الماتى وبلىسىنىڭ اكىمى اماندىق باتالوۆ قاپشاعاي قالاسىنىڭ اكىمى تالعات قايناربەكوۆقا سوگىس جاريالادى، - دەپ حابارلايدى Qamshy.kz اقپارات اگەنتتىگى الماتى وبلىسى اكىمىنىڭ باسپا ءسوز قىزمەتىنە سىلتەمە جاساپ. 

الماتى وبلىسىنىڭ اكىمى اماندىق باتالوۆ بيۋدجەت قاراجاتىنىڭ يگەرىلۋى بويىنشا بارلىق قاجەتتى شارالاردى قابىلداۋدى تاپسىردى. وبلىس باسشىسى وتكەن 10 ايدىڭ قورىتىندىسى بويىنشا ماقساتتى ينديكاتورلارعا قول جەتكىزۋ جونىندەگى ماسەلەلەر تالقىلانعان جيىندا بيۋدجەتتىڭ يگەرىلمەۋىنە جەرگىلىكتى اتقارۋشى ورگاندار باسشىلارىنىڭ دەربەس جاۋاپ بەرەتىنىن ەسكەرتتى.  وبلىستىق ەكونوميكا جانە بيۋدجەتتىك جوسپارلاۋ باسقارماسىنىڭ باسشىسى ج. ءامىرحانوۆتىڭ ايتۋىنشا، جالپى وڭىردە ەكونوميكانىڭ بارلىق باعىتتارى بويىنشا ءوسىم بايقالادى. ونەركاسىپ ءوسىمى قارقىن الىپ، 104،5 پايىز قۇرادى. اۋىل شارۋاشىلىعى ءونىمىنىڭ جالپى كولەمى 718 ميلليارد تەڭگەدەن اسىپ، ءوسىم 2،6 پايىزعا جەتتى. سول سياقتى بولشەك ساۋداداعى تاۋار اينالىمىنىڭ كولەمى دە 3،8 پايىز ءوستى. دەگەنمەن قۇرىلىس سەكتورىنىڭ قارقىنىندا باياۋلاۋ بايقالادى، ياعني 214،4 ميلليارد تەڭگە - 100،6 پايىز. ينۆەستيسيا بويىنشا دا ازداعان ءوسىم بار - 100،5 پايىز، 444،2 ميلليارد تەڭگە تارتىلعان.  بۇل رەتتە اماندىق باتالوۆ يگەرىلمەي جاتقان قارجىنىڭ ەداۋىر بولىگى وسى قۇرىلىس سالاسىندا ەكەنىن ايتتى. ماسەلەن، قاپشاعاي قالاسىنىڭ وزىندە عانا قازىرگى كەزدە 741 ميلليون تەڭگە يگەرىلمەگەن، ونىڭ 517 ميلليون تەڭگەسى رەسپۋبليكالىق بيۋدجەتتەن بولىنگەن. وسى سومانىڭ باسىم بولىگى كوپ قاباتتى ۇيلەردىڭ قۇرىلىسىنا قاراستىرىلعان. مەردىگەر كومپانيالار تاراپىنان قۇرىلىس جۇمىستارى جۇرگىزىلىپ جاتىر، دەسە دە ىسكە قوسۋ مەرزىمى جوسپارلانعاننان كەشىكتىرىلۋى ابدەن مۇمكىن. 

"مەملەكەت حالىقتى باسپانامەن قامتاماسىز ەتۋ ءۇشىن ءتيىستى قارجى ءبولدى. ال سەندەر ونى مەرزىمىندە ورىنداماي، قاراجاتتىڭ يگەرىلمەۋىنە جول بەرىپ وتىرسىڭدار. مەن مۇنى قاپشاعاي قالاسى اكىمىنىڭ، وبلىستىق قۇرىلىس باسقارماسى باسشىسىنىڭ جانە قۇرىلىس سالاسىنا جەتەكشىلىك ەتەتىن مەنىڭ ءبىرىنشى ورىنباسارىمنىڭ تىكەلەي كىناسى دەپ ەسەپتەيمىن. وسى اتالعان بارلىعىڭا قاتاڭ سوگىس جاريالايمىن. تۇرعىن ءۇي سالۋعا جاۋاپتى مەردىگەر ۇيىمداردى دا قۇرىلىس جۇمىستارىن كەشىكتىرگەنى ءۇشىن جازالاۋ كەرەك. جىل سوڭىنا دەيىن جاعدايدى تۇزەيتىن بولىڭدار، قۇرىلىس جۇمىستارى قاتاڭ باقىلانسىن"، - دەدى باتالوۆ.

وبلىستىق قارجى باسقارماسىنىڭ باسشىسى دانيار الىمبايەۆتىڭ ايتۋىنشا، وبلىستىق بيۋدجەتتىڭ جەكە جوسپارى 186 ميلليارد تەڭگە، ونىڭ جۇزەگە اسىرىلۋى 185 ميلليارد تەڭگە - 99،2 پايىز كۇتىلۋدە. قازىرگى كەزدە قاراجاتتىڭ يگەرىلمەۋى تۇكش، دەنساۋلىق ساقتاۋ، اۋىل شارۋاشىلىعى، ءبىلىم بەرۋ سالالارىندا، سول سياقتى پوليسيا دەپارتامەنتىندە ورىن الىپ وتىر. اتالعان باسقارمالار مەن دەپارتامەنت باسشىلارى بارلىق قاراجات ماقساتتى بولىنگەن، جىل سوڭىنا دەيىن يگەرىلەدى دەپ سەندىردى.

اتاپ ايتقاندا، قارجى گازداندىرۋعا، گەربيسيدتەر قۇنىن سۋبسيديالاۋعا، يرريگاسيالىق جۇيەلەردى جوندەۋدى جالعاستىرۋعا جانە ت.ب. شارالارعا قاراستىرىلعان. وبلىستىڭ اۋدان، قالالارىنا كەلسەك، اكىمدەر ءاربىر باعىت بويىنشا ەسەپ بەرىپ، قالعان قارجى سوماسى باعىتتالاتىن جوبالار جايىندا باياندادى. وسى جيىندا ەڭبەكشىقازاق اۋدانى اكىمىنىڭ جۇمىسى قاتاڭ سىنعا الىندى. اۋداندا بارلىق باعىتتا جۇمىس باسەڭدەگەن. سول سياقتى جيىن بارىسىندا ءمامس جۇيەسىنە كوشۋ، ااك تولەمى، الەۋمەتتىك قولداۋ شارالارى ارقىلى دارىگەر ماماندار جەتىسپەۋشىلىگىن شەشۋ سياقتى كوپتەگەن ماسەلەلەر تالقىلاندى. سول سياقتى وبلىس اكىمى زاڭسىز قۇرىلىسقا جول بەرمەۋدى قاتاڭ ەسكەرتتى.

"جالپى وڭىردە ەكونوميكانىڭ بارلىق باعىتتارى بويىنشا ءوسىم بار. قۇرىلىس كولەمىن ءبىز 102 پايىزعا، ينۆەستيسيا بويىنشا 103 پايىزعا جەتۋىمىز كەرەك. الدا ءالى 1 جارىم اي بار، بۇل جوسپارلاعان مەجەمىزگە جەتۋگە جەتكىلىكتى ۋاقىت بار دەگەن ءسوز. ول ءۇشىن ءاربىر اۋدان، قالا اكىمى بەلسەندى جۇمىس ىستەۋى كەرەك. ەڭ الدىمەن اتقارعان جۇمىستارىڭا تالداۋ جاساڭدار، سودان كەيىن ەكونوميكانىڭ بازالىق سالالارىندا وسىمگە قول جەتكىزۋ ءۇشىن، بولىنگەن قارجىنى تولىق يگەرۋ ءۇشىن ءتيىستى شارالار قابىلداڭدار. ءبىز بارلىق ماقساتتى ينديكاتورلاردى ورىنداۋعا ءتيىسپىز. جەرگىلىكتى جەرلەردە سالىنىپ جاتقان قۇرىلىستارعا ءجيى-جيى بارىپ كورىڭدەر، نە ىستەپ جاتىر، قالاي ىستەپ جاتىر، قارقىنى باياۋ ەمەس پە، مەرزىمىنەن كەشىكتىرمەي مە، سونىڭ ءبارىن كۇندەلىكتى باقىلاۋدا بولسىن. ناننىڭ باعاسى، اتاۋلى الەۋمەتتىك كومەك، باسقا دا كۇندەلىكتى تۋىندايتىن ماسەلەلەردى جۇمىس بارىسىندا شەشىپ وتىرۋ كەرەك، - دەدى ءسوزىن قورىتىندىلادى اماندىق باتالوۆ.