ماڭعىستاۋ وبلىسىندا رەسپۋبليكالىق، وبلىستىق جانە جەرگىلىكتى ماڭىزداعى اۆتوموبيل جولدارىنىڭ جاڭارتىلۋى قىزۋ جۇرگىزىلىپ جاتىر. وبلىستا جولدىڭ جاقسى جانە قاناعاتتانارلىق جاعدايى 92%-دى قۇراپ وتىر. قايتا قۇرىلىمداۋ جۇمىستارى 191،5 شاقىرىمعا جاسالماق.  218،8 شاقىرىم جولعا ورتاشا جوندەۋ وتكىزىلەدى. 

قازاقستان مەن وزبەكستاندى جالعايتىن «بەينەۋ – اقجىگىت – وزبەكستان شەكاراسى» اۆتوجولى كۇردەلى جوندەۋدەن ءوتىپ، ءبىرىنشى كەزەڭى پايدالانۋعا بەرىلدى.  ال، ەكىنشى كەزەڭى 2020 جىلدىڭ ءساۋىر ايىندا اياقتالادى. ءقازىر «جەتىباي-جاڭاوزەن-تۇركمەنىستان شەكاراسى»   اۆتوموبيل جولىنىڭ قۇرىلىسى جۇرۋدە. 73 شاقىرىمدى قۇرايتىن جولدىڭ قۇنى 14،9 ملرد.تەڭگە.

وبلىستىق جانە جەرگىلىكتى ماڭىزداعى «اقتاۋ-قالامقاس» جانە «تاۋشىق-شەتپە» اۆتوموبيل جولىنداعى جاساندى يماراتتاردى قايتا جاڭارتۋعا 872 ميلليون تەڭگە ءبولىندى. ماڭعىستاۋداعى كيەلى جەرلەرگە باراتىن «اتا جولى» اۆتوجولى دا قايتا جاڭارۋدا. ءقازىر قۇرىلىس-مونتاج جۇمىستارىنىڭ 90%-ى ورىندالدى. قۇرىق اۋىلىنان تەڭىز پورتىنا دەيىنگى 22 شاقىرىم جول دا  اياقتالادى. سونداي-اق «جىڭعىلدى-شايىر-شەركالا مەكەنى» 29،5 شاقىرىم جولى، «شەتپە-قىزان» اۆتوموبيل جولىن قايتا قۇرىلىمداۋ 49-85 شاقىرىم ۋچاسكەسى جانە ت.ب. جولدار جاڭارتىلۋدا.

ايماقتا اۆتو جولدارىنىڭ جالپى ۇزىندىعى - 2846،1 شاقىرىمدى قۇرايدى. ونىڭ ىشىندە، رەسپۋبليكالىق ماڭىزداعى – 1049 شم بولسا، وبلىستىق جانە جەرگىلىكتى ماڭىزداعى – 1 797،1 شاقىرىم.