قازاقستاندا مەملەكەتتىك قىزمەتكەرلەرگە تۇزاق قۇرۋ ناۋقانى باستالىپ كەتكەن بە؟ سوڭعى كەزدەرى بيىك لاۋازىمدى شەنەۋنىكتەردىڭ لەگ-لەگىمەن قىلمىسقا شاتىلىپ، الدىنداعىلارى شەكارا اسىپ، قاشىپ جاتسا، ارتىنداعىلار تەمىر تورعا توعىتىلىپ جاتقانىنا جۇرت تاڭ قالمايتىن جاعدايعا جەتكەن ەدىك. ەندى كىشى ساياسي فيگۋرالاردىڭ دا باسىنا بۇلت ۇيىرىلە باستاپتى. ەندى اكىمدەر كىسى قولىنان قازا بولىپ جاتىر. بۇل تۋرالى «قامشى» پورتالى حابارلايدى.
اقمولا وبلىسىنا قاراستى بەلاعاش اۋىلىنىڭ اكىمى يانا الەكساندروۆنا كرىل كىسى قولىنان قازا بولدى. تۇپ-تۋرا جۇمىس كابينەتىندە. كەي مالىمەتتەر بويىنشا مارقۇمدى ءوزىنىڭ جارى اكىمشىلىك عيماراتىندا ازاپتاپ، بىرنەشە جەردەن پىشاقتاپ تاستاعان كورىنەدى. كۇدىكتى مۇنان سوڭ ءوزىن-وزى جارالاپ، موينىن پىشاقتاپ تاستاعان. بۇل تۋرالى وبلىستىق ءىىد حابارلايدى. اكىمشىلىكتە جارالانعان اكىم مەن ونىڭ جولداسى دەرەۋ جاقسى اۋدانىنداعى اۋرۋحاناعا جاتقىزىلدى. بۇگىن تاڭەرتەڭ اكىم ەسىن جيا الماي، كوز جۇمدى. ال ونىڭ جولداسى جانساقتاۋ بولىمىندە جاتىر. اۋرۋحانادا قارۋلى كۇزەت توبى جۇمىس جاساۋدا. قايعىلى وقيعا كەشە كەشقۇرىم ورىن العان. كەشكى ساعات 20:05-تە جاقسى ءاىىب كەزەكشى بولىمىنە بەلاعاش اۋىلىنداعى 1978 جىلعى 33 جاستاعى ازاماتتان اۋىلدىق وكرۋگ اكىمىنە پىشاق سۇققانى تۋرالى تەلەفون حابارلاماسى كەلىپ تۇسكەن. سودان كەيىن كۇدىكتى وزىنە-وزى قول جۇمساماق بولىپ، مويىن تۇسىنا پىشاق سۇققان، - دەپ جازادى bnews.kz وبلىستىق ءىىد باسپا ءسوز قىزمەتىنىڭ قىزمەتكەرى اقبوتا مۇقاشيەۆانىڭ مالىمدەمەسىنە سىلتەمە جاساي وتىرىپ.
ال وسىدان ءۇش كۇن بۇرىن، 15-شىلدە كۇنى تاعى ءبىر اكىم بەلگىسىز جاعدايدا قايتىس بولعان. بۇل شىعىس قازاقستان وبلىسى كۇرشىم اۋدانىنىڭ اكىمى التايبەك سەيىتوۆ. اكىمنىڭ ءولى دەنەسى ءوز ۇيىندە تابىلدى. وسى وقيعاعا وراي قىلمىستىق ءوندىرىس باستالدى. بۇل تۋرالى وبلىستىق ىشكى ىستەر دەپارتامەنتىنىڭ باسپا ءسوز قىزمەتى حابارلاعان (egemen.kz).
14 شىلدەدە كۇرشىم اۋداندىق ىشكى ىستەر باسقارماسىنا اۋدان اكىمى سەيىتوۆتىڭ دەنەسى ءوز ۇيىندە تابىلعانى جونىندە حابارلاما كەلىپ تۇسكەن. وسى وقيعاعا بايلانىستى قىلمىستى انىقتاۋ جۇمىستارى باستالىپ، قازىرگى كەزدە وقيعا ورنىندا شىعىس قازاقستان وبلىسى ىشكى ىستەر دەپارتامەنتىنىڭ جەدەل-تەرگەۋ توبى جۇمىس ىستەۋدە» دەلىنگەن. ايتا كەتەيىك، 64 جاستاعى ا.سەيىتوۆ اۋدان اكىمى قىزمەتىن 2007 جىلدان بەرى اتقارىپ كەلدى.
ەستەرىڭىزدە بولسا 2014 جىلدىڭ قازان ايىندا تاعى ءبىر اكىم بەلگىسىز جاعدايدا قازا تاپقان ەدى. تەرگەۋ جۇمىستارىنىڭ قورىتىندىسى بويىنشا اكىم جۇرەك تالماسىنان كوز جۇمدى دەلىنگەن بولاتىن. بۇل جولى كوكشەتاۋ قالاسىنىڭ اكىمى جومارت نۇرعالييەۆ كەنەتتەن قايتىس بولعان. ەسكە سالا كەتسەك، جومارت نۇرعالييەۆ 2014 جىلدىڭ 5 ماۋسىم كۇنى اقمولا وبلىسىنىڭ اكىمى سەرگەي كۋلاگيننىڭ وكىمىمەن كوكشەتاۋ قالاسىنىڭ اكىمى بولىپ تاعايىندالعان ەدى. وكىنىشكە قاراي، مارقۇم بەس اي عانا قىزمەت ىستەدى.
ال سول جىلدىڭ قاراشا ايىندا قوس بىردەي اۋىل اكىمى جول اپاتىنان قازا تاپقان. وبلىستىق ءىىد باسپا ءسوز قىزمەتىنىڭ حابارلاۋىنشا، قايعىلى وقيعا رەسپۋبليكالىق «جەزقازعان-پەتروپاۆل» تاسجولىنىڭ 860-شاقىرىمىندا بولعان. كوكتايعاق كەسىرىنەن «ۆاز 2107» مەن «ۆاز 2106» كولىكتەرى سوقتىعىسىپ، 3 ادام كوز جۇمدى. تاعى ۇشەۋى اۋرۋحاناعا جەتكىزىلدى. قايتىس بولعان قىزىلجار اۋدانىنا قاراستى كۋيبىشيەۆ اۋىلدىق وكرۋگىنىڭ اكىمى الەكساندر ان 2013 جىلى اكىم قىزمەتىنە تاعايىندالعان بولاتىن. وقيعا ورنىندا كوز جۇمعان ەكىنشى اكىم ماحمەت بايبوسىنوۆ تا قىزىلجار اۋدانىنا قاراستى ارحانگەلكا اۋىلدىق وكرۋگىن سوڭعى ەكى جىلدان بەرى باسقارىپ كەلگەن.
ءيا، قازاقستاندا اكىم اۋلاۋ ماۋسىمى باستالىپ كەتكەن كورىنەدى. ءبىرى جول كولىك وقيعاسىنان، ەندى ءبىرى بەلگىسىز جاعدايدا، ال تاعى ءبىرى تاپا-تال تۇستە جۇمىس ورنىندا كىسى قولىنان قازا تاپقان. سوندا بۇلار دا قازىرگى ساياسي جۇيەنىڭ قۇرباندارى ما؟
نۇرگەلدى ءابدىعاني ۇلى
پىكىر قالدىرۋ