مينيمالدى شىعىنى 6 ميلليارد دوللاردى قۇرايدى.

قازىرگى تاڭدا قازاقستاندا مۇنداي مۇناي وڭدەۋ زاۋىتتارى – پاۆلودار، اتىراۋ جانە وقو-دا بار. الايدا ولار ىشكى نارىقتى قامتاماسىز ەتۋگە قاۋقارسىز.

نۇرزات توعجان